خطاب الرئيس البشير فى الفاشر زيارتنا لدارفور لتأكيد رغبتنا فى السلام
لما وقعنا اتفاقية السلام في ابوجا كنا مقررين نجيب السلام و معروف ذلك اليوم ان اهل دارفور كلهم احتفلوا بتوقيع السلام و معظم حملة السلاح في اليوم داك انضموا للسلام لكن اعداء السودان و السلام و دارفور هم الذين لم يعجبهم ذلك لا يريدون سلاما يتحقق في دارفور لانهم يظنوا ان دارفور هي المشكلة الوحيدة الممكن من خلالها يدمروا السودان و انها المدخل لاجندتهم و اهدافهم في السودان نقول لهم نحن في السودان و كل اهل السودان اجمعنا ان نحقق السلام في دارفور و حقيقة كلما نمشي خطوة للامام و نحقق انجاز و تظهر بوادر سلام حقيقي الجماعة ديل يجوا يحاولوا يسوطوها يرجعونا للمربع الاول يحاولوا يشغلونا بقضايا جانبية و هامشية و بدعاوي كاذبة الكل سمع ان في احتفالاتنا باعياد الانقاذ انا حددت مبادئ واضحة لتحقيق السلام في دارفور و التزمنا بحل قضية دارفور اولا توفير الامن للناس المقيمين و النازحين و اللاجئين الذين يريدون الرجوع لديارهم و اهلهم و اليوم في هذا الميدان ودعنا الف اسرة راجعة لمناطقها
و ليست هذه اول مجموعة ترجع و لا اخر مجموعة نحن التزامنا ان نوفر الامن لكل مواطن يريد الرجوع نوفر له الخدمات التعليم و الصحة و الماء تعاهدنا ان نقيم العدل بين الناس لان العدل هو اساس الحكم و دولة الظلم ساعة و دولة العدل الي قيام الساعة نحن بنعرف الله و بنخافه و نخاف من دعوة المظلوم لانه ما بينها و بين الله حجاب لذلك نريد رفع المظالم و نرد الحقوق و نجبر الضرر لكل متضرر و نقتص لكل من تعرض لاذي , بعد ما طرحنا نقاطنا و مبادئنا لحل قضية دارفور بتوفير الامن و اعادة النازحين و التعمير و الخدمات و التنمية في دارفور دعونا كل الاحزاب السياسية و لما دعوناهم ما كان في اي خبر او معلومة عن اوكامبوا كلام اوكامبوا لا يشغلنا عن شغلنا و لا حا يعطل لنا شغلنا لاننا عارفين القوي المحركاه و الذين وراه و الذين كلما مشينا قدام يحاولوا يرجعونا للوراء لانه تحققت اشياء كبيرة في الفترة الماضية فقد اجزنا قانون الانتخابات و باجماع كبير من اهل السودان و قلنا السنة القادمة في انتخابات نزيهة و حرة و بمشاركة كل اهل السودان و سنحضر الناس من برة كل من يريد ان يراقب او يتفرج داير يتأكد من نزاهة الانتخابات مرحبا به و حانوفر له كل السبل و التسهيلات ليري بعينه و يسمع باذنه لكن الكلام دا لا يردونه هم لان الانتخابات هي شرعية شعبية و هي تفويض شعبي مافي زول بعد كدا بقدر يتكلم نحن نتحدث عن حل مشاكلنا و كانوا بفتكروا ان مشكلة ابيي مشكلة كافية لاعادة الحرب بين الشمال و الجنوب مرة اخري لكن نحن حققنا السلام في الجنوب و نحن مقتنعين و سعينا له من اول يوم جئنا و فتشنا عنه في اديس و نيروبي و ابوجا الاولي و الثانية في اوربا و الايقاد الي ان وقعنا نيفاشا و هذا اكبر انجاز تحقق لاهل السودان بعد الاستقلال لذلك نحن حريصين رغم ان بعضهم يحاول يخرب السلام تاني من جديد نحن التزمنا باتفاقية و حا ننفذ الاتفاقية
هذا انجاز و نحن محافظين عليه و لما اتفقنا مع الحركة علي قضية ابيي برضوا ما رضوا لما طرحنا مبادرتنا للسلام و جمع اهل كل السودان و كل اهل دارفور لتحقيق السلام في دارفور الكلام ما عجبهم لكن ردنا ليهم ان التنمية ستستمر طريق الانقاذ الغربي حا يقوم استغلال الثروات سيستمر البترول و الغاز في دارفور و المعادن لا ننا نريد لخيرات دارفور لاهل دارفور و للسودان ما حا نخليها رهن عند الاجنبي كما كان قبل الانقاذ قبل الانقاذ كان البترول مرهون لشركة امريكية و الشركة حابساه داخل التراب و قالوا ما حا نطلع بترول و ما بطلع الا تجئ حكومة صديقة لامريكا ما عندهم اصدقاء دايرنها حكومة عميلة لهم لامريكا , نعم التنمية ستستمر
قبل فترة جاءنا واحد و قال حقوا تعملوا حاجة لي ناس دارفور افتحوا ليهم فرع جامعة في دارفور قلنا ليه دارفور بها ثلاثة جامعات ليس فرع جامعة يا اخي و دارفور فيها كلية تقنية و سنزيد الجامعات و الكليات التقنية و المدارس و مشروعات المياه لما سمع الكلام دا ما صدق لانهم قيلين دارفور دي حكاية مولعة نار ناس تضرب في بعض وناس تقتل في بعض التنمية حا تمضي و الخدمات و نحن معاكم و الان سنشرع بعد ربط دارفور بطريق اسفلت بالخرطوم و ببورسودان الان بنخطط للشبكة القومية ان تدخل دارفور و الان وقعنا اتفاقية لانشاء محطة كهرباء في الفولة ستغطي كردفان و دارفور بالكهرباء لكي نخلص من جنريتر تعطل او جزلين قطع او غير ذلك , سنربط دارفور بالشبكة القومية يعني كهرباء مروي و الروصيرص و المولدة في الخرطوم و التي في الفولة كل هذه دارفور حا تأخذ نصيبها منها ان شاء الله و الان نحضر لمبادرة سلام دارفور التي اعلناها في عيد الاستقلال الان نحن ماشين و جمعنا القوي السياسية و اللجان شغالة لتبلور رؤية واضحة لحل قضية دارفور بكل جوانبها سوا الامن و الاستقرار و السلام و عودة النازحين و اللاجئين توفير الخدمات المياه و الكهرباء و الاتصالات و التعليم و الصحة تنمية الطرق و التعدين و البترول و المعادن و الكهرباء المشاريع الزراعية و تنمية الثروة الحيوانية توفير المياه لكل اهل دارفور و لكل ثروات دارفور من المواشي برنامج متكامل بعد نضع الاسس بتاعته سنجمع له كل اهل السودان و كل اهل دارفور يشاركوا بقياداتهم الاهلية والاجتماعية والدينية والسياسية والاقتصادية حتى اخواننا فى الحركات الموقعين وغير الموقعين كل ابناء دارفور كلهم حا يشاركوا وحا ندعوهم الى المشاركة عشان نحقق السلام فى دارفور عشان نحقق العدالة فى دارفور والامن والطمأنينة والتعايش السلمى بين اهل دارفور التى يحاولون تخريبها وتقسيمها الى عرقيات وشعوب وقبائل
نحن فى دارفور كلنا يقول لااله الا الله محمد رسول الله ( صلوا على رسول الله لانها بتغيظ الكافرين والمنافقين والمتآمرين عشان كده ذيدوا الصلاة على رسول الله ) ونحن معاكم وبيكم انشاء الله حتى نحقق كل السلام والامن والطمأنينة فى كل ارجاء السودان انشاء الله والتحية ليكم والشكر ليكم على هذا الرد نحن من هنا بنشكر كل الناس الذين وقفوا معنا والذين ايدونا من الخارج الاخوة فى الدول العربية والافريقية والاسلامية ودول عدم الانحيازو فى جميع بقاع العالم وكل الاحرار فى العالم الذين عرفوا انها مؤامرة على السودان واستهدافا له ولخيراته واستقراره لكن نحن انشاء الله نقول لهم ان كل هذا التأمر لايهمنا لاننا بنقرأ قول الله تعالى ( الذين قال لهم الناس ان الناس قد جمعوا لكم فأخشوهم فذادهم ايمانا وقالوا حسبنا الله ونعم الوكيل ) ونحن حقيقة ااذا هم قاصدين يخوفوننا او يرعبوننا والله نحن لانخاف الا من الله سبحانه وتعالى ولن نخضع الا لله سبحانه وتعالى ولن نركع الا لله سبحانه وتعالى قالوا بتأمرهم هذا سوف يغيروا الحكومة لكن ياجماعة الملك بيد الله هل هناك شك فى هذا الكلام ؟ هو الذى يؤتى الملك من يشاء وينزع الملم ممن يشاء قالوا سوف يحاصروننا وسيمنعوا عنا ونحن نقول لهم الارزاق وين انها بيد الله ربنا سبحانه وتعالى قال ( وفى السماء رزقكم وما توعدون ) والله نحن بنوم والحمدلله الارزاق بيد الله والاعمار بيد الله والملك بيد الله والقوة بيد الله عشان كدا لانلجأ الا لله سبحانه وتعالى ونحن اهل السودان موعودين بخير كتير يا جماعة بس نمسك فى الله قوى ونتوجه له لانه العالم الآن بيشكو من شنو يا جماعة ؟ منالمجاعة العالم كله الآن فيه مجاعة العالم كله فيه نقص فى الغذآء نح هنا فى السودا ن حنأكل الناس كلهم يا جماعة ان شاء الله حنوكل ناسنا ونوكل جيراننا ونسد النقص فى العالم كان فى القمح ولا فى الحبوب ولا فى الدخن ولا فى الذررة ولا فى اللحوم نحن اهل السودان ربنا انعم علينا بخير كتير ونشكر الله سبحانه وتعالى بنشكره بالعمل انه نحن ننهى المشاكل بيناتنا ننهى الظلم بيناتنا نطرد الشيطان من بيناتنا ونوحد صفوفنا ان شاء الله الله اكبر الله اكبر لااله الا الله ولا نعبد الا اياه مخلصين له الدين ولو كره الكافرون
و السلام عليكم ورحمة الله
سونا [/ALIGN]
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة