محمد عبد الماجد
تسجيلات المريخ (الضلع) انتهى الزيادة (قرع)
“””””””””””””””””””””””””””””””””””
معقولة الحالة بقت واحدة للدرجة دي بين الأهلي الخرطوم والمريخ لدرجة أن يبدي أوكرا الرغبة للأهلي ويلعب في المريخ
“””””””””””””””””””””””””””
على كدا عمر بخيت ممكن عادي جدًا بعد أن وقع في الأهلي الخرطوم أن نشوفه في آخر (5) دقائق في مباراة المريخ
“”””””””””””””””””””””””””””””””””””””””””””””
الموسم الماضي كشف المريخ كان زايد واحد كان فيه (26) لاعباً السنة دي كشف المريخ ناقص لاعب ، ناقص أوكرا
“””””””””””””””””””””””””””””””
في قوانين حلتنا القاطعة (الضلع) ما بزيدوه.
إلّا تربيزة فيها (وزير).
أو فيها (العريس) شخصياً.
أو ناس واصلين يا دوب من الخرطوم.
غير كدا لو كسرت رقبتك ما بجيبوا ليك (ضلعة) زيادة.
هو ناس الحكومة ديل (ضلعتهم) ذاتها بقت (موية فول).
حليل زمن (الضلعة) بدخلوها بي الباب الكبير براها منفصلة من الصينية ، عشان الباب ما بدخلها.
هسع (الضلعة) بقت تكون قاعدة في الصينية زي (الشولة).
الكلام دا قلتو ليكم قبل كدا (لكن انتوا بتقطعوا من رأسكم وبتتوهموا ليكم حاجات ما حاصله).
ناس حلتنا قربوا يكتبوا ليك في (كرت) الدعوة ملحوظة مع رقم التلفون مكتوب فيها (ننوه السادة الضيوف الضلع ما فيه زيادة).
الكلام وقت يكون واضح أحسن.
أحسن من الزول يقعد يلف ويدور.
عليه الناس الشفوت وقت يكون عندهم (مناسبة) تقوم تمشي عليهم قبل ما تخت في الكشف تقول أول حاجة أشوف (ضلعتهم).
تمشي المناسبة الجماعة يتشالبوا ليك (الضلعة) في (25) ثانية.
يخلوا ليك ملاح أم رقيقة قاعد براهو في الصينية متل المهاجم السارق.
واحد من الجماعة (الشتر) يطالب ليك بـ (زيادة) ضلع.
الحلة كلها تنر فيه.
يا زول أنت جنيت.
يا زول أنت اتوهمت في رأسك دا.
يا زول أنت ما نصيح.
يقولوا ليه (الضلع) ما بزيدوه.
زي كأنو قال ليه حاجة محرمة…تقول قال ليهم عاوز زيادة (قطعة أرض).
أو قال عاوز ليهم (شيلة).
كأنو طلب حق اللجوء السياسي.
صاحبكم ينكمش قبلو وما يعرف يتصرف كيف؟.
يبقى رقيق.
زول من أهل المناسبة ينقذ الموقف ..يقول ليهم جيبوا (صحن) النجيب ليكم زيادة.
المجموعة القاعدة في الصينية كلها تنشرح وسنونهم تظهر لأول مرة في المناسبة.
كلامهم يتغير.
زولكم يشيل الصحن ويغيب نص ساعة جوة ويجي راجع.
المناسبة كلها تعاين ليه.
عاوزين يشوفوا (الزيادة) شنو؟.
زولكم يقول ليهم وهو شايل صحنو (الضلع) انتهى لكن جبت ليكم (قرع).
الصينية كلها تقيف.
كلهم يسألوا من الغسالة.
قرع شنو؟.
نحن القرع ضهبانين منو؟.
نقول ليك عاوزين لينا زيادة (ضلع) تجيب لينا (قرع).
نحن في داخلية.
نحن في سجن.
نحن في معسكر.
