محمد عبد الماجد
تحالف المريخ هو وينو المريخ البتعارضوه؟..انتوا بتعارضوا في الهلال
“””””””””””””””””””””””””””””””””””
لا تخرج معارضة الهلال من (كتابات) يمكن ان نقول عنها انها كتابات هدامة لأنها لا برنامج لها ولا اهداف سامية لها
“””””””””””””””””””””””””””””””””””
الأرقام تقول أن الهلال تفوق على المريخ في عهد جمال الوالي الذي حكم المريخ (12) سنة بينما تغيرت مجالس الهلال في تلك الفترة أكثر من (7) مرات
“””””””””””””””””””””””””””””””””””””””””””””
من جماليات التحالف أنه أيضا يعمل في النورعندما يفعل شيء يصدر (بيان) ويتحرك بمسؤولية رغم (الخناق) الذي يفرضه مجلس المريخ وأعلامه عليه
“”””””””””””””””””””””””””””””””””””
ما تمنيت شيئا في المريخ للهلال قدر ما تمنيت ان تكون معارضة الهلال مثيلة وشبيهة بمعارضة المريخ المسماه بـ (تحالف المريخ).
دي الحاجة الوحيدة التى يتفوق فيها المريخ على الهلال..وهذا ما نشهد به.
لا بد من القول اولا ان المعارضة في المريخ والتى تطلق على نفسها (تحالف المريخ) معارضة محترمة وتتحرك في حدود (نفع) المريخ دون التفكير في (الضرر).
وانها لا تبحث عن الشو الاعلامي والضجيج الفارغ لخلق اسماء من فراغ في عالم المريخ.
استمعت اكثر من مرة لقيادات من تحالف المريخ في اذاعة هلا 96 عبر برنامج الزميل حسن فاروق (زمن اضافي) ووجدت ان قيادات المعارضة تتكلم بفهم عالي ونفس هادي ، وعندهم من الفكر والوعى الكثير.
تحالف المريخ للامانة فيه قيادات ادارية محترمة ..وقدراتهم الادارية والقيادية كبيرة.
يثبت كلامي هذا ان لتحالف المريخ برنامج وخطط ..وعنده رأي في كل الخطوات التى تحدث من مجلس المريخ.
كان يمكن لتحالف المريخ ان يتجه في معارضته الى اتهامات شخصية ..وان يذهب الى التشكيك في قيادات مجلس المريخ الحالي كما يحدث في الهلال الآن.
حيث ما عارض شخص في الهلال إلّا واتجه نحو رمي المجلس بسهام شخصية مشككا في امانة قيادات مجلس الهلال الحالي وطاعنا في امانتهم ونزاهتهم.
وما يحدث من معارضة الهلال يمكن ان يحدث من مجلس الهلال عندما يكون في المعارضة وتكون المعارضة الحالية في المجلس.
تحالف المريخ لو اراد ان يتجه اتجاه معارضة الهلال لوجد الكثير من (الثغرات) التى يمكن ان يطعن فيها في شخوص مجلس المريخ.
لكن تحالف المريخ لا يفعل ذلك ..لم يحدث ان شكك احد في تحالف المريخ في قيادي من قيادات المجلس الحالي رغم ان اتهامات كثيرة طالت بعضهم.
تحالف المريخ لم يستغل حتى ذلك الذي جاءت به الصحف السياسية ..وبعد تماما عن تلك النواحي وابقى على انتقاداته للمجلس ولجمال الوالي في حدود عمله الاداري في المريخ.
لم يهتموا حتى بالنواحي السياسية في مجلس المريخ ..ولم يشككوا في امانة احد في المريخ.
هذا امر جميل نشهد به لتحالف المريخ …وهو شيء يجب ان تسير عليه معارضة الهلال.
علما ان الهلال لا توجد فيه معارضة بالشكل المنظم والمعروف للمعارضة وانما هناك دوافع شخصية لبعض قيادات الهلال خارج المجلس ملكت اعلام ومنابر يمكنها خلالها وعبرها مهاجمة مجلس الهلال.
ولا تخرج معارضة الهلال من (كتابات) يمكن ان نقول عنها انها كتابات هدامة لأنها لا برنامج لها ولا اهداف سامية لها.
وهذا غير ما يحدث من تحالف المريخ التحالف الذي ينطلق ببرنامج وعنده اهداف ينادي لها ومشاريع يعمل من اجلها.
لم يخرج تحالف المريخ يوما عن الخط حتى في الكتابات التى سطرها عصام الحاج الامين العام السابق للمريخ والتى كانت تعبر عنه شخصيا ولم تكن تعبر عن التحالف ، مع ذلك كانت في حدود مقبولة …وخرجت في نقاط منطقية..لم ينجرف عنها عصام الحاج ولم يخرج عن الحدود رغم الانتقادات الحادة والهجوم العنيف الذي تعرض له عصام الحاج من قبل اعلام المريخ لكنه لم يخرجه ذلك من السلوك النقدي القويم.
ان كان هناك شيء حسن واحد في المريخ فهو في ذلك التحالف الذي عارض بادب …ولم يعمل يوما من اجل ان يضر المريخ او يجعله يتدحرج الى الوراء لشماتة في المجلس.
التحالف بقي بعيدا عن المريخ يراقب الاحداث ثم يعلق عليها في حدود دون ان يكون هناك تدخل او سفور في التعامل او التعبير او الرد.
من جماليات التحالف انه ايضا يعمل في النور ..عندما يفعل شيئا يصدر (بيانا) ويعلن عن ذلك ويتحرك بمسوؤلية رغم (الخناق) الذي يفرضه مجلس المريخ واعلامه على التحالف.
