الفنان “محمد فؤاد”: سأنظم حفلاً في السودان عوائدها لسائق الحافلة الذي أنقذ حياة المصريين من بطش الجزائريين

غير مرحب به فى السودان لانه اكبر كاذب ومدعي اولا اتصل بقناة النيل وقال هم فى بيت سودانى هرب وترك لهم المنزل وطلع كازب وموجود فى وكالة قال انحنا بندبح وبنموت وظهر فيديو يوضح انو والمجموعة بمكان امن والدليل هدوء الموجودين حوله ولما وصل مصر فى المطار قال رجال الامن السودانى هربوا وتركوهم وانهم معلقين الاسلحة لى شنو ميداليات يعنى ولا ماشين بيها الجبهة هذا ما قاله وهو موثق صوت وصورة ونقول له انه غير مرحب به على الاطلاق وحفاظا على روحه افضل مايفكر يجى السودان خالص

كذاب وابن ستين كذاب

لانجيك ولا تجينا عن محبتكم سمينا كل منافي طريقه انتهيناانتهيناااااااااا, انا غايتو ماشفتا اكذب من الراجل دا وخصوصا الكلام القالو لما وصل مصر:حجم الحجاره الرمهم بيها هروب الامن والعجب قال 10الف نفر بيرجم في الباص بتاعم بالحجاره(كان الباص بقي كفته).القوات الكانت موجوده للتامين تكفي لغزو دوله مش حمايه مشجعين ومافي جندي سوداي بهرب يز…….باختصار مايجيناوتاني مافي سوداني حيسمع ليو:mad: 😡 :crazy:

ده بص ولا قطر اللبيشيل 100 شخص

غير مرحب بك السودان بلد الطيبة والامان والصدق غير مرحب ايها الكذاب

الشعب السوداني كله بكرهك ونسال الله كما ظلمت وبهت الشعب السوداني الذي اكرمك نسال الله يجعل مصيبة في هذه الايام المباركة ويقطع صوتك ويخرسك للابد

شجعناكم , حميناكم , أكرمناكم , استقبلناكم وودعناكم كافضل ما تكون الاستقبالات والوداعات , ولكننا لُدغنا منكم يا مصريين وقد شهّرتم بنا افكا وبهتانا , ولقد جرحتمونا علي حين غرة في اخلاقنا السودانية التي يعرفها القاصي والداني , وفي قواتنا النظامية التي لولاها لكنتم في طي النسيان مع وحشة الموت الذي دائما ما تفرون منه , وانت انت يا ايها المتشدق باغاني الاطفال والمتواري خلف استار البراءة التي كانت تبدو عليك لقد وجدنا منك ما لم نجده من احد من بني جلدتك ناكري الجميل والمعروف ……….وااااااااااه …..وبعد هذا تريدنا ان نلدق للمرة الثانية من نفس الجحر , هذا بعدك فتالله ان فعلت لسوف ترى ما لم تراه عيناك لا من الجزائريين ولا غيرهم , فأنتم لم تتقوا غضبة الحليم فعليكم ان تكتووا بنارها….. لعلمك ايها ال…… السائق السوداني انا لا اعرفه ولكنه لو سمع ما رويته عن السودانيين والشرطة والامن السودانيين لن يرحمك لانه سوداني , وهو نجاكم من الموت رغم انه مصاب وذلك ايضا لانه سوداني ولا يريد شكرانا عليها.. .. لو راجل تعال السودان..!!!:mad: 😡 😡 😡

((تم تكسير زجاج الحافلة التي أقلتني مع 100 مصري إلى مطار الخرطوم الدولي، وقام الجزائريون بعدها برشق الحافلة بالسكاكين والمطاوي )) بالمنطق لوهناك 100 راكب في باص وتم رشقهم كما ذكر الفنان لكان الازى الجسيم وربما الموت وارد بنسبة 100% خافوا الله وفتشوا على شماعة اخرى غير هذه

من أين تم نقل هذا الخبر وكيف تنقلون خبر أنتم متأكدون من كذبه كل الأخوه المصريين الكذابين عادوا إلي وطنهم سالمين ولم يصب أحد رغم أن أي مباراة في كرة القدم لا تخلو من إصابات للجمهور ، أكثر من أربعون ألف في الملعب ومثلهم خارج الملعب ورغم ذلك تمكنت السلطات السودانية من حماية المصريين

انت عارف سائق الحافلة دا لو مسلح بيحتل الجزائر بما فيها انت راجل زي حالتك شديد بدلا من الدفاع عن نفسك تتغزل في سائق حافلةوتسيئ باي شكل للامن السوداني
يعني المسالة مسالة اساءة ليس الا
عشان كدا لو جيت السودان بحرض جزائريين اقول ليهم فطسو

