محمد عبد الماجد
بله جابر لاعب مدربين كيف يعني؟..الكورنر بعكسو بي نجمة مربع إرسال
“”””””””””””””””””””””””””””””””””””
الما بريدك في البرد دا بفتح ليك (المكيّف)…يا على الميت كدا بقوم يشغل ليك (المراوح)
“”””””””””””””””””””””””””””
بتاع الغاز ..يقول ليك والله دي آخر انبوبة..بتاع الدكان يقول ليك .. والله عربية الزبادي ليها أسبوع ما جات علينا
“”””””””””””””””””””””””””””””””””
مباريات الهلال القادمة ما تتلفزوها ..خلوا الهلال يكون بطيخة مقفولة في البرد دا
“””””””””””””””””””””””””””””””””””””””
في السودان في (فهم) حايم.
فهم غريب.
من سنة حفرو البحر…(نفس الحنك).
بتاع الغاز ..يقول ليك والله دي آخر انبوبة.
بتاع الدكان يقول ليك .. والله عربية الزبادي ليها اسبوع ما جات علينا.
بتاع البطيخ يقول ليك دا بطيخ كسلا.
بتاع الخرفان يقول ليك الخرفان دي بلدية.
بتاع الكهربة بقول ليك كهربتنا دي اصلية ..من سد مروي.
من سد مروي كيف يعني؟..موصلنها بي اسلاك طنبور.
الدكتور بقول ليك لو اتأخرت دقيقة كنت لقيتني طلعت.
بتاع المدرسة ..يقول ليك انت محظوظ …نحن قفلنا التسجيل ..لكن في طالب ابوه هاجر الامارات.
مالكم انتوا؟.
مالكم عاوزين تلخبطونا.
في ثقافة نحن عارفنها.
وانتوا عارفنها.
لكن انتوا بتعملوا فيها ما فاهمين.
لكن ما مشكلة بوضحها ليكم ..وبختها عديل.
اعملوا فيها ما فاهمين.
كلها بتقع على رأسنا نحن.
في السودان …اللاعب وقت يكون ما عندو حاجة ..وما بعرف يلعب واشتر وبتاع جري ..بقولوا ليك اللاعب دا لاعب مدربين.
بالله.
اغني ليكم اغنية عثمان حسين (ما بصدقكم).
لاعب مدربين يعني شنو؟.
قرأ طب ..وملحق في آخر سنة …قام قبل على الكورة.
فهمونا.
درس خط 18 في روسيا.
شفتوا الزول من يقولوا ليك اللاعب دا لاعب مدربين اعرف طوالي ان اللاعب دا ما عندو اي حاجة.
قاعد في الصقيعة.
اقنعوا منو طوالي.
لاعب مدربين بعمل شنو يعني؟.
بحرس للكوتش موبايلو وقت يكون في الشاحن.
بعمل شنو؟.
بكسّر ليه تلج في المحاضرة التى تكون قبل المباراة.
بشيل صبارة الموية في المعسكر.
لاعب مدربين كيف يعني؟.
اي واحد يكون ما مقنع ويكون ما عندو مهارة وما عندو فنيات ومرفوض من قبل الجماهير ..يقوموا يقولوا ليك دا لاعب مدربين.
حنك قديم.
من زمان كتاب المطالعة فيه (طبق اليوم).
زمن المسلسل بيجيبوا ليك فيه محمود المليجي ونبيل الدسوقي.
انتوا بتذكروا الاسم دا.
بتذكروا (نبيل الدسوقي).
زول كان طيب شديد.
اللاعب المجلي بقولوا ليك لاعب مدربين.
يا فندم.
عشان شنو؟.
عشان يحللوا الحكاية.
وعشان الجماهير ما تعترض على مشاركته في المباريات.
غارزيتو عندو متل هذه النظريات.
الزول الكويس ..وبعرف يلعب كورة ما بيلعبو.
والزول الاشتر ..وكورتو في الكشافات ..بقولوا ليك دا لاعبو المفضل.
اول مرة اعرف ..ان الكشافات هدف اساسي لي غارزيتو.
خليفة في الهلال ..كانوا بقولوا ليك عليه ..خليفة دا لاعب مدربين.
موسى الزومة لاعب مدربين.
غارزيتو هسع اشاد بلاعب المريخ بلة جابر ..وقال بلة جابر دا لاعب مدربين.
بلة جابر برفع الكورنر بي اسكراتش.
برفع الكورنر بي نجمة مربع ارسال.
تقنية.
علم.
تنكلوجيا يا بلة.
بعمل شنو يعني؟.
بلحن التمريرة.
المخالفة البعملها بطلع ليها تصديق من (اللجنة الشعبية).
لاعب مدربين كيف يعني؟.
عاوزين نفهم.
عشان بلة جابر دا ما يقوم يصدق.
والجماهير تفتكر تاني (الطفيّش) البعمل فيه بلة دا مقصود.
والتصريجة …خطة من المدرب.
والجوز …جوز تكتيكي.
يا جماعة …نحن كمان بنعرف الكورة ..وبنفهمها.
غارزيتو ما يقوم يفكها فيكم.
الفيلم دا نحن شفناه.
ومجربنو.
ما يغشوكم بيه ساكت يا مريخاب.
دا حنك جديد ..عاوزين يبرروا بيه مشاركة بلة جابر في مباريات المريخ.
لو بلة جابر لاعب مدربين.
عنكبة برضو ح يطلع لاعب مدربين.
وعلي جعفر.
وضفر.
والريح علي.
ديل كلهم ح يسنترهم ليكم غارزيتو.
وناس راجي عبدالعاطي وابراهومة ومجدي عبداللطيف ح يروحو فيها.
اسألونا نحن من غارزيتو.
مجربنو.
ما تفتكروا الموضوع دا (حدرة) لي بلة جابر (لاعب المدربين).
زمان قالوا لينا الزول (الما بريدك في الضلمة بحدر ليك)…يمكن المثل طلع زمن قطوعات الكهربة.
عشان كدا ارتبط بالضلمة.
ويمكن يكون طلع قبل حتى ظهور الكهربة…لأن (الضلمة) فعل ممتد ..وهذا يعني ان النور اصلا غير موجود.
لا كهربة ولا يحزنون.
واحد منكم يمكن يسأل ويقول (يحزنون) دي يعني شنو؟.
الدخل (يحزنون) مع الكهربة شنو؟.
ح اقول ليكم انتوا وقت في الدستور قالوا (تعيين) الولاة بدلا من انتخابهم ..في زول منكم قدر يقول حاجة.
بس فلاحتكم فيني انا.
اقول اي حاجة ما عاوز زول ينط لي في عمودي.
على كيفي.
انتوا ما نطيتوا في (الدستور) عاوزين تنطوا لي في العمود.
بقت على عمودي دا يعني.
الكلام دا كان في كتاب مطالعة سنة 1920م.
ما تفتكروا بقطع ليكم من رأسي.
نحن حسب فهمنا وقتها كنا بنفهم ان (الحدرة) طالعة من كون زول يجيك ..تقوم الكهربة بدون مقدمات تقطع ليك.
تقوم (تحدر) ليه ..باعتبار ان الزول دا كراعو حارة.
في الحلة ..في اي حلة في ناس ارتبطوا بالكراع الحارة.
برضو نحن بنتشابه في الحاجات دي.
زول كراعو حارة اول ما يدخل البيت الكهربة تقطع.
او اول ما يجيك يحضر معاك الكورة يجيبو فيك قون.
في ناس كدا.
عندنا زول كراعو حارة.
في البرد دي مولعة نار.
الزول الكراعو حارة دا ..مشي المستشفى يزور ليه زول تعبان شديد.
زول بين الحياة والموت.
النفس البنزل يمكن ما يطلع.
والبطلع يمكن ما يرجع.
الجماعة من صاحبكم ابوكراع حارة دا مشى يزور الزول التعبان في المستشفى قالوا خلاص قرضو.
قنعو منو.
زولكم التعبان سمع بي ابوكراع حارة دا (قالوا ليه الزول دا ماشي عليك عشان يزورك في المستشفى).
الزول التعبان قال ليهم الزول لو جاء لقاني راقد في العنبر دا بجيب خبري..احسن وزعو لي معاكم كوتشينة في شجرة النيمة الفي الحوش داك.
احسن يجي يلقاني بلعب (حريق)..من يجي يلقاني راقد كدا.
الجماعة وزعو ليه معاهم.
زولكم جاء لقى ليك زولكم متلفلف بالبطانية وقاعد في حوش المستشفي تحت الشجرة بيلعب في الحريق.
ويغالط في الجماعة ..النزول ما بتمو.
صاحبكم بعد الحريق ما سخن ..قام رمي (البطانية) من رأسو زولكم ابوكراع حارة قال ليهم تكتبوا ليه (تلاتة) طوالي …الزول دا رمى (غطا).
الزول التعبان قال ليهم والله لو عارف كدا كنت من العنبر ما نزلت ..تكتبوا لي تلاتة في شنو؟..(البطانية) كرت كمان.
