بابكر سلك
القناة أم شريحة
> في آخر كل موسم عندهم شكوى مضمونة في الفيفا.
> ويشتلوا زي ما دايرين.
> تقول الفيفا دي نسيبتهم.
> مع قفلة الموسم يبدأ ترويجهم لقنبلة التسجيلات.
> قنبلة التسجيلات غداً في الخرطوم.
> قنبلة التسجيلات اتأخر عشان كان راكب أمجاد ماشي مطار بلدهم.
> الأمجاد نمرها بيضاء.
> ناس الحركة كشوها.
> الطيارة فاتتو.
> قنبلة التسجيلات وصل أديس.
> قنبلة التسجيلات بجي بكره من أديس.
> قنبلة التسجيلات كانت في محاولات مريخية لتغيير اتجاهه لكنه رفض.
> قنبلة التسجيلات أكل ليهو «زقني» في أديس وبطنو مشت.
> الأيام ماشة وبطن قنبلة التسجيلات مااااشة.
> السيستم قفل.
> طوالي يدخلوا في شائعة القناة.
> قناة الهلال ستبدأ بثها مطلع الشهر القادم.
> قناة الهلال شدت ما جميلة.
> قبل ما تبدأ بثها أشاد بها الناس.
> الإخوة العرب بسألوا عن ترددها.
> الإخوة الأفارقة طالبوا بترجمتها.
> وفي الآخر يطلع الموضوع نت يا معلم.
> يعني تنشط تتفرج.
> ما تنشط ما تتفرج.
> تنشط ما تتفرج.
> الشبكه ويييييين يا عمك.
> زيها وزي أية صفحة فيس.
> لكن ما قلتوا لينا.
> قناة النت دي.
> شريحتها برضو من الواطة واللا تتسجل؟؟؟
> حيرتونا،
> الاجتماع بالواتساب.
> القناة بالشريحة.
> الجوهرة الزرقاء دي جلكسي خلي بالك!
> وبعدها طوالي تبدأ حكاية معسكر إيطاليا.
> مالديني يشيد بفلان.
> باولو روسي قال كاريكا خليفتي.
> ويبدأ الدوري.
> ويبدأ الشغل الجد.
> لولا يخطئ ولا يظلم.
> الهلال من الدورة الأولى مفروض ما يطلع ولا بي نقطة.
> لكنه يخطئ ولا يظلم.
> ثم تبدأ المنافسات الإفريقية.
> ومحل الحقنة قاعد يا عمك.
> ويقولوا دخلنا المجموعات.
> ثم يعودوا للشكوى والفيفا.
> لكن السنة دي كتروا المحلبية.
> القصة فيها جوهرة كمان.
> وغرب باب النادي مباشرة مكتوب بالخط العريض.
> حمامات.
> حقيقة ما عرفت كلمة حمامات هل هي جمع حمام بتاع الدش داك؟
> أم هي جمع حمامة ذلكم الطائر الأنيق؟
> حقو عند افتتاح الجوهرة الزرقاء تشكلوا لينا كلمة حمامات المكتوبة غرب البوابة الرئيسية يا كردنة.
> التشكيل ضروري.
> والما بشوف ما مشكلة.
> بشم.
> المهم.
> السيد فتحي إبراهيم عيسى يقبل العمل بمجلس الشورى المريخي.
> خبر عادي جداً.
> مجلس الشورى هو مجلس كبار المريخ.
> وفتحي إبراهيم عيسى منهم.
> للرجل تاريخ حافل بالعطاء والإنجاز.
> والمريخي إذا ناداه الزعيم
> لا يتأخر.
> وها هو الزعيم ينادي كل أبنائه.
> نختلف حول الزعيم .
> ولكن لا نختلف فيه.
> حتى رموز المعارضة.
> لهم تاريخهم الناصع وخدماتهم الجليلة التي قدموها للمريخ.
> قريش لا ننكر أنه رجل محترم وخدم المريخ كثيراً.
> بل ويعود الفضل إليه في تسجيل شعار المريخ وتفويت الفرصة على عصمت.
> وحجوج الجميع يشهد له بالجدية والتفاني.
> ومن منا لم يجد حجوج مرابطاً بالنادي أيام توليه تلك المسؤوليات؟
> وجميعهم قدموا ولم يقصروا.
> لذا سياسة عدم الاعتراف بماضيهم من بعض الإخوة غير صحيحة.
> وهذا لا يعني أن تجاوزهم للخطوط الحمراء في المريخ يشفع لهم فيه تاريخهم المذكور.
> لذا..
> نوصي الجميع باحترام الكيان في المقام الأول.
> واحترام الآخر في المقام الثاني..
> واحترام النفس المحترمة لدى جميع الجماهير في المقام الثالث.
> واحترام الجماهير في المقام الرابع.
> وصدقوني..
> يوماً ما سيكون عصام الحاج الثائر وقريش وحجوج أعضاء بمجلس الشورى.
> وسيكون إلى جانبهم جمال وضقل والفريق طارق وحسن يوسف.
> ومولانا خالد سيد أحمد وخالد ليمونة ومعتصم إسترليني.
> فالأيام تمضي ونشيخ كلنا يحملنا الزمان خبرات.
> وتدعونا الأمانة أن نحفظ تلك الخبرات وننقحها ونقدمها نصحاً للمجلس في ذاك الزمان.
> التراشق لا يشبهنا يا أهل المريخ.
> ينقص منا الكثير.
> والإطلالة عبر وسائط لا يهمها المريخ.
> ولكن تهمها سقطات المريخ.
> تعتبر إطلالة منقصة لقامات رجال يجدون حتى اليوم كامل الاحترام.
> فإن ضاقت بكم منابر المريخ المطروحة..
> ابنوا لأنفسكم منبراً من خلاله تطلون وتطل علينا أفكاركم.
> منبر نضمن أنه لا يروج لكلمة حق يريد بها باطل.
> فاهمني يا إخوتي في التحالف!!!
> أيها الناس:
> إن تنصروا الله ينصركم..
> أها..
> نجي لي شمارات والي الخرتوم..
> كان شفت يا والينا..
> كلو ما ينتحر زول مجنون يقولوا لينا:
> الدخل القصر وما قال كش قالوا مجنوناً فينا..
> الكتل خوجلي عثمان زمان مجنون يا والينا..
> البطلع في الصينية ويخطب فينا..
> مجنون قديم يقولوا لينا..
> الطلع برج الكهربا وداير منو يقع يا والينا..
> قالوا حالات بتنتابو ومجنون وخطر علينا..
> وبتاع الكلاكلة برضك طلع مجنون حسب ما قالوا لينا..
> والينا..
> ألف رحمة تنزل عليهم جميعاً موتانا.. النصحاء منهم والمجانينا..
> لكن سؤال صغير يا والينا..
> صدقنا مجانين.. الجننهم شنو يا والينا؟؟؟
سلك كهربا..
ننساك كيف والجن بتداوى كعب عدم الجن.
والللللللللللللى لقاء
سلللللللللللللللللللك
في السلك – بابكر سلك
صحيفة الإنتباهة
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة