قطعة (بسبوسة) ورصيد بـ (3) جنيه لكل لاعب في المريخ

على سيكافا دي اتحاد كتاب (المقصورة) ح يخلوا المقصورة ويلقوا ليهم موضوع يتكلموا فيه

سيكافا دي بطولة (تلاتين عشرة) ومرحلة المجموعات في بطولة الاندية الافريقية للابطال (جلاكسي)

الغريبة جمال الوالي بفوز في الدول العربية بجائزة اكثر رئيس نادي عربي عندو شعبية ..وبطولاتو من دول شرق ووسط افريقيا

قلت دي يحلوها كيف؟.

قعدت براي افكر زي (قطر كريمة)…ايام حسين شندي كان بغني (قطار الشوق متين ترحل).

بدون مقاطعة لي كلامك – اول قطر كريمة بفكر.

زمنا كانت قطارات كريمة بتفكر…هسع (الفلاسفة) ذاتهم خلوا (التفكير)…بقوا شغالين بالخبرة واعتبار ما كان.

ما في زول قاعد يفكر.

قالوا لي المريخ جاب ليه بطولة جوية.

الايامات دي طيارات الاغاثة شغالة لدعم منكوبي السيول والامطار والفيضانات.

الظاهر كدا مع اللبن والخيم والساردين جابوا ليهم (بطولة جوية).

وزي ما ضربوا (الاغاثة) الجماعة المريخ ضرب ليك (البطولة) الجوية.

المريخ ذاتو منكوب طلع ليك من البطولة الافريقية الكبرى من دور الـ (64).

عشان كدا يحتاج الى دعم فوري من دول شرق ووسط افريقيا.

ناس الصومال وروندا الدول دي في الاطلس بقت ما موجودة.

انتوا بتجيبوا الاسماء دي من وين؟.

المريخاب يحتاجون الى دعم سيكافي عاجل.

خلاص الحمدلله الجماعة ممكن يلقوا ليهم موضوع يكتبوا فيه.

ممكن يخلوا الكتابة عن (السيخ والطوب والاسمنت) ويدخلوا بي بطولتهم (المهببة) دي يكتبوا لينا عن الكورة.

لكن هي سيكافا فيها (كورة).

كورة شنو؟.

ديل كورتهم الى الان مركبين ليها (دربات).

كورتهم بتعادل (الليدو) في دول شمال افريقيا.

كورها اخير عدمها.

زمان الملاريا كانت بتجي للزول في السنة مرة واحدة.

هسع مع الامطار والبعوض والفيضانات بقت الملاريا تجي للزول في السنة مرتين.

زي سيكافا.

سيكافا كانوا بعملوها مرة واحدة في السنة.

هسع بقوا يعملوها مرتين في السنة تقول كورس ملاريا.

لكن واللـه بتريحوا (المقصورة) شوية.

ح يفكوا المقصورة.

على كدا يعني اتحاد كتاب (المقصورة) ح يخلوا المقصورة ويلقوا ليهم موضوع يتكلموا فيه.

ورابطة مشجعي (النجيلة) ح يفكوا شوية موضوع (النجيلة) دي ويتكلموا عن تراوري.

طبعا المريخاب ما محتاجين ليهم لي (عضم) كبير.

ممكن اي علبة ساردين يعملوها لينا (كأس).

جيبوا ليهم (طماطمة) ممكن يقنعوك على انها (بطيخة).

ديل جابوا الحضري عمرو (40) سنة تقول مأذون اقنعوا ليك الناس على ان عمرو (21) سنة.

لكن اعتبارا من ان بطولة سيكافا دي التى لا ترى بالعين المجردة تعالوا اقعدوا نشوف ليها (جوائز) قدرها..ونشوف تبعاتها بتأتي على ياتو شاكلة.

اولا حاجة كأس البطولة عبارة عن (علبة لبن) مطلية بموية المطر الخالص.

علبة لبن فاضية عشان ما تقعدوا تشاكلوا ساكت ومن هسع بنقول ليكم ما تشاكلوا في الفارغة.

يمنح الكأس للفريق الفائز بالبطولة على ان يكون تصوير كابتن الفريق وهو يستلم للكأس عن طريق موبايل (تلاتين عشرة).

سيكافا دي لو قلبوها فوق على تحت ما بتطلعوا منها بـ (جلاكسي).

سيكافا دي بطولة (تلاتين عشرة) ومرحلة المجموعات في بطولة الاندية الافريقية للابطال (جلاكسي).

شفتوا الفرق كبير كيف؟.

طبعا الناس الزمن دا بقوا ما بتقدر توصل ليهم المعلومة إلا لو اتمثلت ليهم بالموبايلات.

زي كأنو الموبايلات دي بقت لغة العصر.

الواحد بمشي الجزارة يقول للجزار عليك اللـه عاوز لحمة (جلاكسي) كدا.

ولمن يكون عاوز ليه (عضمة) في اللحمة بقول ليه اعمل لي معاها (تلاتين عشرة).

اما اذا كنت زول (كمونية) ساكت بتقوم تطلب من الجزار (شاحن ابرة) على اعتبار انك عاوز ليك (كمونية).

شفتوا النظام كيف؟.

لغة الموبايلات سيطرت على الوضع تام.

لو في زول عاوز منو قروش طبعا بختفى منك ويقعد يتهرب ..عشان كدا لمن تقعد توصف الزول العاوز منو قروش دا لي صاحبك بتقول ليه تتخيل الزول دا (اخر ظهور) ليه كان قبل (4) شهور – يعني انت عاوز منو قروش من شهر مايو.

البنت زمان وقت يتقدموا ليها ويطلبوا يدها لو كانت ما عاوزة العريس بتقول عاوزة اقرأ.

هسع البنت لو ما عاوزة العريس (بتغادر المجموعة).

البنت من يتقدموا ليها الاب بطلع الجلاكسي حقو – من يلقى بنتو (غادرت المجموعة) بعرف ليك طوالي انها ما عاوزة العريس دا.

بما يعادل زمان (عاوزة اقرأ).

عشان كدا يا جماعة بطولة سيكافا دي نحن عندنا بتعادل (تلاتين عشرة).

لو جبتوا لينا معاها بطولة الشارقة ممكن نقايضها ليكم بـ (ربيكا).

غير كدا ما عندنا ليكم اي حاجة.

زمن مايو نميري كان مريخابي طبعا …كان يعمل ليه (كأس ذهب) مخصوص للمريخ ناس علي قارقارين يجوا يشيلوه.

كان بنتظر المريخ يجيب ليه كأس ان شاءاللـه من محلية كرري عشان يقولوا دي بطولة جوية ويقوموا يعملوا ليهم تكريم في القصر.

نميري زمان كان بعطي اللاعب قطعة ارض.

لاعبو المنتخب السوداني الفائز ببطولة الامم الافريقية عام 1970 اي لاعب منحوه قطعة ارض.

والحكومة دي ذاتها منحت لاعبي المريخ عندما فازوا بكأس مانديلا سنة 1989م قطعة ارض لكل لاعب.

هسع يا جماعة سيكافا دي عاوزين نشوف ليها جوائز كدا نمنحها للاعبي المريخ.

طبعا ما بنقدر نعطيهم (قطعة) ارض.

لكن اي لاعب بنديه (قطعة).

اي لاعب بنديه (قطعة) بسبوسة اصلهم هم بقدروا الحاجات دي وعندهم ذات قيمة ناس بلة جابر براهم بقولوا كدا.

يعني الكلام دي نحن ما بنجيبوه من رأسنا.

وبنقوم مع قطعة البسبوسة بنشوف ليهم رصيد بـ (3) جنيه لكل لاعب.

انتوا فاكرين سيكافا دي جوائزها ح تكون اكتر من كدا.

قالوا ليك هداف البطولة منحوه (شاحن موبايل).

انتوا قايلين الحاجات دي قاعد اقطعها ليكم من رأسي.

قبل ايام منح لاعب المريخ جائزة عبارة عن جهاز (ريسفير) لقناة جنوب افريقيا على نجوميته لاحدى المباريات.

المضحك ان الجهاز في السودان ما بشتغل (وديل عاوزين يشغلوا لينا سيكافا هنا).

واحد قرفان وزهان وعندو ضيق وجنو وجن المطرة قالوا ليه 2 في 3 بي كم؟.

قال ليهم واللـه ما عارف لكن قبال اسبوع كدا كانت بـ (21) مع الزيادات الحاصلة في الاسعار الايامات دي ما عارفها بقت بي كم الان؟.

واحد تاني قالوا رأيك شنو في الضفادع قال ليهم واللـه ما عندي فيها رأي لكن لو عملت ليها (اجنحة) بتبقى اغلى من (الحمام).

واحد تالت سألوه في الخريف والسيول والامطار دي و قالوا ليه اسمع يا ابوالشباب مواصلات الكلاكلات بتجي بالشارع دا؟.

قال ليهم الشارع وينو انتوا هسع واقفين في (صالوني).

زول اخر النوع القرفان من اي حاجة ودايما بتلقاه قاعد يعاين بالشباك.

الزول دا قالوا ليه تتصور باقة الكرستال بتاعة الزيت بقت بـ (110) جنيه.

قال ليهم تبقى بـ (110) تبقى بـ (150) تبقى بـ (190) ما مشكلة المشكلة الجماعة ديل يضموا لينا باقة الزيت دا في فاتورة الكهربة.

اتنين اول مرة يمشوا فرنسا …اول ما وصلوا نفخهم ليك (برد) اي واحد فيهم خلى ليك (نخرتو) في وش التاني.

حصلت عليهم لخبطة في (النخر).

طبعا لخبطت (النخرين) كعبة خلاص.

الاتنين ديل دخلوا ليهم ارقي مطعم في باريس ..وقالوا يطلبوا ليهم (بوش)..وما عارفين يقولوا للنادل شنو؟.

قاعدين ساعة نص يوصفوا للجرسون ما فهم حاجة.

اخر حاجة شافوا ليهم (سوداني) داخل على المطعم يبدو عليه انه معمر في فرنسا وظاهر انو بتكلم الفرنسية بي طلاقة.

مشوا عليه قالوا ليه يا (زول) نحن وصلنا من السودان قبل (7) ساعات وعاوزين نأكل (بوش) ما عرفنا نطلب البوش كيف في المطعم دا.

السوداني عاين ليهم سمح وقال ليهم انتوا جايين من السودان ليه وقت عاوزين تأكلو (بوش) في باريس.

سبع ساعات ما قادرين تمكسوا نفسكم من البوش.

اصلو ما بتتطورا.

البوش دا في (الكلاكلة) ممكن تضربوه.

هسع ناس المريخ (البوش) بتاع سيكافا دا ممكن في شارع العرضة يعملوه.

تعب ساكت.

…

ملحوظة : واللـه عملتوا لينا موضوع.

هوامش

الغريبة جمال الوالي بفوز في الدول العربية بجائزة اكثر رئيس نادي عربي عندو شعبية ..وبطولاتو من دول شرق ووسط افريقيا.

جمال الوالي دا مفروض طوالي يمنحوه نجمة (السيكاف) من الدرجة الاولى.

ويخلوا لينا الباقي نحن بنتمو.

فترنا نحن من (التمتمة).

واحد دخل فيه (قندران)…قام بعد (21) يوم قالوا ليه المريخ شال كأس سيكافا.

زولكم قاعد يضحك وعاين للدكتور وقال ليه يا دكتور الظاهر انا فكت مني معقولة حادث (قندران) يعمل فيني كدا.

يا حليل ناس خالد جوليت شالوا كأس سيكافا للمنتخب مرتين ما في زول اشتغل بيهم.

هسع الكاس يجيبوه ناس (انغا) ويفلقونا ناس بلة جابر.

واللـه موضوع سيكافا دي عاوز ليه (من الغلاف للغلاف).

يا احمد الحاج انا بهظر ساكت ما تسألني بعدين من الصفحة.

اصلو الواحد ما يهظر.

ناس الارصاد الجوي الايامات دي توقعات كلها بقت مجلية.

تتخيلوا قالوا بتجي مطرة جابوا لينا كأس سيكافا.

لكن بي حالتكم (السيكافية) دي اوعكم تلاقونا في المقبرة.

بنبشكم حرف حرف.

…..

عاجل : طبعا جمال الوالي صدق!!…اها تاني (4) شهور ما بزعل ليكم.
[/JUSTIFY]

وإن طال السفر – محمد عبد الماجد
صحيفة قوون