بابكر سلك
سيد الكل
> ننتصر بحول الله
> لانه لا يصح الا الصحيح
> والصحيح هو ان يتقدم المريخ ركب الممتاز
> فالمريخ بطل سيكافا
> والممتاز في السودان
> والسودان في سيكافا
> يبقى بطل الكل بالتأكيد هو بطل الجزء
> سيد الكل
> سيد جميع اندية منطقة سيكافا
> والما عاجبو يهاجر
> يطلب لجوء في غرب افريقيا
> او يمشي استراليا بالبحر
> او هولندا عن طريق بلجيكا
> المهم يقطع وشو من المنطقة
> المنطقة دي مقفولة
> منطقة سيكافا مقفولة للتيم القيافة
> ما بنقبل اي وصافة
> سيد الكل
> راجي وعلولو ما مشو
> وما فارقة
> لانو اي حداشر يمثلوا سيد الكل
> ببقوا زي الفل
> المهم
> السلاطين حا يستمتعوا
> فالفاشر هي ارض السلاطين
> ونحن سلطان وسط وشرق افريقيا
> سلطان سيكافا
> والسلطان ليهو حاشية
> وحاشيتنا في سيكافا
> هي جميع اندية الممتاز السوداني
> ديل المقربين لينا
> وسمعت قالوا في ناس من حاشيتنا برضو ماشين الفاشر
> حايقابلوا حاشيتنا الفي الفاشر
> حاشيتنا من امدرمان حاتقابل حاشيتنا الفي الفاشر
> دوري الحاشيات السوداني
> وعشان الفاشر ما تزعل مرتين
> الليلة عليها وبكرا ليها
> فاشر السلطان يا عمك
> دي لغة سلاطين بنفهما لاننا سلاطين سيكافا
> نتمنى لاهلنا في الفاشر مباريات جميلة ومشوقة
> بالذات هم في انتظار بطل سيكافا للاحتفال به
> المهم
> نحنا ما دايرين اتفاقية جنتل مان
> الحشاش يملا شبكتو
> لاننا واثقين مافي سلطان ببقى حاشية
> ولكن الحاشية تحلم بان تكون ضمن السلاطين
> فالحاشي العاجبنا بنرفعوا
> والحاشي الما عاجبنا يفضل ضمن الحاشية
> نصيبو كده
> بعدين القصة قصة كاش
> والكاش ان فات السلطان يبقى ما كاش
> يبقى وعود وشيكات ساكت
> وقريباً حانقرأ
> جاب قروشو من وين
> يا ناس البرلمان اتدخلوا
> الحقونا
> البحر شال اولادنا
> وبحر السلطان غريق يا روشا
> المهم
> اذا في زول من الحاشية فكرنا فيهو
> بنأخر الموضوع ده لحدي ما عقوبات الكاف تطلع
> عشان ما نشتري الترماي
> باقي الحكم كانوا ساكنوا ستة
> والستة طالعين فك تسجيل
> اخير نصبر
> لو وقف الحاشي ما بلزمنا
> ولو نفد بي جلدو
> يبقى زولنا تب
> وكان طالت العقوبات النادي
> ده ما شغلنا
> ده شغل عصمت سيد الشعار
> أيها الناس
> قرينا نيمار يتألق
> ده دليل على انو الخزينة فاااااضية
> قروش تسجيل مافي
> والدليل التاني
> وكيل اللاعبين نطه
> ده مقدمات الفلس الرهيب
> بيع المويه ما بدور نادي يا ناس
> المهم
> نتمنى ان تتواصل انتصارات سيد الكل
> لانو ده الوضع الصاح
> أيها الناس
> إن تنصروا الله ينصركم
> اها
> نجي لي شمارات والي الخرتوم
> والينا
> انت الكهربا مالها ؟؟؟
> الكهربا دي ضمان بتكهرب الجو
> ولو الجو اتكهرب القصة بتبقى ما قصة محروقات
> ولو القصة بقت ما قصة محروقات
> بتجوط يا والينا
سلك كهربا
ننساك كيف واحتمال نرجع للرتينة
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
