بابكر سلك
شكوى كبسور أكلوها الجقور
> ومرات بكون واجب
> ومرات بكون ضرورة
> وقس على ذلك
> المريخ غلب الرابطة تلاتة
> الخرطوم تعادل مع الهلال
> الرابطة غلبت الخرطوم
> لو داير تعمل مقارنة بين المريخ والهلال
> قس على ذلك
> المريخ تعادل مع اهلي الخرطوم
> الهلال تعادل مع اهلي شندي تعادلاً لا يستحقه
> اهلي الخرطوم غلب اهلي شندي جوز
> وقس على ذلك
> المريخ غلب مريخ كوستي
> الهلال غلب امل عطبرة بخروج الروح
> المريخ كوستي غلب امل عطبرة براحة
> وقس على ذلك
> وطالما الموضوع كذلك
> حقوا يا روشا تقفلوا النادي وتقولوا اكلو الجقر
> المهم
> كذبة معسكر الفجيرة انكشفت لجماهير الهلال
> لما شافوا بي عيونهم الحاصل
> قالوا حقو نعمل فاصل
> وبعدو نواصل
> لأنو بالطريقة دي م بنقدر نواصل
> ايها الناس
> الاهلة العقلاء كل امنياتهم ألا يخرج الهلال من العشرة الاوائل في الممتاز
> لأنو المستوى الشفناهو ده
> صعب يخلي الهلال يضمن الدخول في العشرة الاوائل
> افريقيا
> مهما اخطأ الحكام
> ولو جا الحكم حالق وماكل كبدة وراكب الآكسنت القديمة
> وشايل بدل الصفارة غرفة الحقن كلها
> لا يمكن أن يخطو ابو الهل افريقيا للامام بالحالة دي
> ولذا
> نأمل أن يتعامل الاهلة بفهم مع الكارثة الجاتهم
> معسكر الفجيرة طلع عش طيرة
> اقل هواء بطير
> وتسجيلات القنابل طلعت ورتاب سنابل
> لا يسمن ولا يغني من جوع
> والاعتراف بالفشل هو الخطوة الاولى للخروج من حفرة الفجيرة
> ابو الهل تعبان
> قفلوهوه يا محمد عبدالماجد
> وقولوا اكلو الجقر
> ايها الناس
> محاولة معاكسة غارزتو لمنعه من السفر
> كانت فرفرة ذبيح ساكت
> الراجل طالبكم قروش
> وداير حقو
> والمحكمة قالت ليهو تعال قابلنا
> يبقى اي مجهود لاعاقة سفر غرزة
> لا بلغي الدين ولا بحلو
> ولوزان حاتحكم لغرزة
> وقريب خمسمية الف دولار ما هينة
> وهنا مربط الفرس
> يا يسردب الفرس ويدفعها
> يا يقول داير يشرك الجماهير وهو ملتزم بي خمسة وعشرين في المية
> يا يقطلع الوتد
> ويشتت
> ياروح ما بعدك روح
> يمشي الجنوب
> يبقى فرس الملكية جوبا
> ما عليهم ديون
> ولاعبنهم بجي منهم
> لابتاكوا زي بوتاكو
> ولا خذلتني يا كيبي يا حبيبي
> المهم
> فنياً ومهارياً وتكتيكياً واعدادياً
> لاخوف على المريخ من عزام
> التوازن الدفاعي
> مع المرتدات في وجود الطيارات
> ناس بكري وعنكبة
> هو سلاحنا لمعركة تنزانيا
> وصدقوني
> بكري بحسمها
> بمناسبة بكري
> الشكوى حصل فيها شنو يا كبسور؟؟؟
> اكلوها الجقور؟؟؟؟
> المهم
> شايف ناس الخليج دايرين ناس
> لا يكفي مؤهل خريج
> لازم ماستر او دكتوراه
> يبقى راجع للقراية يا عشايا
> ولن تقعدنا عبارة بعد ما شاب دخلوهوا الكتاب
> والكلام عن قراية الكبر ما مشكلة
> قراية الكبر زي الحجامة
> بترجع الزول لي شبابو
> وبحس بإنو اتفكفك
> واحساس الفكفكة في بلدنا دي
> اعظم احساس تحس بيهو
> واتحسسي بعدما ما تتفكفكي
> ايها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الليبيين فتحوا لينا
> قالوا ما داير معانا ومافي زول يجينا
> والسعوديين والقطريين برضو فتحوا لينا
> فتحوا لينا انتدابات واغترابات وتعاقدات يا والينا
> اساتذة جامعات واطباء وعقول نيرة خيرة من فينا
> يعني زي مزرعة الدواجن بالنسبة ليهم بقينا
> يعزلوا من وسطنا السمينة
> ويلفحوها يا والينا
> يقطع المزرعة ويقطع سنينا
> وكان دي الحالة يا والينا
> سمير مرض الجداد الشهير اريتو من اسي لي باكر يقرض فينا
> عشان البلد ما تقعد فاضية مافيها ريشة سمينة يا والينا
سلك كهربا
ننساك كيف وكل الكوادر الفي القرى والفي البنادر فحطت وقعدت المحنة فينا
والي لقاء
سلك[/JUSTIFY]
