الاعتــــذار الاقبـــح مــن (جـــوز) بلـة جابر

كلامنا ذاتو ح نبدلو ايش لونك وبدك ايه ..وزي ما بقول عادل امام شلولخ

هيثم كابو قالوا ليك عاوز يقنع ليك الامة الاسلامية كلها بان بطولة سيكافا بطولة قوية ولها اعتبار وعندها قيمة

المريخابي منطقن في الحكاية دي يقولوا ليك والـلـه نحن من (كرري) ما فرحنا

الزميل أحمد الحاج مدنا بنسخة من صحيفة (الزعيم) قدمها لي زي (شاي الصباح) ، وقعد يطنطن ليك..(أحمد وقت يكون عاوز يقول ليك حاجة ما بقولها ووقت يكون ما عاوز يقول ليك حاجة بقولها ليك).

شفتوا المنطق دا كيف؟..(أحمد خطير في الحاجات دي).

احمد قال لي شفت بلة جابر قال شنو؟.

اقعدت افكر براي…طلعت افكاري في الشارع وبقيت (احلل).

كمان (التحليل) ممنوع.

نحلل على كيفنا (الخريف السنة القادمة ح يكون اخطر من خريف هذا العام).

تحليلاتنا كدا نحن.

الباسطة ح ترخص بعد الخريف الناجح دا (علاقة الباسطة بالخريف شنو؟).

زي علاقة ايها المواطنين الشرفاء بجسر الانقاذ.

رجعت لي احمد الحاج.

قلت لي أحمد بلة جابر قال شنو؟…ح يطلع بيان لجامعة الدول العربية ح يرخص اللحمة ح يناقش مشكلة المواصلات .

ح يعمل شنو؟.

بلة جابر مالو؟ (الايامات دي ما في زول فاضي ليه ولا عندنا ليه وقت).

كل زول يرعى بي سيكافاتو.

ما خليت احمد الحاج يرد واصلت في (استنتاجاتي) – باقى نحن (الاستنتاجات) عندنا وقت تكتر بتبقى لينا زي (الاسكراتش) طوالي بننزلها رصيد في التلفون.

زي الموية الباردة بتبقي لينا ساقطة.

نستنتج على كيفنا في زول عندو اعتراض استنتاج.

البترول طلع قعدنا نستنتج قلنا ح نبقي زي السعودية.

وح نعمل لينا عقالات.

كلامنا ذاتو ح نبدلو ايش لونك وبدك ايه ..وزي ما بقول عادل امام شلولخ.

البترول طار تاني قعدنا نستنتج لكن قدر ما شطحنا في (الاستنتاج) ما اتخيلنا نصل للمستوى الوصلنا ليه دا.

وصلنا حد نفرح بي سيكافا.

المريخاب منطقن في الحكاية دي يقولوا ليك والـلـه نحن من (كرري) ما فرحنا.

بقول ليهم اتكلموا عن نفسكم بس.

بلة قال شنو يا احمد ؟…اتكلم عن (اعلان باريس) عمل تنوير صحفي عن (سيكافا).

قال شنو؟…جابوه في (صحة وعافية) جابوه في (اغاني واغاني).

طبعا كنت بسأل واجاوب براي ما اديت ليك احمد الحاج اي فرصة (في ناس كدا يسألوك وما ينتظروا الاجابة).

يقعدوا يجاوبوا براهم (يسألوا ويجاوبوا) في دكتاتورية اكتر من كدا؟.

كنت بقول لي احمد قال شنو؟.

وبندلق ليك في (الاستنتاجات) بلة قال في مطرة ح تجي الاسبوع القادم ح يرفع الموضوع للكاف.

قال شنو يا احمد؟.

احمد ثبتني ليك قال لي والـلـه الزول دا ما قال اي حاجة في الكلام البتقول فيه دا.

الزول دا لا من بعيد ولا من قريب قال كلامك دا.

ما عندو اي ذنب.

عاوز يحول المواقف.

يا احمد قال شنو؟.

أحمد دخل في الموضوع بعد ما كملت (استنتاجاتي).

ما خليت حاجة.

أحمد قال :

عدد الزعيم ليوم الخميس الماضي كان يحتوي على صفحة كاملة عن (كواليس الرحلة المرعبة) ومعروف ان طائرة المريخ تعرضت لهزة ومطبات لكن بحمد الـلـه وصلت في النهاية للخرطوم بسلام.

الزعيم رصدت كواليس الرحلة وجاء في الخطوط العريضة في الصفحة : ( بلة جابر في عز اهتزاز الطائرة طلب وجبة سريعة وقال : معقولة الواحد يموت جعان ..تراوري صرخ نو …نو…نو…وعلاءالدين ظل يردد الشهادة).

وجاء في التفاصيل : ( فاجأ بلة جابر نجم المريخ وظهيره الايمن الجميع في عز إهتزاز الطائرة ، عندما نادي على المضيفة طالبا منها احضار وجبة سريعة لأنه يشعر بالجوع ، واندهشت المضيفة من طلبه خاصة وان زملاءه اللاعبين كانوا يعيشون رعبا حقيقيا ، وبعد انتهاء الاحداث راجع الجميع ذكريات رحلة الرعب سأل الجميع بلة عن سر الوجبة في تلك اللحظات فرد بطريقته المعروفة : (معقولة اموت وانا جعان) فضحك الجميع.

يعني بلة جابر حركات (البوفيه المفتوح) دي في الطيارة ما عاوز يخليها.

في الطيارة المهزوزة ما بسيبها.

الولد مفتح ما عاوز يموت جعان.

الكلام دا يا جماعة جاء في جريدة المريخ جريدة (الزعيم) المملوكة لرئيس النادي.

عشان ما تفكروا كدا وإلا كدا.

