الكـــارديـنـــال بلـعــب عــلى تقيــل

نفسي اعرف علاقة ام دوم شنو بي سيكافا؟ عشان يقوموا يكرموا جمال الوالي بمناسبة فوز المريخ ببطولة سيكافا.

علاقة جمال الوالي ذاتو شنو بفوز المريخ ببطولة سيكافا؟.

الان المريخاب تركوا فريق الكورة وتركوا (سيكافا) ذاتها وقعدوا يكرموا في (جمال الوالي).

بانوا على حقيقتهم.

انكشفوا.

نحن من البداية عارفين الموضوع ما موضوع المريخ.

الموضوع جمال الوالي.

الجماعة الشفوت ديل دخلوا لينا من غير مناسبة كدا (ام دوم) عشان موضوع التكريم يبقى شرعي – وام دوم ما عندها اي علاقة بالموضوع دا.

ام دوم كلها هلالاب البخليها تكرم جمال الوالي شنو؟.

ناس ام دوم ذاتو حاجات زي دي ما عندهم ولا بعرفوها.

مجدي شمس الدين ولدهم ما كرموه البخليهم يكرموا جمال الوالي شنو؟.

في سبيل جمال الوالي ناس المريخ ممكن بكرة يقولوا لينا (فداسي) تكرم جمال الوالي.

وابوروف تكرم جمال.

وشندي تكرم جمال الوالي.

المسلسل دا ح يستمر كتير وح نشوف منو عروض كتيرة.

جماعتكم ديل فكوا المريخ …وبقوا مركزين في جمال الوالي.

نسوا المريخ بشكل نهائي وركزوا في جمال الوالي.

بقوا ما قاعدين يجيبوا سيرة باسكال او ضفر او بلة جابر.

ما في زول جايب خبر للجماعة ديل.

التكريمات كلها من نصيب جمال الوالي.

برهان تية ومحسن سيد ما في زول شغال بيهم.

ولا في زول بجيب سيرتهم او بقول ليهم انتوا بتعملوا في شنو يا جماعة؟.

الجماعة شغالين بـ (جمال الوالي).

هم اصلهم عارفين البطولة دي لا جدوى منها عاوزين بس يرفعوا بيها معنويات جمال الوالي ساكت.

عارفين البطولة ما عندها قيمة لذلك تكريم برهان تية او محسن سيد ما فيه اي منطق.

احسن يستغلوا المناسبة ويقوموا يكرموا جمال الوالي.

عاوزين يرفعوا بيها من قدر جمال الوالي.

بيرضوا فيه.

لذلك يتم الان هذا (المط) الاعلامي من اجل فقط جمال الوالي.

ناس جمال فرفور وانصاف مدني وصباح عبداللـه ديل ما بغنوا للمريخ.

ولا هم مقتنعين من الاساس بي سيكافا.

كل هذه الاشياء من اجل جمال الوالي.

جمال فرفور يمشي المطار.

ويمشي الاحتفال.

ويقعد يقول ليه في تصريحات شتراء متل اغنياته كل هذه الاشياء من اجل جمال الوالي.

جمال فرفور لو ما جمال الوالي المطار لو كان مسافر فرفور شخصيا ما بمشي ليه.

عاوزنو يمشي المطار للمريخ.

كل هذه الاشياء فقط تتم في المريخ من اجل جمال الوالي.

ناس المريخ في احتفالاتهم دي ..ومهرجاناتهم لو سألتوهم الحاصل شنو؟..بكونوا ما عارفين حاجة.

بكونوا نسوا الموضوع الاساسي.

الجماعة ديل الشيء البتذكروه الان هو انهم بس عاوزين يكرموا جمال الوالي هذا كل ما تبقى لهم من (سيكافا).

في المريخ بتحصل اغرب الحاجات.

ديل قبل كدا اخترعوا ليهم (كضبة) دولية كدا.

دوروا ليك في النت وخططوا الموضوع مع مصطفى اغا.

عشان شنو؟.

عشان يطلعوا ليك جمال الوالي الاكثر شعبية في الوطن العربي بين رؤساء الاندية في الوطن العربي.

هم العرب ديل ذاتهم ما بعدونا مع العرب ولا معترفين بينا (ونحن ذاتو ما معترفين بيهم) يجوا يطلعوا ليكم جمال الوالي الاكثر شعبية بين رؤساء الاندية في الوطن العربي.

ناس الاهلي المصري نادي القرن النادي الذي يشجعه اكتر من (50) مليون نسمة في مصر والوطن العربي والذي يحقق في الموسم الواحد اكتر من (3) كاسات محلية وافريقية رئيسه ما يفوز.

يفوز جمال الوالي الفرحان بي سيكافا.

رئيس الاتحاد السعودي الذي كان يقدم فريقه في السنوات الاخيرة اجمل العروض رئيسه ما فاز رغم ان السعوديين (النت) عندهم في الشارع والتصويت اسهل عندهم من شراب الموية.

مع ذلك رئيس نادي الاتحاد السعودي ما فاز فاز جمال الوالي الذي يفوز فريقه كل (6) سنوات مرة بالممتاز.

الجماعة ديل في مسرحية) كدا قالوا جمال الوالي الرئيس الاكثر شعبية في الوطن العربي.

وجابوا الاهلي المصري اكمالا لهذه المسرحية.

ودفعوا من اجل احضار الاهلي المصري للخرطوم اكثر من مليار جنيه سوداني.

وصدقناهم.

جمال الوالي الاكثر شعبية في الوطن العربي..ونحن مقتنعين مية المية ان جمال الوالي لو صوتوا ليه في العرضة جنوب براهو ما بجي الاول.

عاوزين تجيبوه الاول في الوطن العربي في وجود الهلال السوداني والاهلي المصري والاتحاد السعودي والهلال السعودي والاتحاد الليبي والترجي التونسي.

اتخيلوا ناس الترجي التونسي طلعوا (فشوش).

يا جماعة جمال الوالي دا مع رئيس الخرطوم الوطني ورئيس النسور ورئيس اهلي شندي ما بنافس.

عاوزنو ينافس ليكم مع الهلال والترجي والزمالك والاتحاد والوداد.

زول فريقو بلعب مع ناس اتراكو والبوليس وبنابير وعزام يفوز في الشعبية على رؤساء الترجي والاهلي المصري والاتحاد السعودي.

المسرحية التانية.

ناس المريخ ديل عملوا ليهم ملعب رديف…الموضوع عادي ما فيه اي بطولة ولا محتاج ليه اي احتفال.

المريخاب سربوا اعلاميا ان الملعب الرديف سوف يطلق عليه اسم جمال الوالي.

اول مرة زول يعمل ليه ملعب وهو رئيس النادي المناط به ان يفعل ذلك يقوم يطلق اسمو على اسم الملعب الرديف الذي كان في عهده.

هسع في الهلال في زول بجيب سيرة الملعب الرديف او سيرة اسمو.

اقيفوا انتظروا بقية المسرحية.

انتظروا.

المسرحية لسه فيها فاصل تاني.

الحكاية دي كلها عارفين عشان شنو؟.

عشان جمال الوالي يظهر في صورة البطل مرة اخرى ويقوم يرفض اطلاق اسمه على الملعب الرديف.

يظهر على اساس انه زاهد في الاسم.

طيب يا جمال الوالي انت من البداية وقت رافض تسمية الملعب على اسمك اللفة الطويلة دي على شنو؟.

عشان بس يقولوا جمال الوالي اتنازل من اطلاق اسمه ليطلق عليه اسم مهدي الفكي.

يا سلام.

حاجة جميلة.

حاجة رائعة.

ايه الوفاء؟.

ايه الاخلاص دا؟.

ايه العظمة دي؟.

كان من البداية من غير ان يطرح اسم جمال الوالي على الملعب الرديف كان يمكن اطلاق اسم مهدي الفكي من البداية على الملعب الرديف.

بدل اللفة الطويلة دي.

اللفة دي اصلا ما كان في داعي ليها.

الحركة دي كلها عشان بس يقولوا جمال الوالي رفض تسمية الملعب باسمه وتفضل واطلق اسم مهدي الفكي على الملعب الرديف.

دي كلها (مسرحيات) قديمة وبائخة والناس شافتها قبل كدا.

والناس كاشفها.

يمكن المريخاب ما اتعودوا يقولوا للوالي مثل هذه الحقائق.

لكنهم هم قبل غيرهم عارفين المسرحية.

عاوزين بس يمشوا مصالحهم.

عاوزين يأكلوا عيش.

عشان كدا ممكن يطلعوا لينا جمال الوالي الاكثر شعبية في الوطن العربي.

وممكن يطلعوا لينا سيكافا بطولة كبيرة وذات قيمة.

وممكن يعتبروا لينا ان جمال الوالي تنازل عن تسمية الملعب باسمه من اجل رئيس المريخ الراحل مهدي الفكي.

خلاص الحاجات دي فترنا من الكتابة فيها.

بقت مكشوفة.

ومعروفة.

ومفروض تعرفوها براكم من غير ما يقولوها ليكم.

يعني حكاية ام دوم تكرم جمال الوالي حكاية لا بتدخل ليها في رأس زول ولا حاجة.

ولا تتعبوا ساكت عشان تقنعوا بيها الناس.

ولو الناس اقتنعوا ليكم بيها تأكدوا بمشوا فيكم ساكت.

بغشوكم.

…….

ملحوظة : باسكال قالوا الايامات دي حارس تلفونو ومنتظر مكالمة من الهلال.

هوامش

باسكال قال شوفوا لي (خليفة) يتوسط لي عند مبارك سليمان.

زولكم العاجي (الهراج) دا من سمع بي المبلغ الخرافي الذي سوف يحصل عليه الهلال من الشركة الراعية زولكم غلبتو القعدة.

قلنا ليه يا باسكال لكن انت ما مفكوك.

باسكال اتبرع من نفسو وقال بفسخ العقد.

يا زول انت لو مفكوك ما عاوزنك في الهلال كمان عاوز تفسخ العقد.

غايتو ناس خليفة ديل إلّا يشوفوا ليك طريقة في (الرديف).

لكن سنك كبيرة.

يا زول نهايتو كدا انت ما عندك طريقة معانا.

ابعد مننا.

يستحق اشرف الكاردينال التحية على هذا المبلغ الضخم الذي سوف يعود للهلال من رعاية احدى الشركات الاماراتية للهلال.

طبعا انا الى الان ما مصدق الكلام.

منتظر الموضوع يبقى حقيقة في الواقع.

وتعالوا لينا بعد كدا.

جماعتنا ديل (30) الف دولار خلتهم يعملوا كدا.

ديل لو جاتهم (3) ملايين دولار ح يروحوا فيها.

ولا بستحملوا حاجة زي دي.

بس خلوا الهلال يستلم المبلغ وتعالوا شوفوا ح نعمل شنو؟.

ما تضيقوا.

خلوا الموضوع يكتمل.

في مصر ناس الزمالك كل مرة بتفاصحوا.

وكل مرة يتحدوا ويسجلوا.

ومرتضى منصور يزحم الفضائيات والصحف بالتصريحات.

ويجي في النهاية الاهلي يفوز.

حركات الزمالك زي حركات ناس المريخ.

دوشة ساكت.

مفروض ناس الزمالك ديل يشاركوا في سيكافا.

شكلهم بقى سيكافا سيكافا.

……..

عاجل : قال ملعب رديف قال.

[/JUSTIFY]

وإن طال السفر – محمد عبد الماجد
صحيفة قوون