بابكر سلك
الجنيه أبو جمل
> السودانيون يتمنون عودة الجنيه أبو جمل
> الجنيه الكان بجيب تلاتة دولار ونص
> بالمناسبة الجنيه داك يساوي قرش في تسميات الزمن ده
> قرش الليلة بساوي الجنيه أبو جمل
> وزمان القرش بجيب طلب فول
> اسي الحوت ممكن ينوم جعان
> الجنيه الكان بجيب تلاتة دولار ونص
> وعودة الجنيه أبو جمل تعني عودة الروح للسودان
> عودة الاكل للصينية السودانية
> عودة العين المليانة والتعفف
> عودة السمات السودانية من كرم وعطاء وتحري اكل الحلال
> عودة الوضوح وعدم النفاق
> المهم
> حكاية الجنيه أبو جمل زي حكاية الاهلة مع هيثم
> دايرينو يرجع
> وقلة من الاهلة ما دايرنو يرجع
> البرير مع القلة
> لكن البرير كتير ما شويه
> كردنة داير يرضي القاعدة
> والبرير بالمرصاد
> فهل يلوي البرير يد كردنة
> ام يتمرد كردنة على البرير ؟؟؟؟
> طيب لو تمرد كردنة على البرير
> مليار البرير المديونية مصيرو شنو ؟؟؟
> اقول ليك يا كردنة
> سجل هيثم
> والبرير لن يتجرأ على مقاضاة الهلال في مديونية
> لانه لو فعل
> لانهى حياته بالهلال
> سجل يا كردنة ما تخاف
> اصلو هيثم بتكلم سبعة لغات
> بنفعك مع العشرة محترفين المن جنسيات مختلفة الجبتهم ديل
> وبعدين هيثم بريحك
> شهر ستة تلقاهو برااااهو في الكشف
> بطفش ليك الكشف كلو
> لانو هيثم يرى انه سيد الهلال
> يبقى في الهلال من يريده هيثم
> ويذهب من يرى هيثم ذهابه ضرورة
> المهم
> قانون العرجا لي مراحا
> قانون ساري المفعول في جمهورية الهلال
> ويجب تطبيقه
> وان كانت الناطقة من انصار عدم تسجيل سيدا بالهلال
> وكذلك روشا
> الا ان كردنة ما مضمون
> الزول ده ممكن يشوتهم ليك في دقيقة
> وينصب هيثم كابتنا للهلال وناطق رسمي ورئيس غرفة التسجيلات
> ورئيس تحرير الاسياد كمان
> كردنة ده قبل كده شات باقان اموم ورجع لي سلفا
> مرات تلقاهو مع عرمان
> ومرات تلقاهو مع ربيكا
> ومرات يتبع باقان اموم
> شواااات كردنة ده
> تاجر وزول مصلحة
> والتاجر ما بسيب مصلحتو لاجل زول او مبدأ
> قانون التاجر
> تجيني في البيت اضبح ليك
> تجيني في السوق اطقك لمن تعرف حاجة
> خايف عليك تعرفي حاجة يا فطومة يا اختي
> غايتو لو تم التسجيل
> البشوف هيثم مع الاداريين ماشين على الاتحاد
> يقول الجلاكين ديل ماشين عقد
> ايها الناس
> تحية واحترام للرائع طارق المعتصم
> هذا الرجل تلقاهو وقت الشدة
> يعمل في خفاء
> من اجل الزعيم يقدم
> ولا يتقدم نحو المنابر ليكابر او ليبقى تحت الاضواء
> ود قلبا وعارف روحو بعمل في شنو
> يا ناس
> موكورو واوكراه ما شوية
> ومصلحة الزعيم فوق كل المصالح
> ولنا قصة سنعود اليها تفصيلياً
> ولكن بعد قفل باب التنقلات
> لازم الناس تعرف كلو شي
> الشفافية خطوة في طريق العودة للمنصات الدولية
> في البيت اخوي لي بهناك
> تجيني في المريخ اطقك لمن تعرف حاجة
> ايها الناس
> تصدقوا ان عدد الافارقة في الهلال اكتر من عدد الافارقة في منظمة الوحدة الافريقية !!!!
> ستة وستين لغة ولهجة يتحدثها افارقة الهلال
> وفيهم سادومبا كمان
> غايتو ديل الا يجيبوا ليهم سماعات ترجمة فورية في التمرين
> عشان كلو زول يفهم كلام المدرب باللغة البعرفها
> وحقو الاتحاد يعمل ليهم شفرة
> ويفهمهم انو الكرت الاصفر انذار
> والكرت الاحمر طرد
> عشان بعدين ما يخرخروا
> ويقولوا الاحمر في بلدهم انذار
> والواحد لما ينطرد يرفض الخروج
> عشنا وشفنا
> ايها الناس
> حانرجع لموضوع طارق السيد معتصم بالتفصيل
> من حق الرجل ان يعرف عنه الناس مواقفه النبيلة
> ايها الناس
> إن تنصروا الله ينصركم
> اها
> نجي لي شمارات والي الخرتوم
> شايفكم يا والينا شغالين لينا
> بديتوا في الشوارع الكربستون عملوهوا لينا
> قول الكربستون مسك تراب الارض المالينا
> كيف الطريقة مع تراب الجو الكلو يوم قايم علينا
> ومع الترابة الفي خشمنا ومالياهو لينا
> برضو خشمنا كربستون حاترصفوهوا لينا
سلك كهربا
ننساك كيف والكربستون في الخشم بملاهو لينا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة