منى سلمان
شوية هضربة
مياه الأمطار التي عجزت الشمس من أن تنشف ريقها، تولت هي مشكورة مهمة تنشيف ريقنا، وذلك بتوريدها لبيوتنا أنتاجها الوافر من الذباب والباعوض، يتبادلان علينا الورديات .. وردية النهار الضبّانية تسلم مع المغيب مهام حراسة عيونا من النوم لوردية كتايب (ناس ليلة جنّي) الباعوضية .. أبالغ ليكم ؟ الواحد لو عايز يتنفس إلا يزح الصفوف ويجبد ليهو شوية نفس ثم يعيد تنظيم صفوف الباعوض والضبان لسيرتها الأولى حول الوشوش والاذان كي تواصل مهمتها المقدسة .. زن وطن ومصمصة دماء !
بعد قضائي لليلة ليلاء بالحمى، دخلت في الصباح الباكر للمستوصف مسنودة على أكتاف عيالي الصغار، بينما أبوهم يسرع الخطى أمامنا زي الما بعرفنا .. لاحق شنو ما تعرفو .. غايتو أموت وأعرف الرجال ديل قاعدين يستعرّوا من النسوان وللا بيجروا قدامن ليه؟!
جلست في انتظار دخولي على الطبيب أتبادل الحكي مع سيدة متوسطة السن وأروي شمارها عن (مالي) .. أوضحت لها شكايتي بالتفصيل حسب توالي أسئلتها .. الحمى والقصاصة ووجع المفاصل والبرد .. فشخّصت حالتي بـ (ياها الملاريا .. الله يقطعا) !!
بعد طول ململة وانتظار لنتائج الفحص دخلت على الطبيب مرة أخرى فأخبرني بأنها (نضيفة)، وكل ما علي فعله هو أن ألزم الراحة (بي وين ؟ عقاب صيام وعقاب شهر وقبايل عيد) وأن اتناول بندول للحمى وإن لم تنزل حتى المساء، أعود مرة أخرى لأفحص الملاريا بـ (ICT) !!
طيب مش كان من أول بدل أمشوا وتعالوا ؟ هسي كان ما العلي ده .. أكان أديت الدكاترة في شخصو إبرتين .. لكن معليش نلوك الصبر أحسن ..
تابعت حلقة (لماذا) مع المحامي الصعيدي المشاكس (نبيه الوحش)، حيث قدمه طوني خليفة مقدم البرنامج على أنه عدو الفنانين و الفنانات و المشاهير الأول، وصاحب أكبر عدد من الدعاوي القضاية العربية المرفوعة من محامي واحد في العالم العربي .. حتى أنه أرسل رسالة تهنئة للرئيس المصري حسني مبارك بمناسبة عيد ميلاده بطريقة مبتكرة وفريدة وذلك بأن ذهب لقسم البوليس وطلب تسليم التهنئة بواسطة (محضر بوليس) !
بعد نهاية الحلقة فكرت بجدية في استقدام (الوحش) للسودان عشان يرفع لي قضية تعويض، لتعرّضي للاصابة بالملاريا بسبب الباعوض (ود الموية الراكضة) .. أفتكر زمان في سابقة قضائية زي دي .. قالوا في زول رفع قضية وطالب بالتعويض من جهة قامت بحفر حفرة في الطريق وتركتها بدون تغطية أو اشارة تفيد بوجودها، فسقط المواطن المسكين فيها وكسر رجله .. طيب، هسي الموية الاتراكمت وجابت لينا الباعوض السبب فيها منو ؟ عشان دربي ده طوااااالي أمشي اشتكيهو .. بس لسّه ما عرفنا القصور ده غلطة منو .. مركزية وللا ولائية وللا بنى تحتية ساكت !! باقي لي أحسن نجلطا في المحليّة فقد غنينا ليها قبل الخريف:
قلتا ليك طلّي وحيّ لو أمكن ..
قلتي لي لالا .. في الخريف أحسن
والخريف أهو فات وانتي ما جيتي .. وانغمرت الساحات وانتي ولا عليكي
فيها أيه لو يوم مرّة طليتي يا النسيتينا وقلتي ما نسيتي يا ….
أكتب هذه (الهضربات) ساعة فجّة من سهراجة الحمى (أم برد)، وأنا مجندلة في فراشي جندلة العير وليس في جسدي موقعا ليس فيه قرصة حشرة أو لسعة ناموسة أو خرشة ضبانة فلا نامت أعين الجبناء لأن (من لم يمت بالملاريا مات بغيرها) و(كل ابن أنثى وان طالت سلامته يوما على نقّالة حدباء محمول) .. دعواتكم !!
لطائف – صحيفة حكايات
munasalman2@yahoo.com
كل عام وانتي بخير ودايما انشالله موفورة الصحة :lool:
بجد فقدناك كتيييييييير وقلنا يكون سبب الاختفا دا واجبات العيد وكدا ,,,,, ووو كفااااارة وسلامتك وناس النيلين كرامتك ,,, والله يجازي الكان سبب :lool:
والله اكبر ولا نامت اعين الجبنا
الاخت بت سلمان متعك الله بالسحه والعافيه
بيني وبيبنك الشغلانه دي ما عندها نهايه تعالي هنا لاملاريه ولا مياه امطار راكده من خليت خشم القربه اشتقت للملاريه والهضربه
رسلي لي جوازك وجواز سيد الاسم الشقه فاضيه من اول الشهر
محمود حباب
اشيل اللوم واخت اللوم في الفيلة الدايرة ليها طبيقة .. قديما قال سيدنا عمر بن الخطاب لوعثرت بغلة بالعراق لكنت مسئول عنها امام الله لما لم تسوي لها الطريق يا عمر حقا منتهى الإحساس بالمسئولية ، إلا أنها صارت ملوية وضائعة بين سراديب دواوين الحكومة وبس الواحد ماعارف هل ذلك يرجع لنا أن اجسامنا على وخز الباعوض عندها مناعة عشان كدي الحكومة تتعب لي شنو وتصرف ملايين الدولارات للوقاية من الامراض مادام عددنا صار اكثر من ثلاثين مليون يعني لو مات مليون مافي مشكلة .. إن كثير من مشاكلنا لا نعالجها إلا بعد أن تستفحل والبخل بدينار يخسر قنطار والحكومة عليها مسئولية تامة لحل مثل هذه المشاكل وكان عاوزة ترفعي قضية فقدمي شكوتي على نفسك لأنه غلطان المرحوم انتي مخلية الباعوض معضيك لشنو ؟ ثم الموية الراكدة جنب بيتك ابو عيالك عاقد اسوي شنو ما يشيل كوريق وطورية ويدفن الحفر وكان غلبو مايأجر بقروشو .. أختي منى نسيت أقول ليك سلامتك والله يديك ووليداتك العافية وكل سنة وانتم طيبين وربنا مايوريك حقن الكينين والدربات البنتسيك حتى كتابة عمود الشمارات واخر الكلام جانا الباعوض شايلو النسيم يرفع في الملايات لابينفع معه دخان ولابخور ولاناموسيات والسلام
سلامتك أستاذة منى ألف سلامة…ويخسى على الباعوضاية الما عندها زوق دى..!
إن شاء الله يا بت سلمان دمها الشفطتو منك ده ما ينفعها ويخش عليها بالساحق والماحق..
ويفشفش ليها مصارينها الباعوضاية بت( المحلية) دى!!!!!!!!!!!
وكل سنة وإنت بخير وكفارة وطهور إن شاءالله…ألف لا بأس عليك……….
😎 😎 😎 😎
الاخت مني في البداية كل عام وانتم بخير وتقبل اللع طاعتكم ونسال الله ان يعيده علينا وعلي الامة الاسلامية باليمن والبركات ونسال الله لك الشفاء العاجل من الحمي اللعينة وان يحميك من زنات البعوض والذباب وكان الله في عون اهلنا بالسودان.
أعوذ بكلمات الله التامات من كل شيطان وهامة ومن كل عين لامة
اللهم رب الناس أذهب البأس
اشفِ أنت الشافي
لا شفاء إلا شفاؤك ، شفاء لا يغادر سقما
أسأل الله العظيم رب العرش العظيم أن يشفيك يا منى يا بت سلمان-
أعوذ بالله السميع العليم من الشيطان الرجيم من نفخه ونفثه وهمزه
بسم الله أرقيك من كل شيء يؤذينيك
من شر كل نفس أو عين حاسد – او هامة طائرة او زاحفة
__________________________________________
وحكاية الزول الوقع فى الخور وكسر رجله دى حقيقة والان الموضوع مرصود فى مخطوطات السوابق القضائية وهى رجل كان سائرا فى شارع الجامعة الان وكان وقتها الشارع مضاء ليلا زمن الخرطوم بالليل واليوم داك كانت الكهرباء قاطعة وهو ماشى على التلتوار والذى تحته مجرى للامطار مغطى بالواح اسمنتية وكانت واحد غير موضوعة فى مكانها اى كانت حفرة كاشفة فوقع الرجل فى الحفرو وكسر ساقه وبعد اسعافه رفع دعوى على البلدية وحكم له بالتعويض للضرر وكان تعويض مجزى ودة طبعا كان زمن الاستعمار – بس للاسف الان لو اشتكيتى قلتى اسد مش باعوض وضبان ولا حد يسمعك الله يكون فى عونك وعون الجميع
الاخت منى .. كل عام وانت بخير
الله يشفيك ويديك … من كل بعوض ويحميك … ومن شر الذباب يغطيك… والكان السبب فيهو يوريك …. طبعا انتي عارفة السبب في الحاصل ليكي ولغيرك هو منو ؟؟؟ وطبعا دة السر المعلن عنه نهارا جهارا … وما داير ليهو تفسير … بس الله يديكي العافية …
الاستاذه مني
كل سنه وانتي افضل حالاً والي الفردوس اققرب منالاً ومن الملاريا ابعد دايماً
وكفاره والخرطوم كلها سلامتك وكان ما كفت نستورد ليك من بره ومن بره البره كمان …. قصرنا..
ربنا يديكي العافيه.. افتقدناك في العيد…