بابكر سلك
بشه المدينة
> ولأن اللقاء في أرضنا
> يبقى نستر عرضنا
> تتساقط الالوان جميعاً تبجيلاً لالوان العلم
> تتوحد القلوب والهتافات تأكيداً على عظمة وطن
> تلتقي الحناجر في أهازيج النصر
> وتدمي الاكف تشجيعاً وإلهاباً للحماس
> إنه السودان
> مهما كان إنه السودان
> وليت سيكافا 2014 تكون انطلاقة للكرة السودانية الى منصات التتويج
> ليتها تصبح سبباً يبعث بالغيرة في نفوس الجميع
> لنحقق للوطن ما يستحقه
> ويا حلاة استاد تتضافر على مدرجاته
> جهود جماهير منتشية بسيكافا
> مع جهود جماهير حيرتها سيكافا
> مع جمود جماهير تحرك الغضب فيها سيكافا
> نتوحد ونبقى جمهور محب وقيافة
> اليوم كلنا في الاستاد من عصراً بدري
> لاجل دفع ضريبة وطن قدم لنا رقم وطني مجاني
> الشي الوحيد الذي يقدمه لنا وطننا بالمجان هو الرقم الوطني
> ولنرد الهدية بأجمل منها
> يجب علينا أن ننصر الوطن اليوم
> بأي شكل
> نحرز هدفاً نفرح له ونصفق ونهتف باسم من احرز الهدف
> يستوي عندنا جميعاً الامر
> سواء احرز الهدف عجب أم المدينة
> فعجب اليوم هو عجب الوطن
> والمدينة اليوم هي مدينة السودان
> لن ننظر للالوان تحت لون المنتخب
> يهمنا لون المنتخب
> يبقى نعمل العلينا ونشجع حتى آخر ثانية
> المهم
> وعلى ذكر فترة التنقلات
> اخوتنا الاهلة كالعادة كهربتهم زادت
> يبرطموا بي كلام لا في السما ولا في الواطة
> مرة يقولوا ليك بكري المدينة ما فاوض زول
> ومرة يقولوا ليك بكري المدينة جاتو عروض
> ومرة يؤكدوا ان علولو يسعى بين مفكوكيهم بالعروض المغرية
> هضربة وتناقض
> وسبب الهضربة هو اسواق الذهب في دبي
> جد لي وجد لي
> قروش تسجيلك بتجيك من سوق دبي
> لانهم يدركون جيداً ان جيمي الذي انتزع وارغو من الاهلي القاهري
> يمكن ان ينتزع الفتيل من القنبلة
> فتنفجر الاوضاع في المعسكر الازرق
> ويبدا بعدها روشا في هضربة من نوع جديد
> الحكومة تساند جمال لبشتنة الهلال
> البرلمان مفروض يناقش قصة جمال
> اساساً بشه كنا ما دايرين نجدد ليهو
> بكري المدينة ذاتو بجري ساي بدون تركيز
> نزار حامد رجلو واحدة وما بلزمنا
> وفطومة اختي تردح ليك في بشه
> اما رمضان فسيحدثنا عن اعمار اللاعبين
> وكيف ان بكري لعب في سنار مع صالح سنار
> وبعد داك يفتحوا ليك خط ساخن مع يوغندا
> جمال سالم ليس يوغندي وجوازه مزور
> فكي في كمبالا يوضح الحقائق ويكشف سر صد جمال لضربات الجزاء
> وبعد يزهجوا
> يرجعوا لي شكوى فيتا
> خداع للناس العبيطة
> في الوكت داك يكون بشه دخل التشكيلة
> ونزار عمل تمارين الصالة ونزل وزنو
> والمدينة بنكون علمناهو كيف يثبت الكورة وهو جاري
> أيها الناس
> التنقلات واللاعبون مطلقو السراح يقلقون ناس روشا شديد
> هلالابي قال لي ما همنا البجيكم مننا منو
> البمشي ليكم نحنا ذاتنا ما دايرنو
> وبي صراحة ما عندنا لاعب مالي عينا في المفكوكين ديل
> ولو سجلتو نزار ما هامينا
> واقول ليك
> اساساً نحنا كنا شاطبين بشه المدينة
> قلت ليهو ركز
> بشه المدينة ده منو ؟
> قمت تلخبط مالك يا اخوي
> بشه براهو والمدينة براهو
> قلت ليهو غايتو لو شلنا منكم نمرة اربعة حاتقعدوا اربعة يا اربعة
> واي فريق حايديكم اربعة
> قال بشه المدينة قال
> معز توماس كيف ؟؟؟
> اتير عبدالله كيف ؟؟
> مهند بويا وعبداللطيف الطاهر معاكم ؟
> سيدي بخيت وعمر بيه برضو ؟؟؟
> لخبط لخابيط يا عمك
> جيمي هبش الخزنة
> اجرووووووووووووووووووا
> أيها الناس
> ما ننسى اليوم منتخبنا
> وبعدين نحنا كمريخاب المنتخب ده بهمنا شديد
> التشكيلة لو طلعت متجانسة
> حانشوفها كلاكيت تاني مرة
> نفس التشكيلة
> كاااااملة
> بس بتتغير الفنيلة
> وسودانا فوق فوق فوق
> أيها الناس
> إن تنصروا الله ينصركم
> أها
> نجي لي شمارات والي الخرطوم
> كان شفت يا والينا
> زمان درسونا وقالوا لينا
> أسباب انهيار أي دولة أو مملكة كانت حاكمانا ومتحكمة فينا
> تفشي المحسوبية والضرائب الباهظة زي الحاصل اسي علينا
> لكن من خلال تجاربنا يا والينا
> قطع الكهربا والمويه هو البمرق المدينة
> يلخبط ليك حساباتها ويجتر احداثها الحزينة
> ولو مرقت المدينة بطش والينا
سلك كهربا
ننساك كيف ومع قطعت الكهربا بنسمع صدى هتافاتنا القديمة،،، بالدم بالروح ،،،أصبح الصبح.
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
