بابكر سلك
كانوتيه كايسين ليه
> وبكرا تجي
> وكانوتيه ما يجي
> وتاني يقولوا كانوتيه جاي بكرا
> جية كانوتيه دي بقت زي بتاع الحافلة الكاتب فيها
> بكرا الركوب مجاني
> وذكرتني جية قودوين
> والغريبة نفس البطل
> لانو البطل القال كانوتيه بجي
> هو نفسه الكاردينال القال
> قودوين بجي
> ووقتها كتبنا
> لو الوالي قال بجي
> بجي
> وقودوين ما جا
> لانو الوالي ما قال بجي
> وكانوتيه قالوا وصل اديس
> زي توسنامي
> كل يوم يقولوا وصل مكان
> لكن الجديد
> قالوا خايفين قعدتو في اديس دي يكون فركش الخطوبة ورجع الدبلة
> وقال داير يقرا
> الخوف ده لانو كديس فداسي المربيهو جمال
> شوهد في ضواحي اديس
> مرق من فداسي ليهو يومين وشق البطانة
> اديس بالبطانة مشية يوم
> كديسنا اسي لو ما اخاف الكضب
> يمصمص في اصابعينو
> جاي من اديس شبعاااااان
> وعلى ذكر اديس
> الطرف الشمال شفناهو اول امس
> في الجزائر
> اي جزائري بالطرف الشمال الاثيوبي كان بمش
> هو زول جابتو امو زي ود الروضة يلعب كيف بس
> والخبر اليقين عند كديس فداسي
> فطومة اختي بي بندقيتك دي الكديس ده غلبك؟؟؟
> المهم
> في مرة من المرات
> قالوا كانوتيه كان ماشي علي المطار حصل ليهو حادث
> ماشي بامجاد يا روشا؟؟؟؟
> أيها الناس
> ناس رابطة كوستي رافعين القزاز شديد في موضوع الطاهر
> التقول ما الطاهر الشفناهو في جنوب افريقيا ده
> التقول ما الطاهر الشفناهو في المريخ
> التقول ما الطاهر الكلو يوم معوق
> التقول ما الطاهر الجبناهو فزع بقى وجع
> التقول ما الطاهر الشهانا بلة جابر
> التقول ما الطاهر الختفوا منو ناس كمبالا الكورة وجابوها فينا قون
> التقول الطاهر هواري
> اجمل خدمة قدمتها رابطة كوستي لينا تمسكها بالطاهر
> وإن شاء الله تكون الاعارة اتكتبت غلط فيها سنتيتن تاني
> ايها الناس
> الافارقة السمعناهم جايبهم كردنة
> كتبناهم
> لما عديناهم لقيناهم اكتر من بعثة اليوناميد
> كورة ولا وكر ايبولا يا كردنة
> وبعدين ده كشف ولا بص
> خمسة واربعين زول
> بالغت
> المهم
> كانوتيه كايسين ليه
> وكان ربك رضي عليه
> كديس فداسي يكون قام بيه
> المهم
> هل وعينا الدرس من المنتخب ؟؟؟
> هل قررنا نقدم للرياضه شيء ؟؟؟
> هل خجلنا ؟؟؟؟
> ولا هل ما خجلنا ؟؟؟؟
> عدم الخجلة مشكلة
> أيها الناس
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> المليون ستة اصفار قالوا لينا
> والمليار تسعة اصفار قالوا لينا
> الحال النحنا فيهو يا والينا
> كم صفر قول لينا
سلك كهربا
ننساك كيف والدشليار كلو اصفار ونحنا نردد دييييييييييييشك
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة