منى سلمان
جهينة المأذون تقطع قول كل خطيب 2-2
تعودت فايقة على أن تحكي لأمها في التلفون مستجدات علاقتها بزميلها كلما إتصلت بها، ولذلك ما إن عادت لسنار في الإجازة حتى إنفردت بأمها وأخبرتها عن رغبة (محجوب) وأسرته بزيارتهم للتعارف، لم تستطع الأم إخفاء فرحتها فسارعت بإخبار والد فايقة وخالاتها بينما تكفل والدها بنقل الخبر لأشقائه وشقيقاته .. إنتشر خبر- ود الخرطوم – الجاي يخطب (فايقة) وعم الأهل والجيران والأحباب.
بح صوت (فايفة) في محاولتها الشرح للأهل المجتمعين لترتيب الخطوبة بأنها مجرد زيارة للتعارف ولكنهم إسكتوها على الفور بالقول:
ده كلام ناس كبار إنتي ما بتعرفي ليهو .. هسي الناس ديل جايين من الخرطوم عشان يعاينوا لينا ويرجعوا وبس؟؟
أجابتهم في يأس: جايين يتعرفوا علينا .. قالوا كده وبس!!
ألقمتها أمها حجر الحجة قائلة:
ياها عوايدنا من الدنيا دي خلقوها .. الناس وكت يقولوا جايين نتعارف .. ياهم بيفتحوا خشمم ويقولوا عايزين بتكم وأنحنا بنقول ليهم أديناكم يا بتي .. ولا إنتي دايرة تقطعي ليك كلام ساكت من راسك وتخلينا ننفضح مع النسابة الجداد.
لم تجد بدا من الإستسلام ولكنها حاولت أن تطلب منهم تبسيط التكاليف وإختصارها على الشاي والكيك ولكن عمها إنبرى لها بالقول:
ها بت إنتي مطرطشة .. ناس جايين من السفر ما دايرانا نضبح ليهم ونكرمم .. ولا دايراهم يقولوا أهلك بخيلين .. حرم نضبح ليهم لمن نشبعم شية ومرارة كمان.
حاولت أن تجعل آخر معاركها في سبيل إختصار عدد المدعوين على عمومتها وخؤلتها فلم تستطيع فحسب قول أمها:
الزول عاد ببقى بلا جيرانو .. قالوا جارك القريب ولا ود أمك البعيد.
إنهارت آخر قلاع مقاومتها وإستسلمت للتيار بعد الحكاية (إطمبجت) فلم تجرؤ حتى على الإتصال بمحجوب وإخباره عن المستجدات وإعتمدت على الاقدار لتدير دفة الأمور حسب المشيئة.
ألقت بمخاوفها وراء ظهرها وإنجرفت مع تيار التجهيزات للحدث السعيد .. تبرع خالها بالفنان الذي سيحيي ليلة الخطوبة ورافقت هي شقيقاتها للسوق وإختارت ثوبها القشيب وطقمته بالفستان والجزمة، وفي اليوم الموعود غادرت للكوافير بينما إنشغل أهل البيت بالذبائح وطبخ الطعام وإنهمك إخوتها الصبيان بتزيين الكراسي لجلسة العرسان.
بعد صلاة المغرب إبتدأ تقاطر الضيوف وإكتظ الحوش بالمعازيم ثم أقبلت حافلة تحمل الفنان وفرقته بينما جلست (فايقة) على الكرسي بكامل زينتها تنظر لساعة يدها بين الفينة والأخرى في قلق على تأخر (محجوب) وأسرته.
تحت ضغط تقدم الوقت بدون حضور أهل العريس أضطرت أم (فايقة) على إصدار أوامرها ببدأ توزيع العشاء ولم يتردد الفنان في نصب الاته وبدأ الغناء .. وهكذا كانت ملابسات المشهد الذي تسبب في خلعة (محجوب) وأسرته عند وقوفه بالسيارة أمام البيت وصياح الصبية : ناس العريس جوا من الخرطوم!!
محمولا على الأعناق ومزهولا جلس (محجوب) بجوار (فايقة) بينما تناوشته الأيدي:
أبشر يا عريس!!
وعلى الجانب الآخر جلست أمه (تجقجق) وتغلي غضبا مع شقيقاته كلما وآتتها الفرصة وغفلت عنها أعين أهل العروس، قالت لبناتها:
هسى ده يقولوا عليهو شنو؟؟ عرس بالقوة ؟؟ الزول تقول ليهو جاي أتعرف عليك تجي تلقاه ساويهو عرس عديل بي وشو؟؟ … لالالا .. الناس ديل ما عاقلين وللا البت دي فيها عبرة تلقوها عيانة ليها بي مرض كعب ولا مجنونة عديل ودايرين يلصقوها لينا ساكت!
وجوار كراسي العرسان مال عم العروس على (محجوب) قائلا:
عرفنا إنو والدك متوفي واداك طولة العمر .. لكن هسي أكان قلتا خير اكان نعقد ليك .. حرم هداك مأذونا جاهز والعشاء إتعشاهو خلاص!!
لطائف – صحيفة حكايات
munasalman2@yahoo.com
شفت الحركة دي مرة وسمعتها بيها كتيييييييير ، لكن ابدا ما بحترم ناس يعرسوا لبتهم بالرجالة ،
يا اهل البنات احترموا الراجل الجاكم دا وخلوا سياسة اخنق فطس وفي الاخير تقولوا ارتفاع عدد الطلاقات في البلد والرجال ما بيتحملوا مسئولية ، ليه الراجل يتحمل مسئولية وما يطلق لو اختطفوه عديييييييل نص النهار، سمعت واحدة بتقول نفسي ازور البت الحابيها ولدي واتعرف عليها بس خايفة من الموضة حقة الزمن دا تحلف بالله تقول ما جينالعقد جينا نتعارف ساااااااااااااااااااااكت يقولوا ليك خير البر عاجله .
استازه مني تحياتي والله ماكان تقولي اسم المدينه بنات سنار بزعلو منك وتاني اي واحده اهلها بستعجلو بنقول زي بت سنار وامكن تشتهر المقوله اكثر من اهل العوض
هسى ده يقولوا عليهو شنو؟؟ عرس بالقوة ؟؟ الزول تقول ليهو جاي أتعرف عليك تجي تلقاه ساويهو عرس عديل بي وشو؟؟ … لالالا .. الناس ديل ما عاقلين وللا البت دي فيها عبرة تلقوها عيانة ليها بي مرض كعب ولا مجنونة عديل ودايرين يلصقوها لينا ساكت!
ههههههههههههه
والله كلام المرة دي حقيقة لزوم الاستعجال شنو صحي ؟
وجوار كراسي العرسان مال عم العروس على (محجوب) قائلا:
عرفنا إنو والدك متوفي واداك طولة العمر .. لكن هسي أكان قلتا خير اكان نعقد ليك .. حرم هداك مأذونا جاهز والعشاء إتعشاهو خلاص!!
هههههههه
شوفو عمها ابدا ما شغال بي أم العروس
والله ديل بخلوا الواحد يلاوز من البت ، يا بت سليمان وشن قال محجوب ؟ ان شا الله ما يكون طلقها قبل العقد …
الاخت مني
لك التحية
هههههههههههههههههه
كدا العرس ولا بلاااااااش
عفيت من ابو العروس الداير يعف بنتو ويسهلها علي عريسها .
الله يوقعنا في راجلا زيو .:eek: ( )
ههههههههههه
والله يامني ده القطع ولا بلاش
البتكلم معاك ده كنت عايز واحده زميلتي وعايزه لي خمسه سنه المهم خطبتها قبل سنتين امس القريبه دي كنا ماشين لسد المال والشيله علي ان يكون العريس بعد كم اسبوع كده او شهر
قبل ذهاب الاسره قررت ان يتم عقد القران وفعلا كلمت الوالد واتصل بابو العروس وزولك ماصدق وتم العقد باذن الله والحمد لله
لكن بيني وبينك شفتي زول بقطعو مع نفسو بالطريقه دي ويقرر العقد في ساعه بس
وربنا يوعد اي عازب
الحصَّة دى مش كان أخدناها السنة الفاتت ……..واللا القبلها ماعارف ؟ياللا يا ماما شوفى لينا حاجة جديدة…..الله يديك العافية
صحيح نحنا فى سنار كرم وجود وضيافه وتربينا على هدى حكمة الشيخ فرح ودتكتوك ولكن لن نزوج بناتنا دون السؤال المشروع عن دينه وخلقه واحترامه وادبه وان كان كذلك نزوجه امتثالا لقول المصطفى عليه افضل السلام واتم التسليم (( من اتاكم ترضون دينه وخلقه فزوجوه الى اخر الحديث )) وكان الاجدى ان لا تذكرى بلدا بعينه حتى لا يفر الخطاب الذين هم اصلو مخلوعين ويخافون من الماذون والورقة المسمية القسيمه او العقد وزديهم خوفا من ناس سنار الذين لا يتركون فرصة للتعارف للاسرتين وتكونى ساهمت فى بورة كثير من بنات سنار وسنار تعنى كل الولايه بمدنها وقراها ومحلياتها