بابكر سلك
بانغورا الماسورة
> بعد عقد وارقو فلفلوهوا
> وسكتوا عن ناس امبيلي الاغلى من وارقو
> قالوا في واحد الجمعة الفاتت اتكلم عن بطلان عقد المدينة
> يا مولانا
> وريتنا لكن
> بس كنا راجينك تورينا
> ما حكم الشرع في الفساد الفينا
> ورينا
> ما حكم الفرد
> لو شتت وكبَّ الفكفكينا
> ورينا
> امانة الصوت والانتخابات جايه علينا
> ورينا
> مالك سكتَّ؟؟؟
> كنت وين يا شيخنا
> من اتفاق نزار مع المريخ وتحوله للهلال.
> كان تكلمنا يا شيخنا
> عن مليون دولار اتوبونج
> عارف بتساوي كم الليله يا مولانا؟؟
> قريب عشرة مليارات
> الوكت داك كانت حلالاً ولا غضاضة فيها!!
> كانت تجوز بحسب اجماع الفقهاء
> حلال او كما قال؟؟
> ورينا
> يا شيخنا افتينا
> عن عيشة عدمت السخينة
> عن تعاسة عاثت فساداً في القرية والمدينة
> موش موضوع تعاسة المدينة اولى من موضوع بكري المدينة؟؟
> ايها الناس
> أئمة الزمن ده من نوع البخطب في بطلان عقد المدينة
> بذكروني نكتة
> قالوا في قرية صغيرة
> فيها امام من النوع إياهو
> واحد فتح فيها توكيل ببسي
> القرية كلها بقت شايلة الببسي
> أي زول يلاقيك شايل قزازة ببسي
> تعرفو من أهل القرية اولاد قلبا
> والاهتمام بقي ببسي وبس
> في خطبة الجمعة تحدث الإمام عن الببسي
> وعن انه حراااااااام
> كونه منتج من شركة امريكية ويديرها اليهود.
> قال
> أخي المؤمن
> إذا سألت عن الببسي فهو
> حرااااااااااام
> الخميس البعدو سيد التوكيل رسل للإمام برميل وتلج وخمسة صناديق ببسي.
> مولانا النهار كلو يكتح
> يتحنطر.
> ومشى الجامع.
> وتحدث عن موضوع الببسي.
> وقال
> اخي المؤمن
> الببسي اذا كان حار فيهو حلالالالالال
> وإذا كان بارد
> بارد مندي اخي المؤمن
> بارد لما القزازة مغبشة
> فهو
> حرااااااااااااااااااااال
> قلت لي بكري المدينة عقدو حرام ولا حرال يا مولانا؟؟؟؟
> المهم
> هيئة توفير المياه الهلالية
> عودتنا سنوياً على استيراد مواسير معتبرة.
> الآن بانغورا الماسورة في طريقة للهيئة.
> وهناك حارس عاطل زي عطالة المدرب برضو في الطريق.
> أما الحبشي
> الشاورما اهم شيء
> الزول ده اظنوا شغال في كافتيريا
> من وكيلتو المرا دي
> الزول ده شغال في كافتيريا
> لأنو الحبش لما تكون رئيستهم مرا
> بكونوا في كافتيريا
> او جمبة
> المهم
> مريخ كوستي اثبت وجوده للمرة الثانية
> وأثبت حاجات تانية مانعاني
> وأثبت أننا نعاني لنعاني لأننا نعاني
> زول يصعد
> في نفس الموسم يصعد تاني؟؟
> اها
> نجي لي شمارات والي الخرتوم
> كان شفت يا والينا
> شدينا حيلنا وقوينا
> بي فرد أصبع بنشيل كيس العيش لي أهلينا
> وأنبوبة الغاز مليانة بنشيلها بي سهولة يا والينا
> غيرتو الموازين ولا المقاييس اتلخبطت علينا
> ولا ما جايبين خبر يا والينا؟؟؟
سلك كهربا
ننساك كيف والقانون بقول لو ما جبتوا خبرنا بنجيب خبركم.
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة