والله تبارونا، تشجعوا الممتاز كلو

[JUSTIFY] > أولاً وقبل كل شيء.
> نرفع القبعات لمريخ كوستي.
> أداء ممتاز من فريق صعد حديثاً للممتاز.
> ويهمنا في المقام الأول بقاء مريخ كوستي بالممتاز.
> ويهمنا في المقام التاني علو كعبه وتأهله للتمثيل الخارجي.
> مريخ كوستي مريخ عريق.
> له إدارة واعية وراعي خرافي.
> وله مدرب شاطر.
> لذا هو كفيل بتقديم عروض جميلة.
> وصدقوني.
> الجماعة ما برجعوا من كوستي بالنقاط.
> اتذكروا كلامي ده كويس.
> المهم.
> أمس من الظواهر الجميلة.
> الإستاد فُل تنك.
> مريخاب يشجعون المريخ.
> مريخاب هنا وهناك كانوا بشجعوا في المريخ.
> وهلالاب كوستي مجبرين يشجعوا مريخ كوستي.
> وغضبوا غضباً شديداً عند ولوج هدف عجب.
> غضبوا أكتر من لاعبي مريخ كوستي.
> جنس حساده.
> سيد الحق راضي شن دخل القاضي.
> والله تبارونا تشجعوا الممتاز كلو.
> أيها الناس.
> أمس قربت تبقى فينا.
> ولو نحنا بنشجع فريق بخسر من البدايات في الولايات.
> كان لمينا على ناس فطومة أختي.
> ما كان شجعنا المارد الأفريقي صاحب الجويات.
> جويات أتينا بها من أدغال أفريقيا.
> يبقى ما بنقبل فقدان النقاط في الولايات القريبة دي.
> المهم..
> تابعت المباراة من خلال المذياع.
> حيرنا المعلق.
> المعلق حيرنا.
> بتضرب في محمد يوسف وتطلع ركنية لمريخ كوستي.
> كيف دي بس؟؟؟
> أيها الناس.
> مرات يجيك زول إنت كموظف مثلاً.
> محتاج تكتب بياناتو بالكامل.
> وهو شايفك بتكتب.
> تقول ليهو اسمك.
> يقول ليك محمد.
> محمد منو.
> محمد علي.
> علي منو.
> علي سيدأحمد.
> سيد أحمد منو؟
> علي.
> ساكن وين؟؟
> الثورة.
> الحارة كم؟
> السابعة.
> منزل كم؟
> 6123.
> ما بديك المعلومة كاملة.
> يقطعها ليك قطّيع مرارة ويفقع مرارتك معاها.
> دي الطريقة التي أدى بها المعلق أمس.
> لذا نعذر جماهيرنا في الولايات لما يحتجوا على عدم النقل التلفزيوني.
> طالما دي الطريقة بتاعت المعلقين.
> أخير الاتحاد يدي القنوات الدوري مجااااااني.
> حفاظاً على حياة المشجعين.
> وأجلوا بيع الدوري للقنوات لما تلقوا معلِّق يعلِّق بالطريقة التالية
> إسمك منو؟
> محمد علي سيدأحمد علي
> ساكن وين؟
> الثورة الحارة السابعة منزل رقم 6123.
> لما تلقوا معلِّق زي ده.
> بيعوا البث للقنوات.
> المهم.
> أوكرا كل يوم يثبت إنه مكسب كبير.
> ولسه..
> وعنكوبي ماشي كويس.
> المدينة محتاج لصناعة لعب.
> بالذات بعد ترصُّد الإعلام والأوهام والحكام ليهو.
> وحقو نتحرك لحماية بكري من الترصُّد بكل أشكالو.
> لوزان قالت شنو يا روشا ؟؟؟؟؟
> المهم عدنا بالأهم.
> تلاتة نقاط حلاتها.
> مع تلاتة نقاط الرابطة.
> يبقن كم يا روشا ؟؟؟؟
> ستة؟
> شاطرة يا فطومة.
> أحسبوا كويس.
> المهم..
> اليوم يتلقي أمل عطبرة بأمل كردنة.
