بابكر سلك
عنكوووووووبي
> وحسب كلام المعلق مصطفى.
> المريخ ما كان كويس.
> وبذلك أفتى المدرب فتح الرحمن بين الشوطين وأثناء اللقاء.
> مصطفي قال بكري المدينة غائب في الشوط التاني.
> شخصياً أفهم إنها كلمة حق أريد بها باطل.
> ففتح الرحمن قال بالحرف الواحد.
> إن وسط المريخ لم يمرر للماهجمين الكرة.
> وإن غالبية الهجمات أتت من كرات عشوائية.
> وحتى هدف المباراه الأول جاء من واحدة منها.
> يبقى اللوم لا يقع على المهاجمين حسب حديث المدرب فتح الرحمن.
> يبقى ما كان في داعي بعد الكلام ده.
> مصطفى يصف بكري بالغائب.
> الحتة دي ذكرتني موقف.
> زماااااان.
> من الأستاذ الرشيد بدوي.
> كان معلقاً على مباراة للمنتخب.
> الوكت داك طمبل يا دوبو جا المريخ.
> والأهلة كانوا شانين عليهو حملة لتحطيمو.
> الرشيد في هجمة سودانية.
> وصف فيصل عجب بأوصاف عمرو ما وصف بيها لاعب كورة.
> فيصل الفنان اللعاب الفلتة الأسطورة الفاهم الراقي.
> بمرر كورة جميلة فيها خيال فنان.
> لكن لي منو يا فيصل ؟؟؟
> القصد لم يكن مدح فيصل.
> كان الانقاص من قدرات طمبل.
> ووصفه بأنه لم يفهم باص فيصل.
> فمدح الرشيد فيصل عجب.
> ليس من أجل المدح ولا من أجل فيصل.
> ولكن من أجل الانقاص من قدرات طمبل.
> وطمبل لم يتحطم.
> بل حطم الذين يحاربونه وهزمهم كثيراً.
> لأن شخصيته قوية.
> ولذا.
> بكري لا تقل شخصيته في قوتها عن طمبل.
> وعلى بكري أن يفهم ذلك.
> وأن يستمر بإصرار.
> وأن يهزمهم كثيراً كما هزمهم طمبل.
> وعلى الشفوت أن يساندوا بكري حتي الشبكة.
> وأن يناصروهو بشدة.
> وأن يفوتوا الفرصة على الذين يحاربون بكري.
> إيها الناس.
> المعلِّق يحدثنا عن ضربة جزاء ارتكبت مع احمد عادل.
> والمحلل الكوتش فتح الرحمن يحدثنا عن حالة تمثيل واضحة.
> ويستحق عليها أحمد عادل الانذار.
> شفتوا البحصل إيه !!!!
> أيها الناس.
> لو في مدرب أفهم من غارزيتو.
> ومؤهل أكتر منو.
> وليهو من الخبرات ما يضاهي خبرات غرزة.
> وعارف ظروف لاعبي المريخ.
> بنقبل منو تقييم عمل غارزيتو.
> لكن ما ممكن طبيب عمومي.
> في الامتياز.
> ينط لينا محللاً لأداء أطباء بروفسيرات في الشغلة.
> كل زول حقو يمد رجلينو قدر لحافو.
> المهم.
> جينا بتلاتة نقاط
> نقطة تنطح نقطة
> وده المهم في الدوري.
> والأهم أن يكون الجهاز الفني قد توصل لتشكيلة عزام الافريقية.
> العودة لمنصات التتويج الدولية هي هدف جماهير المريخ.
> بالذات وكنا على تلك المنصات نختال.
> نحن لسنا صفراً دولياً حتي لا نعمل على العودة لمنصات التتويج الدولية.
> لغيرنا تلك المنصات حلم.
> وأي زول ممكن يحلم بأي شيء.
> طالما أحلام جواهو ما فرقت.
> غيرنا يحلم باعتلاء منصات التتويج الدولية لأول مرة في تاريخه.
> يحلم بالوصول ونحن نحلم بالعودة.
> فرق بين الوصول والعودة.
> لما تصلوا بعد خرف ياروشا.
> نكون مشينا وجينا عشرين مرة.
> أيها الناس.
> بينما الأمل يدب في الجماعة.
> اذا بعنكووووووووبي يعملها.
> عنكبة عشكبها في الزاوية ديك.
> الجماعة قاموا على المغرب بدون وضوء.
> بالمناسبة.
> مباريات المريخ بالولايات.
> تلقى الأهلة راقدين حيلهم ميييييييت.
> وبحضروا في الكورة.
> الزول تقول مركبين ليهو درب.
> المهم.
> كادقلي كيف ؟؟؟؟
> وهل ثم هل.. ولا هل وثم ماهل؟؟؟
> الليلة بنعرف.
> لكن الحتة الضيقة الدخل فيها هلال كادقلي السنة الفاتت.
> ما فايته عليهو.
> وأكيد بكون مصمم ما يدخل فيها.
> والدوري تلاقيط.
> من البداية تلقط نقاط الخارج.
> بالذات من الفرق الضعيفة.
> قبل ما تقوي روحها في الدورة التانية.
> وعلى هلال كادقلي أن يلعب على التلاتة نقاط.
> لان الخصم مهزوز.
> مهزوز لدرجة ببكي على خليفة.
> دي فرصتكم يا اولاد كادقلي.
> تقرضوهوا قرضت الجقر لي كبري المنشية.
> الهش بنقرض ساهل.
> أنا شخصياً الليلة خاشيها.
> بقعد جمب البرج البطفي براهو داك.
> المهم.
> نسأل عن أولاد الرديف ناس. إبراهومة ونمر وحسن وخلافهم.
> هل غرزة نساهم ولا متناسيهم لحين؟؟
> المهم.
> الجماعة من يوم خمسة قاعدين في النقطة خمسة.
> الليلة لو اتحكروا في النقطة خمسة تبقى كملت المعدودة.
> ولو كملت المعدودة المقبرة عدل.
> السترة واجبة.
> أيها الناس.
> «إن تنصروا الله ينصركم»
> آها
> نجي لي شمارات والي الخرتوم.
> كان شفت يا والينا.
> قصة المدارس دي اتلخبطت علينا.
> ناس شهر تسعة يقولوا لينا.
> وناس شهر ستة يقولوا لينا.
> ناس البقولوا شهر تسعة يا والينا.
> قالوا عشان المطر ما ينزل في سبعة ويقلها لينا.
> وعشان رمضان ما يجهجه شفعنا. البقولوا مع الصيام يا دوب بدينا.
> والناس البقولوا شهر ستة يا والينا.
> قالوا رمضان شنو؟ متين لي شنط شفعنا بالفطور ملينا.
> ومتين في المدرسة لقينا أزيار وكولرات ملوها لينا.
> وهي الموية زاتها في المدرسة قاعدة تجينا ؟؟؟
> وبعدين قصة المطر يقفلها علينا.
> ما مشكلة قالوا لينا.
> لو المطر ما قفلها يعني شنو البدرسوهوا لينا.
> براها قافلة معانا ومقفولة برانا وبينا.
> ناس عسكرية وزراعية خلو حصة يخصصوها يدرسوها لينا؟؟؟
> وفي ناس قالوا يا والينا.
> لو الطريقة لا ستة ولا تسعة ألغوها لينا.
> أقول ليك يا والينا.
> ألغيها لينا.
جقر كهربا..
ننساك كيف والشايل كتاب والشايل صندوق ورنيش والفارش العيش والرادم الخيش والسايق درداقة بشيش كلهم طلاب..
والي لقاء..
باجقر سلك[/JUSTIFY]
