بابكر سلك
راشد جايينا بالسارينا
> قال سنهدي البطولة للمريخ
> هديتك مقبولة يا مولانا
> لكن شوفها مشت وين
> لكن بصراحة
> شكل المباراة كان افضل كثيراً من شكل مباراتنا في مدني
> برغم ان الهلال اعتاد ان يلعب بالهجمة المرتدة دوماً
> وهي طريقه توضح ان القناعة عند ناس الفريق واضحة
> الثقة في النفس قليلة
> القناعة بالثغرات كبيرة
> لذا
> نطفشها ويسكها الحصان
> ودي طريقة بنهار بها الفريق الذي يلعب بها
> اذا كان للخصم مدرب بفهم كورة
> والكلام ليك يا محسن
> الطريقة دي بتقدر عليها عارفك
> خلي ليها بالك
> أيها الناس
> شفتوا الطريقة التي احتفل بها بكري المدينة بهدفه ؟؟؟؟
> انا خلوني
> انتوا رايكم شنو ؟؟؟
> أيها الناس
> كرة القدم هي لعبة اخطاء
> لذا اخطأ مدافع الفاشر وقدم هدية لكاريكا
> واخطأ مهاجم الامل واحرز في مرماهو
> واخطأ مدافع الامل في هدف بكري
> واخطأ مرتضى في هدف نيلسون الفندق
> واخطأ الطاهر حماد في اهدار ثلاثة اهداف مضمونة
> ملاحظين
> كل الاخطاء يستفيد منها ابو الهل
> زي اخطاء الحكام
> سؤال بسيط
> لماذا لم يقم مدرب الامل بتغيير الطاهر حماد منذ الشوط الاول ؟؟؟؟
> والطاهر حماد ينقذ الهلال من تلاتة اهداف مؤكدة
> الخطأ الوحيد الذي لم يستفد منه الهلال
> هو اعطاء اللجنة مرتضى جائزة نجم المباراة
> المهم
> مستوانا يوم مدني كان ما مستوانا
> برانا بنعرف مستوانا
> والكلام ده ما فايت علي برهان ومحسن
> وما بتفوتو الجماهير تاني يا كوتش
> صناعة اللعب
> او تكتيك لصناعة اللعب هو المطلوب
> وصابرين يا كل الغنا
> في الاستوديو التحليلي تحدث الكوتش الريشة حديث العارف
> وجل من لا يخطئ
> الريشة برضو اخطأ
> واستفاد من الخطأ برضو الهلال
> الريشة قال الهلال فرق من باقي الاندية
> الصحيح ان الهلال زي باقي الاندية
> عدا المريخ
> الهلال مازيو ولا المريخ زي الهلال
> لكن الهلال بشبه الباقين
> زي هلال ام صفقاً عراض ونيل الكوة وود حامد سنار
> كلهم بتفقوا في انهم دولياً ما ليهم انجاز ولم يتجاوزوا المجال
> طبعاً الكلام ده عدا المريخ الجوي
> المريخ الجوه المطار ما بره مع امجاد جمب جاد
> المهم
> امس الأول لعب مازيمبي ضد وفاق سطيف في ابطال افريقيا
> وأمس فيتا قابل الصفاقسي
> والجماعة راجين الشكوى
> والكاف يجتمع بدون ما يجيب سيرة للشكوى
> زي الزول لما يقول ليك كلام فارغ
> او كلام ما منطقي
> تقوم تعاين ليهو وما ترد عليهو
> الكلام ما بستاهل رد
> فهل شكوى الهلال فارغة لدرجة يصهين الاتحاد الافريقي من الرد عليها ؟؟؟؟؟
> بس اوعه يعاين الكاف لابي الهل بي قعر عينو
> المهم
> نشاط كبير داخل اروقة مناشط المريخ
> وهنا لا يفوتنا ان نشكر الشفت ود عقيد
> ود عقيد دعم تسجيلات السلة بي عشرين مليون بالقديم
> بل تعهد انابة عن شفوت الرياض بمرتب مدرب السلة شهرياً
> وما غريبة على ود عقيد ولا غريبة على الشفوت
> فرابطة الرياض اقامت احتفالاً بسيكافا على قدر من القيافة
> ورابطة المريخ بالمهجر كلو يوم تؤكد اصالة الانتماء و عمق الولاء وعبق الوفاء
> التحية لهم جميعاً
> المهم
> المناشط تفكر في اقامة بطولة للمناشط بمجمع المناشط بالنادي
> سلة ويد وتاكوندو و كاراتيه وعرض مصاحب للجمباز ومباريات للرائدات
> تفعيلاً للنشاط واثباتاً لريادة المريخ وسيادته الرياضية في جميع المناشط
> وحفل يحيه النصري «سيدا» لصالح المناشط
> مهرجان يستمر عشرة ايام
> يخلق ترابط وتفاعل ونشاط
> أيها الناس
> إن تنصروا الله ينصركم
> أها
> نجي لي شمارات والي الخرتوم
> كان شفت يا والينا
> الواتس جاب لينا
> حكاية دكتور راشد السوداني المننا ولينا
> الاكتشف علاج للايدز من اعشاب قايمة في وادينا
> لو صحت الاخبار يا والينا
> يبقى راشد للخير جاب لينا
> وصحا روح البحث فينا
> وده الموضوع الداير نشر يا والينا
> وراشد الباحث الفينا
> بستحق هيلمانة وقومة وقعدة ومليون سارينا
> اصلوا بستحق السارينا يا والينا
> البعمل خيراً فينا ولينا
> وبرفع راس وطنا عالي نفتخر بيهو ويفتخر بينا
سلك كهربا
ننساك كيف وكلو ما نسمع سارينا نقول بختنا راشد جايينا تطلع سارينا عشان تقفل الشارع لي زولاً لسه في الحمام بعد ساعة بجي بي هنا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