يبقى نحن من حقنا نعلق.

براكم بتجيبوه لي نفسكم.

بلة جابر اعلام المريخ بطلق عليه (الخط السريع) يبقى نحن من حقنا بعد الكلام دا نطلق عليه لقب (الوجبة السريعة).

السرعة في الوجبة ما في اللعبة.

زول في طيارة عاوزة تقع الركاب كلهم بصرخوا بطلب (وجبة سريعة).

غايتو الحتة دي يا (ضكرنة) اكتر من اللازم.

يا كمان محاولة لتثبيت (تراروي) ومجموعتو الخايفة.

بلة عاوز يتظارف عاوز يعمل ليهم الموضوع عادي.

موضوع الطيارة دي بكون عندو عادي بكري المدينة بعمل ليه في عمايل اكتر من عمايل الطيارة دي.

على كدا وبالفهم دا باسكال بكون طالب بمرتبه وقت الطيارة اهتزت.

وبكون قال ليهم بعد الاحوال ما راقت يعني عاوزين الواحد يموت ما صارف.

طبعا المحترفين ديل اهم حاجة عندهم (المرتب).

الدولار دا عندهم قبل اي شيء.

يمكن (الفرحة) الكانت ظاهرة على لاعبي المريخ بعد وصولهم للخرطوم فرحة (سلامة).

فرحة بس عشان الطيارة هبطت.

الجماعة مرقوا من مطب خطير ليهم حق يفرحوا.

ووصلوا الخرطوم عملوا ليك الفرحة فرحة سيكافا.

بمناسبة (المطار).

قالوا ليك واحد كدا اول مرة يمشي على مطار الخرطوم افتكر ليك المطار (السوق الشعبي).

مطارنا دا لا حضاري ولا حاجة ولا تغشوا نفسكم.

مكتب تأشيرات الخروج …ناس بالشباك وناس بدخلوا بالباب (ما عارف صفتهم شنو؟..يأشروا ويطلعوا).

المروحة ما شغالة والتأشيرة تدفع فيها الرسوم وتقيف ليها في الصف ..وتجي تلقاها طلعت ليك غلط.

في غلط في الاسم.

تمشي قدام شوية واحد من الجماعة يعاين للجواز ويعاين ليك يرمي الجواز في التربيزة …يمسك ليه ملف تاني.

تقيف نص ساعة …الوقفة تطول تقول ليه لو سمحت الجواز.

يقول ليك جواز شنو؟.

تقعد تحكي ليه القصة من البداية ..من استخراج الجواز الى وقفتك قدامو الان.

يديك الجواز يقولوا ليك تمشي الميزان.

تمشي الميزان تلقى البلد كلها هناك.

شنطة تروح.

وشنطة تدخل في شنطة.

والعفش دا حق منو؟.

والوزن دا زايد.

تنتهي من الفيلم دا تمشي على اخر صف…يقولوا ليك (الرحلة) اتجألت والميزان ذاتو ثبتوه.

تقعد تفتش في العفش.

تطلع من المطار يلاقيك بتاع التاكسي يقول ليك حمدلله على السلامة.

تقول ليه يا زول انا ما راجع من برة انا في الاساس ما سافرت.

بتاع التاكسي يفتكرك قلت ليه كدا عشان ما تدفع ليه اجرة كويسة في المشوار باعتبارك مغترب.

الاجراءات بصعبوها شديد.

قدام اي (ختم) صف ورسوم وموضوع.

نحن فترنا من الحاجات دي.

شوفوا لينا حل لي طياراتكم دي او رجعوا لينا تاني قطر (كريمة).

انتوا قايلين البتعمل فيه الطيارات دي القطارات بتعملها.

….

ملحوظة : الخريف السنة دي قالوا لي ديسمبر …(عشان ناس الحكومة يكونوا عارفين).

هوامش

امس كنا مع حسن فاروق عبر برنامجه اليومي (زمن اضافي) في اذاعة هلا 96.

البرنامج يطرج قضايا شيقة بموضوعية ومنطق.

قبل ايام كان حسن فاروق قد استضاف في نفس البرنامج هيثم كابو في حلقة ساحنة.

هيثم كابو قالوا ليك عاوز يقنع ليك الامة الاسلامية كلها بان بطولة سيكافا بطولة قوية ولها اعتبار وعندها قيمة.

كابو دا طول ما مقتنع كدا بي سيكافا دي مفروض يدخلوها اتحاد شرق ووسط افريقيا.

كابو بقدر يقنع ليك الافارقة.

ويمكن لو بقى سكرتير اتحاد سيكافا يقنع الناس ان سيكافا اقوى من بطولة الاندية الافريقية للابطال.

زول ما بتلفت في الحاجات دي.

هيثم مصطفى عندما كان في الهلال …كابو طلع ليك هيثم مصطفى منتهى وما عندو كورة.

هيثم مصطفى مشى المريخ كابو طلع ليه عدد مخصوص من صحيفة (فنون) يوم الجمعة اليوم الذي لا تصدر فيه الصحيفة.

هسع هيثم مصطفى وقف من المريخ كابو تاني رجع يهاجم في هيثم مصطفى.

وعلى ذلك يمكن القياس في سيكافا.

هسع بلة جابر لو مشى فرنسا واحترف في (موناكو)..ح يسأل برضو عن (الوجبة السريعة).

هو زول سأل منها في طيارة تعرضت للخطر ما يسأل منها في (موناكو).

كمان قالوا ليك ناس موناكو ديل عندهم (وجبات سريعة) حاجة ما بتخلص.

…….

عاجل : موسى الزومة الـلـه شافو من (سيكافتكم) دي.

[/JUSTIFY]

وإن طال السفر – محمد عبد الماجد
صحيفة قوون