منى سلمان
أم كلثوم والفتة أم توم
لا أدري متى كان ذلك، ولكن شدني دفاع احدى النساء عن لبس الحجاب، فقد ذكرت في برنامج يناقش فكرة هل الحجاب يحد من قدرة المرأة على الانطلاق والابداع .. قالت تلك السيدة (أنها تغطي شعرها ليسمع الناس صوت عقلها)، وكأنها خافت أن يشوش انسياب جدائل الشعر الحرير والقامة الـ (زي البانة ميالة)، ويغطي تشويشه على صوت أفكارها .. هذا التبرير البلاغي ينفع لتوصيف الابداع الناعم في كل المجالات، ولكن بعد تحويل كلمة (الحجاب) لـ (النقاب) ..
تعالوا نتخيل أن جميع المبدعات في شتى المجالات، وقد مارسن ابداعهن من وراء (نقاب) بطريقة أسمع صوتك ولا أراك أو على طريقة زعيم الشياطين الثلاثة عشر، رقم (صفر) الذي لا يعلم حقيقته أحد .. تخيلوا معي أن نُخرج من شروط التنافس عوامل الصفار والجمال والخدود السادة ونتركها خارج حسابات المنافسة في ساحات الابداع .. أولا تتفقوا معي بأننا لم نكن لنسمع عن الكثيرات مجرد سمع ؟!!
تحدثت من قبل عن برنامج انجليزي خفيف يسمى (بوليس الأزياء) يقدمه أحد المشاهير في صناعة الموضة، وتقوم فكرة البرنامج على الوقوف في الشارع ومحاولة صيد النساء اللاتي يلبسن بطريقة تخالف الذوق العام والموضة، حيث يقوم مقدم البرنامج بتشريح طريقة لبس (المتهمة) التي يصطادونها في الطريق، ويحاول أن يوجهها ويساعدها لتصحيح طريقتها في اللبس.
ذكرت هذا البرنامج مرة أخرى، لأقترح على قناة النيل الأزرق – المتهم الرئيسي – في جريمة أغراق سوق الغناء بكم لا يستهان به من الأصوات عبر برنامج (نجوم الغد)، والذين تلغفتهم وسائل الاعلام – بلا وعا – ودفعت بهم إلى الواجهة، دون أن يمروا على (بوليس الأصوات) ليقوم بتنقية أصواتهم وغربلتها ليفرز منها (المسرسع) و(المنشّز) و(المخنوق) ..
بالمناسبة، لحبوباتنا وصفة طبّية (مجربة) لمعالجة التأتأة (التمتمة)، تتمثل في استجلاب واحد (مصران خروف) لا فرق ان كان أقرن أم سادة ولن يؤثر في الوصفة لون الخروف أكان بيجي .. بني .. أسود، ما يهم في الأمر هو (المصران) حيث تحضره (الحبوبة) وتقوم بلفه حول رقبة الزول (التمتام) وتخنقه به حتى (يبتبت) .. وعندها يفوق من غيبوبته تنحل عقدة لسانه و(يناطق زي البرابندي) وقد فارقته (التمتمة) فراق الطريفي لي جملو ..
أقترح على الاستاذ (بابكر) وطاقم برنامجه الاتفاق مع (سلخانة أم درمان) لتوريد المصارين اللازمة لـ خنق – بعض – خريجي البرنامج قبل فكّهم في سوق الكاسيت، فمنهم من يقوم بـ نمرة أربعة في بداية الشطر الأول من مقطع الأغنية ثم يكمل الشطر التاني بلغة الاشارة بعد أن يقطع صوت وصورة !
حقيقة دعونا نعترف بأن الذنب ليس ذنب البرنامج ولا المسئولين عنه، لأن البرنامج – والحق يتقال – كان فرصة طيبة لابراز مواهب جديدة لولاه لما وجدت الفرصة للظهور، لا يجب أن نعيب البرنامج والعيب فينا .. فالنعيب على طبعنا المحب لـ (التقليعات) ولنعيب بعد ذلك اعلامنا الفني الذي خطف نجوم (الغد) وجعل منهم نجوم (اليوم) قبّال يومهم، وقبل أن يستعدوا لـ النجومية أو يستحقونها ..
يا أهل الفن هؤلاء الشباب خامات تحتاج للكثير من الصقل والصنفرة لتجلو أصواتهم ويتمكنوا من التحكم في درجاتها صعودا ونزولا، كما يحتاج البعض منهم لتنظيف أذانهم الموسيقي من شمع الشتارة والتنشيز فكثيرا ما كان غناء – بعضهم – ماشي بـ درب والموسيقى ماشة بي درب براها !
نرجع لمرجوعنا الأولاني، لنعود ونطالب بـ (بوليس أصوات) خاص لاجازة الأصوات النسائية عموما، شريطة أن يكون جميع المجندات فيه من النساء حتى لا يتجرأ (عشّاق الجمال) على فرض اختيارات (عجب عيونهم) على ذوقنا .. هوي يا رجال العاجباهو بت سمحة اليمشي يدق باب بيت أبوها ويطلب يدها على سنة الله ورسوله .. عشان يسوقا (تبدع) ليهو في بطن بيتو براهو .. نحنا ما عندنا ذنب !!
وخزة:
لو كان الجمال هو كبري الوصول للنجومية والمجد لاكتفت (فيروز) و(أم كلثوم) بـ الغناء في مطابخهن أثناء تظبيط الفتة أم توم !!
لطائف – صحيفة حكايات
munasalman2@yahoo.com
والله يا بت يا موني ابداع ثم ابداع وفعلا الاغاني اليوم والفنانين منهم المخنوق ;( ;( ;( والميت عدييييل كدي:rolleyes: :rolleyes: :rolleyes: لكن محبين البمات السمحات اشيلوا ويردمو لينا…..وعليك الله ورينا فيهم يوم زي ما ورونا
الاستاذة الفاضلة مني
انتي قاصدة الامورة الحلوة افراح عصام ولاشنو((دي غير ساي))
أحسنتي يا بت سلمان يا مبدعة ودمتي :lool: :lool:
الما عاجبو يخنق رقبتو بمصران ديك عشان ما يعوعي فينا 😡
الاستاذة منى تحياتي ::
شايف اخونا دة جاب ليهو مصنع تلج كاااااااااااامل … وبقى يكاوي في الناس ..
المهم نختلف او نتفق معك استاذتنا الكريمة ولكن لا نفسد للود قضية فنحن في طريقنا من والى عالم الصحافة لا بد لنا من غشوة لخيمة ام معبد هذه فما اشبه راكوبتك هذه بخيمة ام معبد ..يغشاك درب المصطفى ان شاء الله ..
شنو ليك يا ابو عبدالله ؟؟ تقدر تجاريني ؟؟ بورت ليك تلجك موش كدة ..
معذرة استاذة منى على التخريمة لكن والله انا في رايي الشباب ديل في بعض منهم غناييين بجد وفي غنايات كمان وسمحات ..وانت مدفوعة باستراتيجية الدفاع عن العرين البقت تهلوس ليك فايما امراة لها ابليس صغير يتربع في مؤخرة الدماغ مكان الذاكرة كلما جلست في الامسيات تقوم بحك راسها فياتي مسرعا هامسا لها : الراجل دة الاسمو سيد الاسم دة شكلو داير يعرس عايني ليهو بيبحلق في البنات البيغنن ديل كيف ؟؟
لكن والله في واحدة غنت اغنية الليمون للفلاتية كانت رائعة جدا وكمان غيرت حمار كلتوم لحاجة كدة غايتو ما حفظتها..
بعدين التمتمة قالوا الغنا بيروحا اهو شايفها عند ياسر وزمان واحد كدة اسمو قرشي الا البتمتو وبيغنو ديل كمان دي حاجة جديدة
متعك الله بالصحة والعافية كما تمتعين القراء بسمح الكلام والحكي ..
غايتو شكلك قااااصدة ليك بنيات من نجوم الغد ديل 😀 ههههههههه لكن قصدك معروووف ههاهاها , بعدين يااستاذة انحن نعشق التقليد والموضة جات موضة اسمها ركشات وامجادات كل الناس تشتري كمان جات موضة اسمها الغناء كل الناس عاوزين يبقو فنانين المانع شنو خلي الناس تنداح و تجوووط وكل ناس بزوقهم يعني المابعجبوك انتي بعجبو اللااااف من البشر هسي امشي اقري في خبر هنا في النيلين عن خطوبة ولا عقد مابعرف بتاع واحدة من البنيات اياهن شوفي الجيش الجرار من المعجبين والمكسرين:lool: , النافع منهم بستمر وبصمد .
لكن الليلة في زول قال احسنتي :lool: ياربي دي فعلا اشادة ولا تريقة :rolleyes:
ربنا يحفظك يااستاذة من كل شر وحسد
شنو يابت سليمان والله دى غيره ساكت .
الابن الموهبة اديب الامام بخيت غنى اغنية ظريفة وقديمة فى مسابقة نجوم الغد وهى اغنية الوافر ضراعو وفيها مقطع للجمال لم يغنيه ما عارف ليه بقول هذا المقطع: النهيد رمانة والشلوخ مطارق جوز البرتكانة للقليب حراق بينى وبينك بس مية والف فارق تضوى للمشارق – والكثيرين غنوا ووصفوا معايير الجمال – وبينى وبينك يا ستى منى هادول نجوم الغد لو خنقوهم بى مصران امكن يتلحسوا ونبقى فى سين وجيم وجنائية وهلم جرا احسن ديل يشربوا موية عطرون بملح الليمون تلقى الصوت زى الكمنجة ربنا يعطيك العافية
والله كلامك صحيح يا استاذة يعنى البت كان سمحة انشاء الله تعويص برضو الناس بشوفو قناها سمح والبنات الشينات الواحدة لو صوتة زى الصاقعة بشوفو شين واقرب مثل عندك برنامج اغانى واغانى مع انو منار صديق من اجمل الاصوات التى طرقت ازنى من قمته لكن ما ادوها حقها وظالمنها على طول وتجى افراح تاخد الجو مع انو مع عندها صوت واى قنية بتغنيها بتخربة لكن نعمل شنو الناس بقوا بشوفو بس ما بسمعو
( حقيقتا لو فتحتي موضوع الغناء الا تكتبى فيهو ليل مع نهار لانه موضوع شائك
ومشعب ويحتاج لمجهود خرافي حتي توفي الموضوع حقه الكامل .)
&اتمني ان تعقدي مقارنه بين الجيل السابق ومتسلقي الساحه الان !
ربنا يوفقك في قول النصيحه .
هوووووووووووى يابت امى مالك ماكنتى ماشه كويس فى كتاباتك انت زاتك بقيتى تنشزى هسع ناس نجوم الغد ديل موش احسن لينا من دق الباب وجانا وانا جريت ليهو حفيانا وموش احسن لينا من ناس ورا ورا ورا ورا لو مالموهم ناس بابكر صديق والمجموعه والله هسع كان جابو لينا غنا نوعو براهو وبعدين المعاهم ناس خبره ومعيدين فى معهد الموسيقى يعنى البطلع من نجوم الغد ماتخافى عليهو ولا انتى دايره الغرزه بتاعت نجاة ههههههههههههههههه