مناسبتكم دي انتوا في مدرسة ثانوية.
جايبين لينا (قرع).
نحن قرعنا الفي صينيتنا ما كملناه تجيبوا لينا زيادة.
المناسبة كلها تتعاطف مع الجماعة ديل.
وتعتبر (رسمياً) أن زيادة الضلع بـ (القرع) لا تجوز.
وعملية في حد ذاتها ما إنسانية ولا كريمة.
قرع.
قرع مختار.
مختار دا منو كمان؟.
ناس المريخ المرة دي تسجيلاتهم زي الناس الطلبوا زيادة (ضلع) قاموا جابوا ليهم الزيادة (قرع).
قوموا غسلوا.
قوموا ساي.
المريخاب قالوا ح يسجلوا الجزائري هشام العقبي.
وجابوا لينا صورتو مع سفير السودان في الجزائر واللاعب بوقع.
نحن ذاتو عندنا سفير شفقان في الجزائر.
السفير مستعجل اكتر من اللاعب.
قالوا ليه وقع.
بدل ما يوقع اللاعب.
قام وقع السفير.
تصوروا بعد السفير دا.
وبعد الصور.
والتوقيعات …والصباح الباكر.
طبعاً المريخاب عندهم عقدة من الصباح الباكر.
أي لاعب يوقع ليهم يقولوا ليك وقع في الصباح الباكر.
هو لاعب ولّا طالب البوقع في الصباح الباكر دا؟.
بعد الحاجات دي كلها والقومة والقعدة والصورة والصباح الباكر اللاعب لم يحضر للخرطوم.
أخير الكاردينال.
على الأقل الكاردينال ما قال كروز وقعنا معاه.
ولا جبنا سفير السودان في البرازيل.
ناس المريخ وصلو لغاية السفير.
ووقعوا العقد.
وجاءوا بعد كدا جابوا الغاني أوكرا.
أوكرا المصاب.
أوكرا دا (القرع) ذاتو الكلمتكم عنو.
معقول يا ناس المريخ توقعوا مع الجزائري هشام العقبي وتجيبوا أوكرا المعطوب.
بعدين انتوا تعالوا هنا.
إبداء الرغبة العملها أوكرا للأهلي الخرطوم كانت رغبة (حوصاء).
معقولة الحالة بقت واحدة للدرجة دي بين الأهلي الخرطوم والمريخ لدرجة أن يبدئ أوكرا الرغبة للأهلي ويلعب في المريخ.
نحن أول مرة نشوف حكاية بالشكل دا.
إبداء رغبة في الأهلي الخرطوم واللعب في المريخ.
على كدا ممكن تاني ضربة الجزاء تحتسب لصالح الأهلي الخرطوم يقوم ينفذها المريخ.
أو الأهلي الخرطوم يجيب قون يحسبوه لصالح المريخ.
الحالة بقت واحدة.
وقال شنو؟.
قال رئيس نادي الأهلي الخرطوم بقول نحن سجلنا أوكرا بقروشنا.
يا راجل.
صدقناك.
بقيت أخطر من جمال حسن سعيد.
ممثل خطير.
على كدا عمر بخيت ممكن عادي جدًا بعد أن وقع في الأهلي الخرطوم أن نشوفه في اخر (5) دقائق في مباراة المريخ.
ديل حالتهم بقت واحدة لدرجة زي الأخوان البيوتهم فاتحة على بعض.
عربية دا مع دا.
وعربية داك من دا.
الحالة الواحدة.
جلابية دا عادي جدًا يلبسها داك.
تلبس من طرف.
الشماعة واحدة.
والدولاب واحدة.
والتلاجة واحدة.
الأهلي الخرطوم والمريخ وصلوا الدرجة دي.
عشان كدا أوكرا عمل رغبة في الأهلي ووقع في المريخ.
بالمناسبة هو ذاتو ما في حاجة اسمها إبداء رغبة.
إبداء الرغبة يعني توقيع.
توقيع رسمي.
عليه أوكرا بقى زي بكري المدينة موقع في ناديين.
مشكلة المريخ مشكلة السنة دي.
الموسم الماضي كشف المريخ كان زايد واحد كان فيه (26) لاعباً السنة دي كشف المريخ ناقص لاعب ، ناقص أوكرا.
كشفكم (24) لاعباً فقط.
مسجلين ليكم لاعب مصاب.
24 شنو؟.
المريخ دا كشفو السنة دي (23) لاعباً فقط.
بكري المدينة برضو ما ح تستفيدو منو؟.
لاعب موقوف.
ولاعب مصاب.
أوكرا عاوزين تعملوا بيه شنو مع اصابتو دي؟.
غايتو دا إلّا تأخروا بيه الزمن.
تدخلوه في الزمن البدل الضائع وتطلعوه.
أو جمعوا بيه (تبرعات).
أكتر من كدا ما بقدر يعمل ليكم حاجة.
قرعكم دا أحسن من هسع تلموه عليكم …كورة في البلد دي ما بدقها.
أحسن ليكم ودوه (حدايق حبيبي مفلس) خلوه يكمل فترتو في حدايق السلام ويغادر.
ملاعب ما بقدر عليها.
……….
ملحوظة : أوكرا مع الكدارة جيبو ليه عصايتين.
هوامش
المعز محجوب بعد (12) سنة في المريخ.
أحمد بيتر بعد (21) سنة ممكن ينتقل للمريخ.
ومعتصم لاعب الرديف الذي تم تصعيده للفريق الأول بعد (24) سنة ح يكون في المريخ.
هيثم مصطفى في الأهلي شندي عندما يلعب المريخ أمام الأهلي شندي ح نقعد ونشوف (أولادنا) موضوعهم وصل وين؟.
ما عارفين نشجع منو؟.
المريخ أم الأهلي؟.
الاتنين أولادنا.
مفروض التسجيلات يلغوها.
أو مفروض المريخ والأهلي ينتظروا الهلال ..يشوفوا الحكاية في الهلال ح تنتهي على وين ويسجلو.
معقولة الناس كلها فرحانة بي أولاد الهلال.
ناس المريخ فرحانين بـ (المعز محجوب) عاوزين يطيروا من الفرح.
ناس الأهلي شندي فرحانين بـ (هيثم مصطفى) وعاوزين يموتوا من الفرح.
ناس الأهلي الخرطوم فرحانين بـ (عمر بخيت) وعاوزين يجنوا من الفرح.
ناس أسبانيا ذاتهم فرحانين بـ (مهند الطاهر).
نحن بنفرح الناس كلها.
الهلال كبير.
الفرق كبير جداً بين الهلال وأي فريق آخر.
والفرق أصبح كبير جداً جداً بين الهلال والمريخ.
……….
عاجل : ناس المريخ تسجيلاتهم دي ما بتسترهم لي يونيو ، شوفوا ليهم تسجيلات في فبراير.
[/JUSTIFY]
وإن طال السفر – محمد عبد الماجد
صحيفة قوون
[SIZE=3]كلام فارغ استغرب كاتب صحفي يجلس ويضيع وقتو في كتابة خرابيط بالشكل دا. ضلع وقرع وكلام لا يسمن ولا يغني من جوع. هذا هو حال الكتاب او من يدعون انهم كتاب. اللهم ارحم عبد المجيد عبد الرازق.[/SIZE]
[SIZE=3]لا غرابة في ان يسجل المريخ والاهلي شندي من الهلال فدايما الاندية الصغيرة تفرخ للنادي صاحب الانجاز الخارجي. فمن غير الزعيم له انجاز خارجي. ولعلمك اي لا يبرز في اي نادي من حق المريخ ان يسجله لانه النادي السوداني الأوحد صاحب انجاز خارجي.[/SIZE]