التحالف مثلما فيه قيادات ادارية وخبرات عريضة في المجال الرياضي مثل فتحي أحمد علي ونادر مالك ومحمد جعفر قريش وخالد سيد احمد فيه ايضا من قواعد المريخ ومن روابط مشجعيه من يشهد لهم باخلاصهم ومريخيتهم العتيقة مثل خالد ليمونة والسر كارلوس وغيرهم من رجالات المريخ ومن قيادات روابطهم المختلفة.
هذا النسيج وذلك التداخل اعطى المريخ معارضة جيدة ..نفعها وصلاحها للمريخ ربما هي اكبر من نفع المجلس وصلاحه.
معارضة الهلال تحتاج الى ذلك الترشيد وقد منحنا المريخ نموذجا وحيدا في عالمه يمكن للهلال ان يقول ان المريخ تفوق فيه عليه.
ذلك المجال الذي تفوق المريخ على الهلال هو ذلك (التحالف).
لقد بقى جمال الوالي رئيسا لنادي المريخ (12) عاما …كانت الغلبة فيه للهلال في المنافسات الملحية وعلى مستوى البطولات الافريقية.
فاز الهلال (9) مرات بالممتاز مقابل (3) مرات للمريخ ..وتقدم الهلال في التصنيف الافريقي كثيرا في ظل تراجع المريخ.
الارقام تقول ان الهلال تفوق على المريخ في عهد جمال الوالي الذي حكم المريخ (12) سنة بينما تغيرت مجالس الهلال في تلك الفترة اكثر من (7) مرات.
عليه فان بقاء جمال الوالي في المريخ بادارته تلك وطريقته التى تعتمد على الخبطات الاعلامية والاستعراض في فترة التسجيلات واستقدام لاعب من الهلال للمريخ يجعل الساحة الرياضية تمور في ذلك الحدث هى لا تزعجنا في شيء.
وهى لا تنفع المريخ في شيء.
بل تسعدنا كثيرا طالما كانت لنا الغلبة بالارقام والنهايات.
من الافضل للهلال ان تتعلم معارضته من تحالف المريخ.
ومن الافضل لمجلس المريخ واعلامه ان يستمع لذلك التحالف وان يمنح التحالف حقوقه كاملة في المعارضة والشورى.
قديما عندما تذهب معظم كتاباتي في المريخ …يقال لي من الهلالاب ومن المريخاب ايضا (انت مالك ومال المريخ؟).
الآن يمكن ان اقول بصوت عالٍ وثقة عريضة اصبح لنا في المريخ اكثر ما للمريخاب فيه.
بداية من مؤسس المريخ (الحديث) الراحل ابوالعائلة مرورا بالمعز محجوب في حراسة المرمي ..والباشا وعبده جابر وتراوري وبكري المدينة الى غارزيتو وابنه.
يعني انتوا فاكرين ابن غارزيتو دا جاء من الكنغو.
اصبح لنا في المريخ اكثر ما للمريخاب فيه.
اما تحالف المريخ فاني اقول لهم انتوا بتعارضوا في شنو؟…هو وينو المريخ؟.
انتوا بتعارضوا في الهلال.
ومن هذا المنطلق يفترض ان يدعم المريخ (تحالف المريخ) لأنهم هم في حقيقة الامر بعارضوا في الهلال.
شفتوا الدنيا دي بقت ضيقة كيف؟.
……..
ملحوظة : إلّا يمنطقوكم كدا.
هوامش
كروز مشى الترجي.
انتوا الكاردينال دا في كلامو كان قاصد الهلال ام قاصد الترجي؟.
احتمال يكون قال (الترجي) في قناة النيل الازرق ونكون نحن ما سمعنا كويس.
ما في مشكلة الترجي والهلال واحد.
الحالة واحدة.
بس ان شاء الله بيت الهلال ما يطلع بيت الاهلي المصري.
المواضيع بقت ما مضمونة.
وان شاء الله قناة الهلال ما تطلع قناة وفاق سطيف.
الحاجات بقت ما مضمونة.
انتوا يا ناس الهلال ما قلتوا كروز ح ينضم لاعداد الهلال في الامارات.
بعد كدا كروز دا ما ح تشوفوا إلّا في المجموعات.
ناس المريخ طبعا ما ح يشوفوا حاجة.
عشان ح يطلعوا من (التمهيدي).
ويقعدوا يتفرجوا في المجموعات.
كمان نحن بنلعب.
الحقيقة بنقولها.
لينا او علينا.
قال كروز قال.
السنة القادمة الشاف (كروز) في الاهلي شندي ما كضب.
صلاح ادريس بكون فكر في الموضوع.
نحن عارفين الحاجات بتمشي كيف؟.
الحمد لله بطاقات لاعبي الهلال كلها وصلت.
والتسجيلات كلها اعتمدت.
بما في ذلك اعارة جمعة.
منطق والله.
صلاح ادريس شابكنا ليك المهدية المهدية.
الكاردينال طلع ليه بـ (كوبر) لمن فهم حاجة.
عشان تشوف (الاعارات) الما لعب.
ولا بنلعب في الحاجات دي.
ولا بنجامل.
……..
عاجل : تكتروا تقللوا بنعمل لينا هسع دي اعارة من الحرية.
[/JUSTIFY]
وإن طال السفر – محمد عبد الماجد
صحيفة قوون
جمال الوالى يا اخ محمد جاء المريخ بامر رئاسى
البشير قال ليه تعال الكوره حاتخدم البلد اكثر من السياسة
والبشير قال لجا للوالى لانه زول هين…..
يعنى لا كان مريخابى ولا حاجة والشلة دى مزمل وسلك وكامل وكابووغيرهم زفة منافع
خطاب البشير فى كوستى (وقال حقو ناس المريخ يدوه حاجة على هذا الفضل)