بابكر سلك
جد لينا يا والينا
> عبارة بنسمعها كتير جداً
> عبارة بتتكرر زي هلال الحركة الوطنية
> هلال كلارك الانجليزي الذي اسموهو هلال الحركة الوطنية
> المهم
> قالوا ادب الهلال يمنع رجوع سيدا للهلال
> وها هي الاخبار تؤكد عودة سيدا بالمزيكا
> أبشر يا روشا
> لي فوق لي فوق
> وان كان الخبر يجمل الخنوع بشتلة صغيرة
> سيدا يعتذر للهلال وللجماهير ويطلب العودة بخطاب رسمي
> يعتذر دي يخيل لي نوفمبرية ساي
> عودة سيدا مثل عودة نميري
> سيغني لها الشارع الهلالي
> ايدناك بايعناك
> يا هيثومي ايدناك
> وعودة نميري سميت عليها المهندسين الحالية
> ذلك الحي الراقي بامدرمان
> ونحن نعيد الكرة
> ونسمي العرضة شمال بالعودة
> طالما سقط الاسم عن ذلك الحي الذي تغير الى المهندسين
> انا ساكن امدرمان حي العودة شمال «حي العرضة سابقاً»
> عودة هيثم محمولاً على اكتاف اخلاق الهلال وادب الهلال وثوابت الهلال
> هلال الحركة الوطنية
> هلال الحركة الهيثمية
> واذا سألأنا روشا عن اسباب تراجع الهلال وتقدم هيثم وتمدده
> سيقول الجمل حيوان اليف
> اجابتو حاتكون ما ليها علاقة بالسؤال
> المهم
> اذا فشلت صفقة البرازيلي
> كردنة متربص ليهو خمسة وعشرين يوم
> باتنين ارجنتينيين الاتنين اولاد خالات ميسي
> امسكوا الخشب
> ايها الناس
> تسجيلاتنا كلو يوم تثبت انها زي شراء خروف الضحية
> حانجيب خروف حانجيب خروف
> عشان الشفع ما يزعلو
> عشان الشفع يقولوا بابا جاب لينا خروف
> المهم خروف
> عمرو كم وحجمو كيف وجنسو شنو ومنو كم
> مامهم
> يخت لحم ما يخت لحم
> ما مهم
> المهم يقول باع
> والشفع يتصوروا معاهو بالموبايل
> ويوقولوا لي اولاد الجيران بابا «داب لينا هروف»
> ودخلنا الزريبة على هذا الاساس
> اقصد دخلنا التسجيلات على هذا الاساس
> لكن صدقوني
> في خرفان بتتضايق يوم الوقفة بالليل
> نعمل شنو مع ديل
> يمكن للصباح ما يصبحوا
> نعمل زي بتاع البحر الخروفو يوم الوقفة قرب يموت
> قام ضبحو وكتب عليهو تشاهد غداً ؟؟؟؟
> وهل صحيح وعدنا لعمر بخيت تمخض عن تخزينه في الاهلي ؟؟؟
> طب ليه !!!!
> المهم
> البقت بقت
> والزمن الفضل ما بجيب خروف حر من مناطق الانتاج
> السنة دي نضحي كده
> كوارع سااااااي
> نغمت الخروف بدري بدري
> وندخلوا نعلقوا في الدولاب
> عشان ناس الحلة ما يشوفوا خروفنا ويضحكوا علينا
> أيها الناس
> إن تنصروا الله ينصركم
> أها
> نجي لي شمارات والي الخرتوم
> جد لينا يا والينا
> جابوا الجرايد وقروا لينا
> قالوا بنك السودان خصص لينا سبعة مليون دولار يا والينا
> البركة الما خصخصها علينا
> المهم خصص سبعة مليون دولار يا والينا
> عشان يجيبوا بيها الدواء لينا
> اسئلة بتحتاج اجابات يا والينا
> شنو المارضنا قدر ده قول لينا ؟؟؟
> وده مرض شنو ده المابي يفوتنا ويخلينا
> ومع ضمان استمرار المرض الفينا
> هل بنضمن استمرار بنك السودان يدينا ؟
سلك كهربا
ننساك كيف وزماااان درسونا وقالوا لينا الوقاية خير من العلاج.. والله يوقينا و يوفر السبعة مليون دولار لينا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة