احذروا الفخ يا صفوة

* يعلمون أن جماهير المريخ حانقة على من دمروا إستادها، ويدركون أن السيطرة على الآلاف التي تشهد مباريات القمة صعب، إن لم يكن مستحيلاً في ظل الطريقة المتخلفة التي تتبع لحفظ الأمن في ملاعبنا.

* يعلمون ذلك جيداً، ويعلمون أن تحويل المباراة قد يدفع المتشنجين من أنصار المريخ إلى محاولة الرد بالمثل، ومع ذلك أصروا على إلغاء قرار اللجنة المنظمة ووجهوا بإقامة المباراة الحاسمة والحساسة التي تحدد مصير أكبر بطولة كروية في إستاد الهلال!

* لماذا؟ الإجابة تؤكد أن من يصرون على اللعب بالنار يريدون للنار أن تشتعل، ويرغبون في توريط جماهير المريخ في شغبٍ يجب ما قبله، ويعفي الاتحاد من حرج العجز عن إلزام الهلال بدفع فاتورة شغب جماهيره البالغة نصف مليون دولار!

* يريدون جر جماهير المريخ إلى الشغب، ويتعمدون صب الزيت على النار لحاجةٍ في نفس يعقوب.

* لذلك نوصي الصفوة بأن تتجنب السقوط في الفخ المنصوب بإحكام، وأن تمارس أقصى درجات ضبط النفس في اللقاء المقبل، وألا تهدر حقوق ناديها بأي سلوكيات غير مسئولة.

* الخاسر الأول من أي شغب يحدثه أي متشنج يخرج عن الخط هو المريخ وليس سواه.

* أي سلوك عنيف سينعكس وبالاً على النادي الأحمر، فخذوا حذركم من الفخ المنصوب بإحكام يا صفوة.

* نحيي مشجع المريخ الكبير بشرى الصوفي الذي ألف قصيدة جميلة دعا فيها إلى تحكيم صوت العقل وحض الصفوة على التمسك بالتشجيع المثالي وقال فيها: (أستاذنا يا المريخ تب ما بنشتم زول.. أخلاقنا في القرآن والسنة لينا أصول.. أخلاقنا في التقوى وفي قلبنا المأهول.. أخوانا في الله وصونا بالمأمول.. الصفوة تعني صفا.. واللفظ يكون مغسول.. الحب تكون طيب والحب يكون مشتول.. السنبلة الصفوة والوالي زي قندول).

* الانضباط وجب.. والصفوة لا تعرف الشغب.

* شغبنا حده خطوط الملعب!!

تاني جابوا مدرب!!

* عداد الجهاز الفني للوصيف رامي قدام!

* في الهلال.. كل يوم مدرب جديد!

* حتى يوم أمس كان الجهاز الفني للوصيف مكوناً من: النقر (أخوان).. شوقي عبد العزيز.. فوزي المرضي.. عاكف عطا.. محمد الفاتح.. قلة.. ياسر كجيك (مدرب الحراس)، البرازيلي جوزيه (مدرب اللياقة) وآخرين!

* امس حسن عبد الرحيم قال العدد وصل 13 مدرب!!

* هذا بخلاف جيش المدربين الحقيقيين.. من الصحفيين!!

* (المدربين يجقلبوا.. والتشكيلة عند ناس الرشيد وفطومة)!!

* معقولة يا حبان؟ ديل كلهم لي محسن وبرهان؟

* خبر عاجل: الهلال يخصص المدرج الشمالي للجهاز الفني!!

* الوصيف لن يحتاج إلى مشجعين في مباراته مع الزعيم!

* من ناحية جمهور تب ما تشيلوا هم، المدربين براهم بسدوا الفرقة!

* جهزوا ليهم الطبول والأعلام.. يشجعوكم تشجيع تمام!

* أمس كمان قالوا جابوا مدرب برتغالي!

* ألحق يا كابو.. الوصايفة استعانوا بالاتحاد الأوروبي!!

* كلو من قلع الضفر وأيمن الغشاش وراجي المكار!!

* ضربناهم تلاتة جابوا 13 مدرب.. واستنجدوا بالأوربيين!

* كان بقت مازيمبية كان جابوا القيادة الشمالية؟

* عدد المدربين بقى أكتر من عدد اللاعبين والمشجعين!

* البلجيكي باتريس أوسيم آخر المنضمين لجيش مدربي الوصيف، ويتردد أنه سيصل برفقة كردنة اليوم!

* الطائرة الماليزية ظهرت!!

* تعرف يا كابو.. الجماعة ديل عشان نكفي بلتون المدربين بتاعهم ده إلا نلعب معاهم بطريقة المسرحيات!

* لقاء الزعيم مع الوصيف الخفيف.. (الخميس والأيام التالية)!

* تدريب الوصيف بقى زي مسرحية (النظام يريد)!!

* عشان ندي كل مدرب فرصة يضع بصمتو إلا نلعب معاهم الكورة في شهرين!!

* يوم للنقر أخوان، ويوم لشوقي، ويوم لفوزي، ويوم لقلة ويوم لعاكف ويوم لمحمد الفاتح ويوم لأوسيم!

* البرازيلي جوزيه وياسر كجيك ديل بنلمهم في يوم واحد!

* البلجيكي الجديد حا نختو في آخر الأسبوع.

* سارع بحجز التذكرة لحضور (العروض الأخيرة.. لمسرحية تدريب الوصيف الخطيرة)!

* الوصيف جيش مدربين.. والكورة زي الطين!!

آخر الحقائق

* نفرة مدربي الوصيف مستمرة!

* قالوا أي لاعب هلالي قديم نفض فنيلتو وجا الإستاد!

* الما بدرب الهلال الأيام دي تاني ما بدرب!

* الدعوة مفتوحة.. لا تدعوا الفرصة تفوتكم!

* مطلوب من مدربي الداخل المسارعة لتلبية النداء الأزرق!

* الدعوة مقدمة لأبناء الوصيف في الخليج.. ناس منقستو والتعايشة وجميل ودي نيلسون!

* يا جميل بعد التكريم الجميل.. لازم تجي ترد الجميل!

* عماد خوجلي وصل في إجازته السنوية.. أعزموهو ما تنسوهو!

* مطلوب من حسون أن يسارع لتمثيل مدربي الشرق في الجهاز الفني الوصايفي!

* جلال كادوقلي كذلك جاهز لتمثيل مدربي الغرب!

* الشرق أتى والغرب أتى.. تلاقت قمم يا مرحى!

* عوض الحاج ممكن يمثل مدربي الشمال!

* حمد والديبة وقلة يمثلوا أرض المحنة!

* المشكلة جيش المدربين.. تلقوا ليهو كراسي وين؟

* لحل المشكلة سأتبرع بكنبة الاحتياط التي قدمتها للرد كاسل وتم تحويلها إلى الملعب الرديف!

* ماهو لازم نتضامن كلنا مع الوصيف الخفيف عشان حل أزمة المقاعد دي!!

* نقترح الاستعانة بأفراح الشمالية وكزام!

* يا أخوانا لازم تخلوا البساط أحمدي!

* الما بلقى مقعد يعتبر المناسبة حقتو، ويدرب وقافي!

* البساط أحمدي.. والمدد بلجيكي!!

* وممكن كمان القعاد في الدكة يكون بالتناوب!

* (تلاتة) يقعدوا.. و(تلاتة) يوجهوا!

* يا الرشيد ما تخافوا على كراسي المقبرة من التخريب!

* مدربنكم ديل ما حا يخلوا لينا أي كرسي فاضي!

* هسه تقعدوا الجمهور وللا تقعدوا المدربين؟

* خاص لأنصار الزعيم: كل زول يجيب كرسيهو معاهو!

* الجماعة زي مدارس الأساس.. حا تكون عندهم مشكلة كبيرة في الإجلاس!

* لو عدد المدربين زاد.. الما عندوا رخصة (أ) يقيف جنب السلك!

* وممكن عشرة يدربوا من الكشافة الشمالية!

* نحن مدربنا قبل الكورة الفاتت سافر إثيوبيا.. والوصايفة جايبين مدربين أكتر من سكان إثيوبيا!

* قالوا فوزي الأسد وضع التكتيك المناسب!

* الأسد براهو، انتو جايبين الغابة كلها!

* هسه لو الوصيف غلب.. الفوز ينسبوهو لي ياتو مدرب؟

* خبر الأمس: جمال الثعلب وصل من أمريكا وأعلن جاهزيته لتمثيل مدربي الأمريكيتين!

* آخر خبر: نفوس الوصيفاب كان اتطايبت.. الكنبة بتشيل خمسين مدرب!!
[/JUSTIFY]

مزمل ابو القاسم – كبد الحقيقة
صحيفة الصدى