بابكر سلك
هلال الفاشر وهلال الفاشل
> قدمت الدعوة لصديقي الهلالابي وليد البشرى
> قلت ليهو يا ولي عازمك كورة
> قال لي كورتكم ما بدخلها
> قلت ليهو كورتنا ما تدخلها
> ادخل كورة هلال الفاشر
> وشجع هلال الفاشر
> يمكن تلقى ليك بليلة مباشر
> اتفكفك من هلال فاشل
> هلال تمنية وتمنين سنة فاشل في تخطي محطة الصفر
> هلال تمنية وتمنين سنة فاشل في تسجيل اسمه في لوح الشرف الافريقي
> هلال تمنية وتمنين سنة فاشل في امتلاك شعار
> هلال تمنية وتمنين سنة فاشل في احراز بطولة جوية
> هلال تمنية وتمنين سنة فاشل في دخول المطار
> فالح بس في القعاد بره جمب جاد مع امجاد
> ايها الناس
> التراس الهلال لفت نظر الناس لي حكاية عجيبة
> ولا احد يتشكك في ولاء التراس الهلال للهلال
> لذا يفترض ان يقف الاهلة عند كلمة الالتراس
> قالوا انهم يرفضون التدخل الصحفي في الشأن الفني
> يعني في تدخل صحفي في الشأن الفني
> ودي جديدة
> وغريبة
> وبذا تؤكد ان هناك خللاً في مجلس الست
> ومجلس الست هو المجلس الذي تديره ست شخصيات
> او هكذا افهم من العبارة التي اطلقها كبوتش
> ولا ما كده يا كبتشه ؟؟؟
> المهم
> كيف يسمح مجلس الهلال بالتدخلات الصحفية في التشكيل ؟؟
> وهل سبقه مجلس بالسماح بالتدخلات الصحفية في التشكيل ؟؟؟
> ولماذا يسمح مجلس الهلال بالتدخلات الصحفية في التشكيل ؟؟؟
> وماهو دور التدخلات الصحفية في الانتخابات الاخيرة ؟؟؟
> وهل تضر التدخلات الصحفية بالتشكيل ؟؟؟
> ام تفيد التدخلات الصحفية في التشكيل ؟؟؟
> ماهي علاقة روشا بتلك التدخلات الصحفية في التشكيل ؟؟؟
> وهل فطومة اختي لها تدخلات صحفية في التشكيل ؟؟؟
> الحكاية خلي بالك دايرة ليها رأي ورأي آخر
> لفوا الطبق وارجونا
> ابقوا معنا
> لكن القصة فيها فوضى
> المهم
> انهزم اهلي عطبرة بالتلاتة من الهلال
> لان اهلي عطبرة ضعيف فنياً بالمقارنة بالهلال
> يبقى عرفتوا ليه انهزم الهلال بالتلاتة من المريخ ؟؟؟؟
> المهم
> اتوقع سهرة رائعة في مباراتنا ضد هلال الفاشر
> سنخرج مبسوطين زي ما خرجنا يوم مباراتنا ضد هلال الفاشل
> فنحن تبقى لنا فقط هلالان
> نغلبهما ونكون غلبنا اي هلال في البلد دي
> الهلال الاحمر وهلال الجربوكس
> وحاندخلهما في قائمة شهداء موسم 2014
> إن شاء الله
> ايها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> ضاقت بينا
> حلوها لينا
> يا الشجرة يا والينا
> تحس بينا
> وتتألم لينا
> وتتحلل ترد دينا
> وتحلها لينا
> يا والله يا والينا
> في شجرة بالحبل تلقونا معلقين لينا
> مدلدلين الهواء ضارب رجلينا
> صورتنا كبيرة في الدار في الصفحة الاولى يا والينا
> والدار تترحم علينا
سلك كهربا
ننساك كيف والناس بسبب الشجرة بقت تتعلق في الشجره وتتدلدل مرتاااااااحة
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