اقرو يا اخوان واخوات
اقرو ياسودانيين وسودانيات
يابلد المليون ميل مربع
ده اعلان في جريده اخر لحظة عدد الليلة من شركة مصرية:::ا
(شكر وتقدير)
شركة طارق نور تتقدم بوافر الشكر والتقدير والامتنان لكافة الاجهزة الامنية والشرطية والمتخصصة التي وقفت على راحة ضيوفنا بالكرم الفياض والشهامة اللتين عرف بهما الشعب السوداني الاصيل.
ونخص بالشكر مجموعات الحراسة التي استقبلتنا وضيوفنا من صالة كبار الزوار بمطار الخرطوم ورافقتنا ختى استاد المريخ تامينا لوصولنا والذي كان سالكا وممهدا الا من قلة منفلتة من الجمهور الجزائري رشقت الحافلات بالحجارة حيث تم ردعها بواسطة فرق الحماية المرفقة.
واستضافت الشركة ضيوفها بمقرها لبعض الوقت لتجاوز الاحتكاك مع الجمهور الجزائري كما اوصت بذلك الجهات الامنية المختصة.
كما نود ان نطمئن كل من سال عنا مشفقا او مستفسرا بان مقر الشركة لم يتعرض البت لاي اذى كما جاء في اقوال البعض. وان الفنانين محمد فؤاد وهيثم شاكر كانا مع بقية الضيوف داخل الشركة تحت حماية امنية كاملة بل ان شرطة العمليات قد قامت بتامين اضافي بعد اقل من 5 دقائق من الاتصال بهم وقامو بتامين طريق البعثة من الشركة حتى المطار بقوات اضافية.
ولا يفوتنا ان نزجي الشكر اجزله بالمثل للطاقم الدبلوماسي للسفارة والقنصلية المصرية بالخرطوم الموقر لما قدموه من عون وسند بالتنسيق مع الجهات المختصة السودانية وبالله التوفيق

احمد طارق
المدير العام

التماسيح لا تطرب لاغاني المصريات و ………….
و نحن عندنا الشهامة لا تساوى باموال الدنيا كلها
يا أخي لا تجينا و لا عاوزين نشوفك تاني

أرجو من الفنان محمد فؤاد الإمتناع عن الغناء في السودان نهائياً لما بدر منهم من تواطؤ مع الجزائريين، و شكراً

المخليني اكتب هنا اني مستاء وبشدة من تصرفات اشقائي وكتابتهم وافكارهم علاوة علي تلطيخهم للسودان….. الحمد لله اني لا اعرف الفرق بين الفاول والبلنتي ولا لي في الكورة بتاعة القدم ولا لي في السياسة ولا في الفن ولم اشجع المنتخب الوطني ولا الفرق الاخري لكن انا عندي حق 100% مادامت الكورة داخلة في السياسة والسياسة مخرمة علي التجارة… واشهد الحق بان الامن السوداني قام بواجبة كما ينبغي وايضا الاخوةالاشقاء السودانيين المشجعين للجزائر الشقيق لم يتعرضوا للمصريين ابناء النيل الواحد… وان كان هناك انفلات فانة وارد لطبيعة المباراة والتصعيد الاعلامي من قبل الدولتين العربيتين التي حولوا فيها لعبة رياضية شعبية الي حرب نفسية دخل في رحاها كل المتعصبين لحزبي الحكم في البلدين الشقيقين وعندما حلت ساعة الحسم كان الاحساس بعجز النصر لمصر مما دفع طلائع البعثة المصرية لرجم السودان بدون رحمة ولا عرفان بالجميل… نعم مطار الخرطوم ليس كمطار القاهرة … نعم طببعة السودان ليست كطبيعة مصر … وايضا لبست كطبيعة الكونجو ولكن كل ما اعرفة ان الرياضة لعبة الرابح فيها نقول لة مبروك والخاسر نقول لة هارد لك في الجولة القادمة… ويجب ان اشير الي ان المباراة الفاصلة بين السودان وتشاد كانت في استاد القاهرة وقد شجع المصريون التشاديين رغم استعجاب السودانيين من سلوك المصريين ولم يحترموا اشقائهم السودانيين في ما اصابهم من التشاديين من ضرر فادح جراء حرب العصابات الواقعة اثارها الي الان في قلب ام درمان فلم يا اخواني في الماء والكلاء والدم والعرض و ارض الحضارة الباقية ببقاء الارض الي الساعة … لما ولمصلحة من والي متي ينتهي المرض
اشكر كل السودانيين المشجعين لمصر وايضا الجزائر واشكر كل السودان لترحيبة بكل العرب وحمايتهم ومبروك للجزائر علي الفوز بكونة ممثل العرب في 2010 ايا كان السلوك التشجيعي وكفانا ولولة
فان عرفتم يا مصريين من هم السودانيين الحقيقيين لرفعتوهم فوق اكتافكم هنافا بانكم وجدتم اخا حقيقيا قلبا وقالبا وكفانا تعنت واستهتار وغرور