> أمل كردنة في البقاء هو مباراة اليوم.
> وما سمعناهو في الموضع ده ما بنصدقوا.
> الأمل فريق كبير وعريق.
> والجماهير واعية وبتشمها.
> ولاعبوا الأمل لهم من الطموح ما يدفعهم لهزيمة أمل كردنة بأرضه.
> وما صعبة.
> عملها أهلي شندي في إستاد الخرطوم ده.
> فقط نتمنى تحكيماً يعطي لكل زي حق حقه.
> ولا نعتقد أن ناس الأمل قد نسوا تجربة الموسم الماضي.
> قربوا يهبطوا.
> لذا الظروف مواتية لخطف نقاط اللقاء اليوم.
> لأنو أمل كردنة كلو حديد أهو.
> أيها الناس.
> الحصل شنو في موضوع أحمد بيتر؟؟؟
> للعلم فقط.
> المهم.
> أذا كان هبوط الأداء أمس لأنو اللعب نهاري.
> ده ما عذر.
> أفريقياً بنلعب نهاراً جهاراً
> حقوا نتعود على الحتة دي.
> وإذا كان السبب أرضية الملعب.
> ده برضو ما عذر.
> أفريقياً قد يلعبونا في أرضية ولا عليك بيها.
> طين وخمج.
> وبعدين ناس مريخ كوستي ديل كانوا بلعبوا في ملعب تاني؟؟؟
> لا نقبل الأعذار الوهمية.
> دي أعذار ناس وهميين سااااي.
> أيها الناس.
> سمعنا بسقوط اسم إبراهومة من الكشف الأفريقي.
> إن صح هذا الكلام.
> يبقى ده سقوط إداري تجب محاسبة صاحبه مهما كان.
> وإن كان الإبعاد مقصود.
> تبقى دي حرب مُعلنة من أشعلها لا يهمه وزرها.
> ويبقى نحاربو بالواضح كده.
> فقتل روح الانتماء في شبل تدرج عندنا.
> ويملك من الموهبة ما يؤهله للاحتراف الخارجي.
> التسريب الذي ده هو المحتاج لقفل البلف.
> وكت أصلها فيها قفيل بلوفة.
> مفروض تتقفل البلوفة المسرِّبة يا ناس.
> المهم..
> الهلال الليلة لو خسر ببقى الطيش عديل.
> أسي هو الطيش مشترك.
> سينفرد بالطياشة.
> تبقى طياشة وكياشة وصفر كبير قدر ده؟؟
> ليكم حق تشجعوا مريخ كوستي أمس.
> والمثل قال.
> الماعندها حاجة تشجعها.
> بتشجع في الأسبوع من الأتيام أربعة.
> لأنها أربعة.
> المهم..
> ناس عطبرة لو شدوا حيلهم.
> وختوا الرحمن في قلوبهم.
> حانفتقد كردنة.
> أيها الناس.
> البصات التي سيرتها لجنة التعبئة الى كوستي بالأمس.
> تبرع بيها الشفت علي الفادني.
> تبرع بها في صمت تام.
> لأنه يؤمن بخدمة الكيان ولا يطلب جزاء ولا شكر.
> برضو بنشكرك يا فادني.
> من لا يشكر الناس لا يشكر الله.
> «إن تنصروا الله ينصركم»
> آها..
> نجي لي شمارات والي الخرتوم.
> كان شفت يا والينا.
> ناسك كبري المنشية قفلوهو علينا.
> قالوا نجي كلنا بي فردة زي البقر الماشي السلخانة يا والينا.
> سألنا عن السبب قالوا لينا.
> الصيانة الدورية العادية أو هكذا قالوا لينا.
> صيانة؟؟
> هو ود متين الكبري يا والينا؟.
> أول مرة أشوف لي طفل يا دوبك تلاتة سنين قضاها فينا.
> نوديهو فحص وظائف الكُلى والكبد الوبائي والضغط والبولينا.
سلك كهربا

ننساك كيف والحقيقة ما بقولوها لينا.
والى لقاء..
سلك[/JUSTIFY]