المشكلة في الناس البعرفوا وإلّا في العاملين فيها عارفين اي حاجة

لو مشيت الكهربة عشان تجيب ليك كهربة (زي كل خلق اللـه) وقلت تشتري ليك كهربة بـ (100) جنيه ح ينط ليك واحد من الصف الورا ويقول ليك احسن تشتري كهربة بـ (70) جنيه بس.

تبرع منو بقول ليك كدا.

في ناس بتبرعوا ليك بي مثل هذه النصائح يدخلوا ليك بين الرسالة وردها.

الرسالة الجاتك دي من منو؟.

وانت رديت قلت شنو؟.

الزول بقول ليك كهربة بـ (100) جنيه عاوز بيها شنو؟.

ليه انت عاوز توصل كهربة لي كينيا.

وكينيا يكون ما عندها اي علاقة بالموضوع.

زول ما عندك معاه اي علاقة لا بتعرفو ولا حصل قابلتو ولا شفتو في حتة…في داعي يقول ليك ما تشتري كهربة بـ (100) جنيه.

وما بعيد الزول المتداخل معاك في موضوع الكهربة هذا يعطيك محاضرة في التيار الكهربائي وما كانت عليه الهيئة القومية للكهرباء قبل ان تصبح فاتورة الموية وفاتورة الكهربة في فاتورة واحدة…وقبل ان يصبح سعر كيلو اللحمة على ما هو عليه الان.

هسع الدخل (اللحمة) مع الكهربة شنو؟.

والزول غالبا في مثل هذه المواضيع يعرج بيك الى مواضيع ما عندها علاقة بالموضوع الرئيس الذي كان اساس النقاش.

هسع انتوا تلقاكم برضو طلعتوا قرون (الاستغراب) حقتكم وقلتوا الموضوع دا علاقتو شنو بالكورة؟.

قعدتوا برة تستغربوا.

لكن في النهاية انا بثبت ليكم انو المواضيع دي عندها علاقة كبيرة بي الكورة حقتنا.

انتوا قايلين نحن قاعدين نتغلب ساكت.

الغلب دا ما من فراغ.

حتى (الهزيمة) في بلدنا دي عاوزة ليها (فهم).

الحاجة الوحيدة البنعملها بي فهم هي (الهزيمة).

يعني مازدا دا بلعب بي (خطة) جهنمية كدا تقضي بان يخسر اي مباراة للمنتخب بثلاثية.

خساراتنا دي فيها (نظام) يعني فيها فهم يعني عاوزة ليها تشكيلة معينة وخطة معينة وعدم اهتمام من الدولة والاتحاد العام بصورة معينة.

اصلكم ما بتقنعونا ليكم ان (التلاتات) دي صدفة.

لو في صدف بالطريقة دي كنا وصلنا كأس العالم.

اشمعنا (الصدفة) دي بس في الخسارة.

واللـه ديل لو قاصدنها ما كان جابوها بالنظام دا.

تلاتة كل مرة.

الصومال الما عندها منتخب ما قاعدة تعمل كدا.

الحاجات دي ما صدفة.

انتوا فاكرين ناس المريخ ديل بطيروا من دور الـ (64) من فراغ.

الموضوع مدروس.

وفيه نظام.

يلعبوا امام بايرن ميونخ.

يلعبوا مع بني ياس.

مع بنادير الصومالي.

في كل الاحوال بيطروا من دور الـ (64).

الموضوع دا بقى عندنا من الثوابت ولا عاوز ليه غلاط.

تعسكروا هنا.

تلعبوا في سيكافا.

تتدربوا في المانيا انجلترا البرازيل.

ح تجوا تطيروا من (التمهيدي).

ح تطيروا يعني ح تطيروا.

والمنتخب نفس الشيء.

نلعب في التصفيات.

نلعب في النهائيات.

نلعب في الكان.

نلعب في الشأن.

الثابت في كل هذه المنافسات اننا بنخسر 0 / 3.

الحاجات دي عندها علاقة بالتدهور العايشين فيه دا.

ما منطقى ولا مقبول ان يكون كيلو اللحمة بـ (80) جنيه وما نتغلب تلاتة.

الزحمة الحاصلة في الشوارع دي وقفلة الكباري عندها علاقة بالهزائم البتحصل لينا في كورة القدم.

قطوعات الكهربة.

الحوار الوطني.

ازمة الغاز.

كل هذه الاشياء عندها علاقة بالهزائم البتحصل في كورة القدم.

الزول القبيل بتاع الكهربة البقول ليك ليه تشيل كهربة بـ (100) جنيه بتجي تكتشف في الصف انو شال كهربة بـ (400) جنيه.

ومستكتر عليك كهربة بـ (100) جنيه.

لو مشيت (المقابر) في تشييع احد الراحلين الى الدار الاخرة.

بتلقى ليك زول جاء المقابر ما عشان يحفر.

ولا عشان يدفن.

ولا عشان يكسب ليه اجر كبير.

ولا مجاملة ومساندة لاهل الميت.

في زول بكون جاء المقابر مخصوص عشان يقول للناس البحفروا في المقبرة (ود اللحد) دا ضيق وسعوه شوية.

انت مالك؟.

بس دا البتعرف ليه.

اذا كان الدفن ليلا نفس الزول بتلقاه واقف وبوجه في الناس الشايلة كشافات الاضاءة.

يا جماعوا ارفعوا الكشافات دي شوية.

وقبل ما يبدأوا في حفر المقبرة بتلقوه قال للاولاد لخوا ليكم (طين).

بس زول قاعد ينظر بس.

ما فيه اي فايدة.

امشي الاستاد.

ادخل اي مباراة.

ح تلقى نفس الزول.

الزول دا يلقى (بلة جابر) في تشكيلة المنتخب يقعد يجوط ..يقول الليلة ح نتغلب تلاتة.

يا جماعة بلة دي في المريخ كورتو في الكشافات.

في المنتخب كورتو ح تمشي وين؟.

نفس الزول يلقى بلة جابر برة تشكيلة المنتخب يقعد يجوط ويعترض بي نفس اللـهجة.

هي البلد دي فيها طرف يمين افضل من بلة جابر.

يمين بلة ما يلعب تتغلبوا تلاتة.

طبعا الرجل بكون صادق في الحتة دي عشان المنتخب في وجود بلة جابر وفي عدم وجود بتغلب تلاتة.

لذلك الرجل مساك لينا في (التلاتة) دي بي كرعينو وايدينو.

الحاجة الوحيدة القاعدة تصدق في البلد دي (تلاتة) مازدا.

ناس الارصاد الجوي يقولوا ليك الاسبوع دا ح يكون كله امطار.

ما نشوف لينا اي مطرة.

ناس التخطيط يقولوا ليك ح نفتتح الكوبري الاسبوع المقبل.

ما يفتتحوه.

ناس الاسعار بقولوا ح تنزل.

ما بتنزل.

مازدا دا يقولوا بتغلب تلاتة.

بتغلب تلاتة.

دي الشيء الصادقين فيها.

دي الفالحين لي فيها.

يقولوا ليك المدارس ح تفتح بداية الاسبوع.

ما بتقتح.

الماهية اول الشهر.

ما بتصرف.

مازدا بتغلب تلاتة.

يبقي ح يتغلب تلاتة.

كلمتهم دي ما بتراجعوا منها.

كلمة واحدة لكن في الخسارة فقط.

يا جماعة.

يا ناس الاتحاد العام.

مازدا دا لو استمر في المنتخب ولو وقعتوا معاه عقد جديد ، اشترطوا عليه في العقد حاجة واحدة.

اشترطوا عليه ما يتغلب تلاتة.

بس تاني ما عاوزين منو شنو؟.

يتغلب اربعة.

يتغلب خمسة.

يتغلب نص دستة ما مشكلة.

بس ما يتغلب لينا تلاتة.

عشان نحن جاتنا عقدة رسمية من (التلاتة) دي.

فترنا ونفسنا اتقفلت.

اتذكرت لي موضوع.

عندنا زول قدر ما تمشي ليه تلقى بيأكل ليه في (قرع).

تمشي ليه ساعة الفطور بتلقاه بياكل ليه في (قرع).

تمشي ليه ساعة الغداء بتلقاه بيأكل ليه في (قرع).

تمشي ليه ساعة العشاء يتلقاه بيأكل ليه في (قرع).

تمشي ليه في وقت ما وقت اكل برضو بتلقاه بيأكل ليه في (قرع).

واحد من ناس الحلة مشى ليهم يوم قافلة معاه.

مشى لي اهلو طوالي.

قال ليهم انتوا تعالوا هنا لو ما قادرين تغيروا (القرع) غيروا لينا (الزول) دا.

ما معقولة يبقى علينا الزول دا والقرع.

هسع انتوا يا ناس الاتحاد العام لو ما قادرين تغيروا لينا (التلاتة) غيروا لينا (مازدا).

ما تبقى علينا حكاية (القرع).

مازدا وتلاتة.

….

ملحوظة : البامية المفروكة دي مالها عيبوها لي.

هوامش

الكاردينال جاب بص الهلال.

الكاردينال اشترى بيت للاعبي الهلال.

الزول دا شكلو ناوي يقعد.

شكلو ناوي يستقر يا صلاح ادريس.

عشان كدا احسن تركز في (التلحين).

لكن الكاردينال لو ما نجح في التسجيلات القادمة واعاد قيد لاعبي الهلال المفكوكين مع اضافة نجوم قادرة لاحداث الفرق في الهلال بصات الولاية دي كلها ما بتقعدو.

الامتحان الحقيقي للكاردينال في التسجيلات القادمة.

نحن ليس من انصار المحترف البرازيلي.

محترف برازيلي ممكن ينجح في دول الخليج عشان الامكانيات هناك جيدة.

لكن في السودان ملاعب رديئة وتحكيم صعب وضرب في الرقبة يبقى من المستحيل نجاح لاعب برازيلي.

لذا الاتجاه نحو اللاعب الافريقي.

نحن لاعب عربي ما بنفع معانا.

ولا بنجامل.

ولا بنكضب.

التسجيلات قريبة..والكاردينال في الانتظار.

………..

عاجل : الضحية السنة دي مازدا.

[/JUSTIFY]

وإن طال السفر – محمد عبد الماجد
صحيفة قوون