مجذوب أونسة في دردشة رمضاتية
{ رمضان كريم عليك يا أستاذ؟
– أولاً أود أن أوجه التهنئة عامة لكل الشعب السوداني داخل وخارج البلاد بحلول الشهر الكريم، وتهنئة خاصة لجمهوري وبقول ليهم (كل سنة وانتو طيبين وتصوموا وتفطروا على خير).
{ قالوا عنك (سيد جرسة) في رمضان؟
– أفو.. نحنا أهل دار جعل، بعدين رمضان ده شهر نحن بننتظروا بفارق الصبر لانو شهر فيهو خير ورحمة للغني والفقير وفيه عتق من النار.
{ هل تعتقد ملامح رمضان اختلفت عن ايام زمان؟
– اختلاف كامل.. زمان رمضان كان ليهو طعم مختلف لانو فيهو لمة الأهل والجيران، ولكن ربما هذا الاختلاف في المدن فقط، وأما في الأقاليم مازال طعم رمضان هو هو بنفس الملامح السودانية الأصيلة.
{اوصف لنا شكل صينية فطور رمضان ؟ انتو ناس (البيتزا) ولا ناس (عصيدة) ؟
– نحنا أهل (العوض) العصيدة لو مافي في الصينية مافي زول بقعد فيها.. (بيتزا) بتاعت شنو.
{ هل تقوم بمساعدة زوجتك في المطبخ ؟
– أنا شاطر في المطبخ و”بظبط” حلة عجيبة.. وبساعد زوجتي بالمزاج.
{ بتحب تشرب شنو من العصائر؟
– والله نحنا حبوباتنا اخترعوا لينا عصير ما بنبدلوا بأي شيء هو (الابري(.اي (الحلومر)
{ وكيف تقضي اوقاتك في رمضان؟
– دائماً الشغل في رمضان بكون في الجامعات والقطاعات الخاصة، وعلى النطاق الشخصي أعشق السمر مع الأصدقاء وأمضي معظم الوقت برفقتهم.
{ عادة سودانية رمضانية حزنت على اختفائها؟
– (الضرا) (فطور الشارع) رغم أنه لم يختفِ بصورة نهائية، ولكنه قل كثيراً ونادر ما تلقي ليك ناس فاطرين في الشارع.
شهر رمضان شهر ترويحي فيه الكثير من البرامج.. طابعها المنوعات.. رأيك شنو في الفضائيات.. هل استطاعت أن تقدم شيئاً جيداً في رمضان هذا العام؟
– كل الفضائيات تجتهد من أجل ظهور أفضل، ولكن اعتقد أن عشق الشعب السوداني للغناء الأصيل جعل معظمهم يتجه للبرامج الفنية، وأظن أنها وفقت في جذب المشاهدين.
{ ماذا تحضر لجمهورك؟
– جمهوري موعود بعدد من الأغنيات الجديدة أتمنى أن تعجبه وتنال رضاه.
{ أخيراً ماذا أنت قائل؟
– الشكر أجزله لصحيفة (المجهر).واقول ليكم رمضان كريم
دردشة – سعدية إلياس- صحيفة المجهر السياسي
