بابكر سلك
أو كما قال
> بمهارة فائقة جداً
> برغم انه لا يملك مهارة
> الا انه يلعب باص القون بمهارة
> ودي هي المهارة ذاتها
> هيثم لا يلعب بالشمال ولا بالرأس
> هيثم لا يملك مهارات زي سكسك مثلاً وفائز نصر الدين
> وبرغم ذلك يلعب باص القون بمهارة
> وبالدارجي كده
> هيثم لو قلت ليهو «اضقل»
> الاولى بتقع في الواطة
> لكن لو وقعت قدامو اثناء اللعب
> بلعب باص قون
> زمان نحنا كنا بنضقل لحد مية
> وما لعبنا لا في منتخب ولا في طرف قمة
> لانو كان عندنا مهارة التحكم
> لكن مهارة التكتيك ما كانت في
> يبقى هيثم بي حقو
> ومن حقو
> ولذا ما تزعجونا بانو هيثم اعتذر
> اعلونها ساي
> هيثم راجع غصباً عن كل الشعارات المرفوعة
> وهيثم وصل لدرجة تحديد من يدخل الاستاد من الجماهير
> ومن لا يدخل
> زول زي ده ما بعتذر
> ايها الناس
> سبعطاشر سنة هيثم في الهلال
> وسنة واحدة في المريخ
> في سنة المريخ الواحدة دي قابل روبن
> ولو قعد السنة دي في الهلال
> كان قابل ربو
> هيثم عائد برغم كل شيء
> نضفوا الخانة كويس
> الزول ده خانة مغبرة ما بتسجل ليكم فيها
> الهلال كبير وهيثم كبير
> والله أكبر
> المهم
> تسجيلاتنا لا زالت زي ضربة الشفا
> لي اسي ما عارفين في شنو والجاي منو والما جاي منو وليه
> كلو يوم نسمع جديد
> ولكن بصراحة من المجلس ما سمعنا شي
> يكون يا ربي المجلس ذاتو ما عارف !!!!
> نصر على توضيح من المجلس بمنتهى الشفافية بعد قفل باب التسجيلات
> روشا
> البرازيلي وصل ولا لسه !!!!
> فطومة قولي شي
> بيتزا جنوى وصلتكم ولا جايبنها ليكم دليفري ؟؟؟
> في السقط ده بتبرد
> مواتر الدلفري دي بتبردة في الشتا ده
> قنبلة كردنة طلعت فشنك ولا قنبلتو كانت فيصل موسى !!!
> لكن سمعت لي ببرازيلي من اولاد ابيي
> اليومين دي حايم في العمارات
> الزول ده بنفعكم يا كردنة
> منها برازيلي منها قنبلة
> وسماحة الزول في الطول والعلا
> ايها الناس
> قالوا كردنة قال
> سنة الفين وسبعطاشر ما بكون في اجنبي في الهلال
> ياربي يكون قاصد سنة الفين وسبعطاشر ما بكون في هلالاب ؟؟؟؟
> ولا قاصد انو ما بكون في هلال ولا كاردينال ؟؟؟
> ولا أو كما قال !!!!
> على المجلس ان يبين لنا الدعومات التي وصلته للتسجيلات
> ويورينا اي زول دفع كم
> انا متأكد بانو اعضاء التحالف دفعوا
> بس على المجلس ان يبين ما انجزه الرجال
> حتى التبرع بالرأي نعتبره تبرعاً سخياً
> بس ورونا
> المهم
> اليوم هو تلتين نوفمبر
> يعني آخر يوم في شهر الكضب
> من بكرة الكضب حرام والقبر قدام
> أيها الناس
صدقوني
> إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> عندنا جيرانا لينا
> عندهم سبعة اولاد يا والينا
> السبعة اولاد عندهم سبعة جوازات ما من بلدينا
> الامريكي والانجليزي والهولندي والفرنسي والكندي واسباني واسترالي يا والينا
> بعد ده منو الفضل لينا يا والينا ؟؟؟؟
سلك كهربا
ننساك كيف والمواطن هاجر جواز الوطن وعوج لسانو ورطن… يا كائد المحن يا كائد المحن يا كائد المحن
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة