بابكر سلك
اللهم لا توجعنا لا تعولقنا
> على ان الحياة دي عبارة عن أوجاع
> تتوجع لما تعرف حاجة
> لكن اشد الاوجاع تلاتة انواع
> وجع الضرس
> وقالوا في واحد بلدياتنا
> بالليل سمعوهوا بكورك ويصرخ باعلى صوتو
> القصة بدت انين
> فآهات
> فصراخ
> وولولة عديل كده
> استغاث باعلى صوت
> كب الجرسة شديد
> الجماعة جروا عليهو
> لقوهوا مطعون زي اربعين طعنة كده بالسكين
> ومقطع حته حته بالسيف
> قالوا ليهو عليك الله ما بتخجل !!!
> تكورك كدي في الطعينات ديل
> اسي قايلين ضرسك قام عليك
> والنوع التاني من الوجع
> وجع الولادة
> وده سبب تعظيم الأم
> وتكريمها بالجنة التي تحت قدميها
> وجع يوجع بلد كاملة
> بجي لي زول واحد
> والزول سعيد
> لانو بعد الوجع بستقبل حكمة وجودو في الحياة
> سمفونية الابداع التي خصها الله بها
> فتعزف بانينها نغمة الابداع والامتاع
> وتجود صولة الوجود في الوجدان
> اللهم لا توجع أمهاتنا بعد الشافنو يا الله
> اللهم ووجعنا نحن لراحتهن يا كريم
> برغم ان بعض المثقافتية يرون ان وجع اليومين دي اشد من وجع الولادة
> لذا قالوا الوجع الخرافي هو النوع التالت من اشد انواع الوجع إيلاماً
> وجع الولادة ما شفناهو
> لكن الوجع الخرافي شفناهو
> شفناهو في إخوتنا الأهلة
> وجع بكري خرافي
> خلاهم يهرطقوا ويطقعوا ويبطبطوا ساااااي
> يقولوا دايرين صغار
يسجلوا فيصل
> يقولوا خلوا ناس عمر
> يفاوضوا عمر
> كديس فداسي المربيهو الوالي جننهم شديد
> كديس ابو كديس
> المهم
> وجعهم خرافي
> والمثقفاتية قالوا الوجع الخرافي هو وجع الولادة
> اللهم لا توجعنا ولا تعولقنا بعد العمر ده
> المهم
> وصل اثيوبي الهلال
> وصلت معاهو وكيلتو
> وكيلك الله يا راجل
> فطومة ناطق رسمي
> اللاعب وكيلتو واحدة ست
> ده فريق !!!
> امال الاحفاد كيف !!!
> اهلنا في دارفور ليهم مثل
> نذكركم به
> البباري الانتايه تمرقو في الفضايه
> المهم
> اليومين دي اي زول يقولوا ليك هضرب
> اعرف قرصتو عقرب
> واتهضرب يا روشا
> بعد فطومة اختي ناطقة ووكيلة اللاعب الحبشي
> لا نستبعد رئيس بعثة الهلال للفيفا يوم يشتكوا بكري
> تكون هيلاري كلينتون
> اقول ليكم
> ام كلثوم موش لقبها الست ؟؟؟
> اعملوها رئيسة فخرية لقطاع الثقافة
> واعملوا ليها حولية
> أيها الناس
> كلو ما اشوف فطومة اتذكر المثل البقول
> عجوبة الخربت سوبا
> وقال المثل التاني
> لو عمرت سوبا خربت الخرطوم
> اللهم لا تخرب الخرطوم
> أيها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا البلد كلها بتتوجع
> البياكل والبرضع
> الكبار والشفع
> البعتب والبضلع
> البحوم بالليل يلبع
> والبقوم الليل يركع
> بنتوجع ونتوجع ونتوجع
سلك كهربا
ننساك كيف وكل البمرق يحلف ما يرجع … بنتوجع
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة