عزيزتي (انبوبة الغاز) تحية واحتراما

[JUSTIFY]نوم الدغالة واضح…الملايا بتكون واقعة في الواطة…والجدادة جارية تحت السرير
تمشي حدايق حبيبي مفلس…تلقى الناس اتنين ..اتنين…اي واحد قاعد ليه مع (انبوبة) وبكب ليها في الحنك
تمشي تخطب….ابو البنت عندو (7) بنات وانبوبة غاز.. واحدة (اجيب) والتانية (توتال)
نطلب اغنية (الليلة الليلة وحرق بي نار الكمائن ديلا)..وتهدي الاغنية الى انبوبة الغاز

عادي جدا.
تقوم من نومك ..عطشان …تجري على المطبخ تفتح التلاجة ..تلقى اربعة من ناس المحلية منتظرنك.
تعاين فيهم متل (كلاب الضمنة).
تزعل لكن ما تقدر تقول اي حاجة.
يقطعوك طوالي ايصال (عطش نص الليل).
وايصال فتح التلاجة.
وايصال قفل التلاجة.
وايصال خلعة.
وايصال بلة جابر.
ديل كلهن عرفناهم ..ايصال بلة جابر دا شنو؟.
دي حاجات بتعرفوها قدام.
تدفع الايصالات كلها ..إلا ايصال بلة جابر.
كمان بلة جابر ادفع ليه ايصال في شنو؟.
بلعب في باريس سان جيرمان!!..ونحن ما عارفين.
واللـه دا الفضل.
تقول ليهم انا بدفع الايصالات دي ..إلا ايصال بلة جابر.
نحن الحاجات دي ما بنلعب فيها.
الحاجات دي ما بنمررها.
ولا بنجامل.
تدخل الغرفة ..تلقى اربعة من المحلية في انتظارك ..يقطعوك ايصال (نوم).
وايصال قوم.
وايصال عطش.
الايصالات الدفعوك ليها قدام التلاجة ..كلها تجي تدفعها تاني قبل النوم.
يعني شنو؟.
يعني الواحد ما ينوم.
ولو نام ..الواحد ما يقوم.
في ناس عندهم دغالة كدا.
دغالتهم حدها السوق.
الواحد فيهم يعمل ليك فيها نايم…اصلو ما يقوم.
نوم الدغالة ظاهر.
نوم الدغالة واضح.
الملايا بتكون واقعة في الواطة.
والجدادة جارية تحت السرير.
تدفع وتنوم.
عادي جدا.
تركب الموبايل في الشاحن – (امر بحصل في كل يوم).
الشاحن ما يشتغل.
تعاين للشاحن.
وتلعن اليهود والامريكان.
وتنقنق تحت تحت في (كبري المنشية).
تجيك رسالة في الموبايل ..تبين ليك ان المشكلة في (التلفزيون).
ترد عليهم وتقول ليهم علاقة التلفزيون بي شاحني شنو؟.
يقولوا ليك انت قاعد وين ما سمعت بي ان العالم (اصبح قرية).
تقول ليهم سمعت ..لكن ما للدرجة دي.
بقى قرية لكن ما بقى شاحن.
انتوا مالكم عاوزين تلخبطوني.
عادي جدا.
عادي تكون بتحضر ليك في فيلم هندي.
زيك وزي اي زول.
قاعد وقدامك كباية شاي.
الناس كلها بتعمل كدا.
ما في اي مشكلة.
تقول بطلة الفيلم دي انا شفتها قبل كدا.
يا ربي دي علوية بنت سيد الفحم؟.
ابدا ..علوية بنت سيد الفحم ابوها زول صعب ما بخليها تمثل مع الهنود ديل.
دي اماني بنت عمك عمر؟.
اماني بنت عمك عمر عيونها صغار متل حبة الكبكبي.
طيب البطلة دي انا شايفها وين؟.
اتذكرت…البطلة دي خالتها قبل كدا قابلتني في محطة ابوحمامة.
شفتوا الذاكرة دي قوية كيف؟.
عادي جدا.
عادي ..تقول عاوز اخطب.
عاوز اعرس.
الناس الكبار يقولوا ليك يا زول انت جنيت.
يا زول انت ما عندك رأس.
دا زمن يعرسوا فيهو.
تقول ليهم انا لا عاوز اعمل حفلة ولا عاوز فطور عريس.
ما عاوز اي شيء.
تمشي تخطب.
ابو البنت عندو (7) بنات وابنوبة غاز واحدة (اجيب) والتانية (توتال).
تقول لي عمك ..يا حاج انا عاوز اطلب منك طلب.
عمك ضايق ..قبل ما تكمل كلامك ..يقول ليك عاوز منو في البنات ..تهاني وإلّا اماني وإلا اخلاص وإلا سلوي وإلا ايمان وإلا كلتوم وإلا احسان؟.
عمك يقول ليك يمين البتقرأ في الطب بطلعها ليك.
اصلو ما عندك مشكلة.
تقوم انت تقول ليه واللـه يا حاج انا لا عاوز تهاني ولا اماني ولا اخلاص ولا سلوي ولا ايمان ولا كلتوم ولا احسان.
عمك يحنبق ..يقول ليك طيب عاوز منو؟.
تقول ليه عاوز انبوبتك (اجيب).
يقول ليك (اجيب) متكلمين فيها.
طيب (توتال).
يقول ليك (توتال) عاوزة تقرأ.
تطلع من البيت ..زعلان ..وعيونك واقعات في طرف قميصك.
اولاد الحلة ينقشوا الفيلم ..ويقولوا طقوك شاكوش.
شاكوش انبوبة الغاز ..مولع نار.
عادي جدا.
عادي جدا ..تمشي حدايق حبيبي مفلس.
تلقى الناس اتنين ..اتنين.
اي واحد قاعد ليه مع (انبوبة) وبكب ليها في الحنك.
وعصائر البارد قدامهم.
الغرابة ما في عصائر البارد.
الغرابة في ان (الانبوبة) مدنقرة في الواطة ..وقاعدة كمان تقطع في (النجيلة).
يا ربي الزول دا كان بقول ليها في شنو؟..عشان الانبوبة تقعد تتخجل فينا كدا ..وتقعد تقطع في النجيلة.
اكيد كان بقول ليها انا واقف في (صفك) من اول الشهر.
عادي جدا.
تقوم من الكرسي حقك.
تقوم من الحفلة.
تمشي تبارك للعريس.
وتبارك للعروس.
وتبشر في الفنان.
وتطلب اغنية (الليلة الليلة وحرق بي نار الكمائن ديلا)..وتهدي الاغنية الى انبوبة الغاز.
عادي جدا.
اي حاجة بقت جايزة.
اي حاجة بقت ممكنة.
اصلو ما في حاجة بعيدة.
عادي جدا.
تسافر وتغترب.
وتمرق من البلد.
تمشي تتدردر في بلاد الغربة.
تغسل الصحان.
وتمسح البلاط.
ويسمعوك مية كلمة فارغة.
وترجع بعد و(21) سنة.
ما عشان تعمل ليك بيت.
ولا عشان تعمل ليك عمارة.
ولا عربية اخر موديل.
ترجع بعد الغربة دي كلها عشان تملأ انبوبة الغاز ..وامك تقول ليك عافية منك يا ود بطني.
اللـه يديك الفي مرادك.
تقول ليها الفي مرادي يا يمة اعمل لي انبوبة غاز تاني.
امك تقول ليك لكن بنت عمك دي منتظراك ليها (7) سنوات.
عادي جدا.
واي شيء ممكن.
عادي جدا تعمل فيها شاعر.
تبرم شعرك.
وما تتكلم مع زول.
وتجيك نفسيات.
وتقعد تشخبط في الحيط.
تكتب الحرف الاول.
وتكتب ليك اغنية من اغاني محمد الامين في المدرسة (قرب تعال ما تبتعد).
ولمن خلاص ..الحيلة تغلبك.
وحالتك تتدهور.
وناس الحلة كلهم يبقوا يتكلموا فيك…واحد من الناس الفاهمة في الحلة ..يقول ليك ..احسن حاجة تصارحها.
احسن حاجة تكلمها.
عبر ليها.
كلمها عن مشاعرك.
تجيب ليك ورقة وقلم.
وتعمل ليك رمية بي مقطع من مقاطع نزار قباني.
وتكب الجرسة.
وتخش في الموضوع.
وتبدأ بي (عزيزتي انبوبة الغاز).
عادي جدا.
عادي جدا ..يجيكم حرامي في البيت.
يتلب بالحيطة.
ويقعد يتعشي معاكم.
ويقول ليك انا لا عاوز دهب المرا.
ولا عاوز لي قروش.
انا بس عاوز لي (ولعة)..واطلع اتخارج.
حرامي ظريف.
حرامي مسالم.
وما عندو العقد بتاعة انبوبات الغاز دا.
عادي جدا.
عادي جدا تمشي عشان تجيب ليك كهربة.
يقولوا ليك اول حاجة تدفع قروش الموية.
تدفع.
وتدفع قروش النفايات.
تدفع.
وتدفع قروش الغاز.
تدفع.
وتدفع قروش المشاهدة.
تدفع.
واحمد ود الحسن قالوا انت شايل منو قروش ..لازم تدفع ليه القسط الاول.
تدفع.
وبعد ما تعمل الحاجات دي كلها ..يقولوا ليك (كهربة) مافي.
الكهربة انتهت.
تقول ليهم طيب كهربة السد دي راحت وين؟.
يقولوا ليك اكلتها (الجقور).
عادي جدا.
عادي شديد.
ما في زول يزعل.
ما في زول يقول حاجة.
انا حلفت عليكم.
……
ملحوظة : زمان كانوا بقولوا ليك الولد مشى الدهب – هسع بقوا يقولوا ليك الولد مشى (الغاز).

هوامش

ناس هلال الفاشر الظاهر عليهم ميدان النقعة دا غريب عليهم.
ناس هلال الفاشر ديل ..في الفاشر (ضيوف).
واللـه انا من احمد ساري قعد يتعذر لينا في تصريحاته ..ويقول مباراة المريخ صعبة وما ممكن نغلب المريخ بعد تعادل المريخ مع الاهلي عرفت ليكم ساري ما بعمل حاجة.
انت يا ساري قايل نفسك شغال الى الان في الجهاز الفني للمريخ.
……….
عاجل : يا سلك انتو لو لعبتوا مع الخرطوم الوطني بي فريقكم دا ..إلّا تبدأوا في الطابق الثالث.

[/JUSTIFY]