بابكر سلك
ييي بليدنا وكلنا اخوان
> وفي غناها كل المنى
> بتحس بيها بتزيل عبرة من حلقنا
> وتلمنا
> غنينا مع عقد الجلاد كلنا
> لا درادر ولا درادر لا مظاليم لا مظالم
> غنيناها بايمان تام
> وغنينا معهم
> ييي بليدنا وكلنا اخوان سوداني بليدنا ييي
> ومنها حقو كان نعرف
> انو غنية عقدالجلاد ييي بليدنا كان قانوناً
> يعطي جنسية الوطن العزيز
> لكل من ينتمي الي يي
> يبقى ماغريبة جمعة يكون من يي
> وما غريبة لو كان من يي يكون عندو جواز جمهورية السودان الشمالي
> اما الذي يلعب لمنتخب دولة جنوب السودان
> الما من ابيي
> ده ما جمعة
> ده خميس اخوهو
> وبالمناسبة
> يمكن يطلع ليهو اخو اسمو سبت
> بلعب صانع لعب
> كان في احشاء امه بابيي لمن امو كانت هناك
> لكنه اتولد في ملكال
> زي ده برضو من يي
> مرحلة من مراحل تكوينه في بطن امه قضاها بابيي
> أيها الناس
> هل نريد حقاً تطوراً للكرة عندنا ؟؟؟
> هل فعلاً ما نقوم به يقودنا للتطور ؟؟؟؟
> هل نحلم بشفافية ونزاهة بقناعة في اروقة ودهاليز الرياضة؟؟؟
> هل نذكر صالح سنار الذي لعب تحت السن سنوات ؟؟؟؟
> وبموجب شهادة ميلاد رسمية
> هل نذكر الحكم اليوغندي الذي سافر بتقرير مباراة الهلال وناساروا النيجيري الودية المعلنة ؟؟؟
> الحكم الذي انذر عمر بخيت وبحكم القانون كان هو الانذار الثالث لان المباراة معلنة
> وعندما دقس الاهلة واشركوهوا دورياً
> اشتكى الفريق المنافس مستنداً على الانذار الثالث لعمر في تلك المباراة
> هل تذكروا رد اللجنة بتاعت الاتحاد ؟
> اذكركم
> قالوا الحكم شال التقرير معاهو يوغندا بالخطأ
> وحايتصلوا بيهو عشان يرسل ليهم التقرير
> تصدقوا مرت سنوات والتقرير لسه ما وصل
> تقرير المصير حصل
> وتقرير الحكم اليوغندي ما وصل
> بربكم كيف نمني النفس بمستوى كروي متطور ؟؟؟؟
> شخصياً انا من ابيي
> لسببين
> الاول اني طويييييييييييييييييييل
> والتاني اني بغني ييي بليدنا وكلنا اخوان
> كان رضينا كلنا اخوان
> وكان ابينا كلنا اخوان
> اخو
> اخوي
> اخو البنات
> كلمات كثيرة التداول عند الشعب
> حتى غنانا
> اصلو البينا خوة
> والسياسيون يستهلون مخاطبتهم لنا بعبارة
> ايها الاخوة والاخوات
> ايها الناس
> قالوا العاملون بسودانير يهددون بالاضراب
> ويييييييييييييين الاسم ده يا هيثرو
> اقصد يا ناس !!!!
> سودانير دي وطنية مية المية
> ومن ابيي كمان
> المهم
> تمضي الايام
> والافق فااااااضي
> فهل يا ترى اكتفينا بتفويت المغمور والمكسور والمبهور ؟؟؟
> وقعدنا بره في السور
> نتفرج ساااااااي !!!
> ارى ان ننسى الموضوع ده لو كنا ما جاهزين
> اخير من نجيب من طرف ساي
> لدواعي القشرة ومضارات الغفلة والفشل
> وقد يكون الامر غير ذلك
> قد تكون لجنة التسجيلات تعمل في صمت
> لكن الايام ستكشف كل شيء
> المهم
> ييي بليدنا كلنا
> وكلنا اخوان
> وما تستغرب يا مان
> ايها الناس
> إن تنصروا الله ينصركم
> اها
> نجي لي شمارات والي الخرتوم
> في صحيفة واحدة قرينا
> خبرين ضد بعض يا والينا
> السيد الرئيس يوصي بسن قانون لمقاضاة المفسدين فينا
> وخبر يفيد بعدم تداول الفساد في مكتب والينا
> ياتو الصاح يا والينا
> قول لينا
سلك كهربا
ننساك كيف والتداول وعدم التداول ما بنفي واقعا لينا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
