بابكر سلك
من كبري كوبر يا البحر يا كوبر يا المصحة
> كييييييييييييف المريخ يسجل من الهلال
> محمد عبدالماجد ده اظنوا بعد القون التالت الجابو راجي بقى ينسى
> يا محمد ألف مرة قلنا ليك
> طبيعي الفريق الصغير يفرخ للفريق الكبير
> وسياسة الكاردينال الجديدة دي صحيحة مية المية
> الهلال يعتمد على الصغار
> يؤهلهم
> البنجح فيهم يرتقي للمريخ
> يعني نحنا وكت ندخل فيهو الحلة والاحياء نفتش شفع ما عندنا
> وكتنا يكون في تسجيلهم بعد ينجحوا في الفريق الصغير
> وبعد داك نشتغل معاهم تكتيك واكل سمح وفنادق وكده
> ادخلوا مع كردنة الاحياء
> شوفوا لينا طرف يمين يا حمادة
> عشان ترتاح من بلة جابر
> وهذا ما لزم توضيحه
> المهم
> للمعلومية جمال سالم مسجل في الرديف
> يعني الفريق الكبير فيهو بس عزو وايهاب
> عليك الله شوف الفرق
> معز وايهاب وجمال
> شوف الاسامي دي
> شهادة عربية !!!
> ياخ خلينا ياخ
> المهم
> جمعة بتاع ابيي بين ليلة وضحاها بقى اجنبي
> بين ليلة وضحاها رجع لي اهلو بالطيارة
> طيارة جوبا
> طيب الفي ابيي ديك اسقطوا حضانتك ولا شنو يا جمعة؟؟؟
> أيها الناس
> كوبري كوبر من اخطر الكباري في البلد دي
> الوقعة منو يا البحر يا السجن
> ولو اتخارجت بوديك على المصحة عدل
> ده كبري شنو ده كبري الجن ده
> وبرغم الصيانة التي قامت بها الدولة
> الا انو كلو شي وارد
> أيها الناس
> تحدث جمعة عن رفضه لعرض المريخ الخيالي
> دي فتح فيها خيال الزول ده
> وتحدث عن انو مطلوب في مازيمبي وفيتا
> معقولة !!!
> موش ديل ياهم القابلوك وكندكوك بره الخط ؟؟
> عملت شنو في مباريات الهلال ضدهما عشان يسكوك؟؟؟
> يخيل لي حكاية المريخ يفاوضني وقمة الكنغو تطاردني
> دي لافتات معلقة على كوبري كوبر قراها جمعة
> أيها الناس
إن تنصروا الله ينصركم
> اها
> نجي لي شمارات والي الخرتوم
> كان شفت يا والينا
> مجلس تشريعي ولايتك اجتمع وقال لينا
> لازم يفتحوا بلاغات في المعتدين على المال العام فينا
> اكتشفوا الحكاية دي وضرورتها يا والينا
> بارك الله فيهم يا والينا
> وكان شفت يا والينا قالوا لينا
> انو المخالفات بتهدر مليارات الجنيهات من مال الدولة والشعب يا والينا
> دي كانت فايتة علينا
> بالله اكتشفوها كيف دي ؟؟؟
> يعني كان ما اكتشفوها كان ضعنا يا والينا
> لكن ما ورونا مال الشعب في المليارات دي كم ومال الدولة كم يا والينا
> كلامهم كلو كان عن مشروع نظافة ولاية الخرطوم يا والينا
> لكن تفتكر مافي وسخ غير موضوع الوسخ يا والينا!!!!!
> مخالفات قدر ده , ده مشروع نظافة الولاية من الاموال الفضلت لينا
> ولا مشروع نظافة الولاية من الناس يا والينا
سلك كهربا
> ننساك كيف وبكرا ممكن يتحللوا لينا ويتحلل الوسخ الفينا
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