كان احسن لي اموت من تكتبو لي تلاتة.
طبعا احر حاجة في الحريق يكتبو ليك تلاتة.
الجماعة خلوا شغلتهم.
وخلوا زولهم العيان وقعدوا يتغالطوا ليك.
لمن (الغفير) بتاع المستشفى جاء كشاهم ليك بي مريضهم وقال ليهم الزيارة وقتها انتهت.
في غفراء كدا.
طبعا زولكم التعبان وقت طلّع البطانية وكتبوا ليه (تلاتة) بقى زي الحصان.
صاحبكم مشى البيت ..زي (البغل)..ما عندو اي حاجة ..الجماعة قالوا ليهم انت الدكتور كتب ليك شنو بقيت (نصيح) كدا؟…ما شاءالله.
قالوا ليهم والله بس كتبوا ليه (تلاتة).
نحن لو عارفين (التلاتة) بتعمل كدا ..كنا كتبناها لي الطيب ود الكبولي ود مفتاح الهنا ..يوم داك دخل فيه (قندران) 17 يوم ما قادر يرفع رأسو.
زولكم مات ساكت راح فيها.
لو كتبنا ليه تلاتة كان مرق من القندران.
نرجع للمثل.
الما بريدك في الضلمة بحدر ليك.
المثل عندو فلسفة تانيه …الزول اصلا ما بقدر يحدر في عين الزول عديل ..إلا في ضهرو او في (الضلمة).
لكن لو ما ساكت عليكم الحدرة في الضلمة بتنشاف كيف؟..انتوا ساكت عاوزين تشيلوها مع الزول.
عاوزين ليكم سبب.
انا هسع عاوز اعصرن المثل.
واركبوا ليكم مع الموجة بتاعة البرد دي.
الزول الما بريدك هسع بعمل ليك حاجة واحدة بفتح ليك المكيّف.
عندنا زول صعب.
صعب شديد.
لو جوهو ناس الساعة 12 ليلا ..بقوم يكورك للولد : (يا ولد دخل اعمامك الصالون وافتح ليهم المكيّف).
وشغل ليهم المراوح.
جماعتكم مع (البرد) دا يقوموا الصباح زي (الجناينية) ما بتعرفو.
سماكة بس.
ينتظروا ليك (الشاي) في الباب.
وقت الشمس تشرق ..اي واحد يصلي ليه (8) ركعات شكرا لله.
ما بصدقوا انهم طلعوا من (بردة) زي دي.
طبعا ح تقولوا لي طيب ما يقفولوا المكيّف.
وعشان انا ما بتحير ..بقول ليكم يا فالحين مفتاح المكيّف في المطبخ.
والدنيا ليل.
يعني ما في اي طريقة لايقاف المكيّف.
الواحد فيهم يقوم ليك الصباح زي (لوح التلج)…وشو كلو (نخرين).
عشان كدا نحن طلعنا من موقف الزول دا بي مثل جديد ..(الما بريدك في البرد دا بفتح ليك المكيّف).
وفي ناس كمان وقت تركب معاهم العربية ..برضو بفتحو ليك المكيّف.
ينفخك برد ..يخليك زي (الروسي) ما في كلمة واحدة بتقولها مفهومة.
تبقى تقطع في الكلام ..تقول قاطع سير الكاتينة.
……
ملوحظة : طولتها معاكم الليلة.
هوامش
ناس الهلال قالوا كورتهم القادمة متلفزة.
قلنا ليهم ما تلفزوها لينا.
نحن عاوزين الهلال بطيخة مقفولة.
كمان ما تقولوا الدنيا برد.
اقفلوا على بطيختكم في البرد دا.
عشان ناس المريخ ما يفهموا حاجة.
وناس الاهلي شندي ما يفهموا حاجة.
اتكتموا على هلالكم.
بعدين يقوموا يضربوكم عين.
خلوا الجماعة (مسطحين) كدا.
وقولوا ليهم الهلال لم يقدم مباراة جيدة.
والمدرب زعلان.
والاداء كان مرتبك.
عشان نجي نضرب من طرف.
ولا بنجامل.
ولا بنلعب.
……….
عاجل : غارزيتو دا معقولة (البرد) دا بيأثر فيه للدرجة دي.
[/JUSTIFY]
وإن طال السفر – محمد عبد الماجد
صحيفة قوون
صدق من قال العوارة خشم بيوووت .. هسه الزول ده مخسر الحبر ده كلو عشان الهيافة دى .. كلام خارم بارم من (صحفى) هنبوووول !!1