منى سلمان
طلوع الجبل بالبُرُودية
يا ولدي إن مرتك قالت ليك قوم أطلع الجبل، أخير ليك اطلعوا بالبرودية قبّال تحرر الشمس عليك!
كان ذلك الاعتراف الخطير ضمن لقاء تلفزيوني ضمني والاستاذين (شجرابي) و(أبو شنب) .. طبعا لم أفوت الفرصة يومها في مناكفة الاستاذ بالمغالطة فقلت له:
أنحنا معرسين الجعليين .. وترانا نحنا القاعدين نطلع الجبل بالبرودية !
تذكرت هذا الحوار الضاحك عندما طالعت تفاعلات المشتركين في موقع (النيلين دوت كوم) على مادتي (راجل سيدة) المنشورة ضمن مقالات واعمدة الموقع، فقد علّق صديق اللطائف (فرح الأمين) على تصرف (جعفر راجل سيدة) مع أفراد لجنة المسجد، الذين جاءوا لطلب توقيعه بالموافقة على بناء مسجد في ساحة الحي، فاستمهلهم حتى يستشير (سيدة) !
علّق الصديق فرح بنفس تصريح أستاذنا (ميرغني أبو شنب) فقال:
صدقوا يا جماعه إنو الراجل دا عاقل جداً، لأنو المرأة اذا قالت ليك اطلع الجبل .. إختار الوقت البارد وأطلع فيه .. لأنك في النهاية بتطلع بتطلع .. فأحسن ليك أطلع بالبروديه !!
قادني ذلك (الاندياح) والبوح الرجالي، واقرارهم بعضمة لسانهم وتسليمهم بسطوة النساء وتسلطهن ومقدرتهن على فرض ارائهن على الرجل، للتفكر في قوة شخصية الزوجة وتأثيرها على شخصية الزوج .. وايهما يفضل الرجل السوداني:
المرأة التي تلوذ بضعفها وانوثتها للتعبير عن ذاتها، أم تراه يفضل المرأة ذات الشخصية القوية الواثقة من نفسها ومن قدراتها؟
هناك مثل هندي قديم يقول: (المرأة تعجب بقوة شخصية زوجها، ولكن الزوج يخاف من قوة شخصية زوجته) .. لا أدري لاي قبيلة ينتمي الصديق (فرح)، ولكن أستاذنا (أبو شنب) خص الجعليات من بين النساء السودانيات فقط بالمقدرة على فرض الرأي، لاتصافهن بقوة الشخصية والصلابة .. فقد اخبرني بعد نهاية اللقاء التلفزيوني بأن الواحد منهم أي الجعليين يقّدر زوجته والتي هي ابنة عمه في الغالب، لذلك يخضع لمشيئتها من باب الاحترام والتقدير، أو لعل هذا ما فهمته من شرحه للمثل .. وبالتالي يقودنا توضيح الاستاذ (أبو شنب) لحقيقة اختلاف تقيم الرجل السوداني لقوة شخصية زوجته، بإختلاف القبيلة التي ينحدر منها وتقاليد واعراف تلك القبيلة، كما قادتني لحقيقة أخرى اعتقد انها معلومة للجميع، وهي أن تقدير الرجل لزوجته يزداد بزيادة درجة قرابتها منه.
أما إذا تناولنا الموضوع بصورة عامة بعيدا عن العصبيات والعرقيات، فكلنا يعلم أن الحياة تحتم على المرأة، بل وتفرض عليها أن تكون قوية الشخصية .. فـ قوة الشخصية تتيح للمرأة أن تدافع عن حقها، و تستطيع بها أن تحمي نفسها من عوادي الزمن بمختلف انواعها، ولكن طريقة المرأة في إثبات قوية شخصيتها هي المحك.
فالمرأة كائنة فظيعة كائنة دي – عاطفية وحساسة، ولكنها تستطيع من خلال قوة شخصيتها أن تحفظ التوازن بين اظهار رقتها ومشاعرها ..وبين التعامل بقوة وصلابة في المواقف التي تحتاج إلى ذلك، ففي تلك الموازنة الدقيقة يكمن ذكاء النساء الفطري والذي نسميه ظلما بـ (كيد النساء) فالمرأة الذكية هي من تستخدم قوة الشخصية بذكاء حتى لا تشوه تفاصيل أُنوثتها التي ميزها بها الله سبحانه وتعالى.
(خلقت المرأة من ضلع أعوج) يعني كانت لابدا لابونا آدم جنب قلبو .. ولعل صعوبة التعامل معها والمقدرة على فهمها قد جاءت من هذا الاعوجاج والـ (لكنة) فلو اتصفت المرأة بقوة الشخصيه رغم عوجتها، لازدادت جمالا على جمال، فقوة الشخصيه ليس في ان تكون المرأه صارمه او حديديه، بل تكون قوتها في ثقتها بنفسها وقدرتها الفائقه على إقناع زوجها باسلوب مهذب ولطيف أن يعجل من بدري بدري بطلوع الجبل بدلا عن الخوتة ووجع الدماغ .. لانو في الآخر ياهو سيك .. سيك .. طلوع الجبل معلق فيك!!!
لطائف – صحيفة حكايات
munasalman2@yahoo.com
لو فيها فظاعة هي أنت ومواضيعك بس وين الواحدة البتوزن الامور وتقنعنا بالطلوع من بدري بحكمة ولطف دون مهاترات وزحمة
يا استاذه الاعتراف شيء والعمل شيء آخر والله انا زول كويس جدا في البيت على العموم الخضره إذا جبتها من السوق ما بورقه زي ما قال الراجل لكن في جماعه بجيبوها من السوق ويورقوها كمان وانا ما منهم
جعفر راجل سيده ماعرفناه مكتوب في شهادة الجنسية جعلي وللا شايقي وللا دنقلاوي وللا حلفاوي ؟ وكم سوط انضرب في عرس ود عمه قدام البنات عشان يثبت رجولته وكان قال احي مابطلع الجبل حتى بالبرودية وأمثاله من النوع العليه من الصباح قش الحوش بالبرودية قبل الحرورية؟؟:cool:
الحقيقة دى موضوع حساس، يعنى فى البيت توجد امور حلها والراى فيها يخص النسوان بس، مفروض الراجل يدى المره حقها فيهو، وهناك امور تخص الرجالة بس النسوان ماعندهم دخل فيها، زى التبرع للجامع مثلاً (يا راجل ياسيدة)، وبينهما امور متشابهات يكون فيها الراى من الطرفين ( يعنى ما تشاورهن وتخالفوهن لو بقى رايهم صاح)، لكن فى نوع من النسوان لمن يشوف الراجل اخد برايهم يقول ليك اطلع الجبل، والادهى شوفونى بدى راجلى الاوامر لحدى ما تلغيهو ويبقى راجل سيدة، بعد داك هى زاتها ما بتكون مرتاحة لللقب ده.
على العموم الراجل كائن -ــ ولا فظيعة ولا حاجة ـــ عنده حقوق مفروض ما يتنازل عنها ولا المره تجابده فيها.
😎 انت لطيفة و لطايفك الطف بحب مقالاتك و كل يوم اول حاجة بشوفك كتبتي لينا شنو
حكاية السيطرة دي حقتنا نحنا الشايقية لكن بفتكر المفاهمة مهمة بين ال2
الله يعطيك الف عافية على مواضيعك الشيقة والتي تخص شريحة كبيرة من مجتمعنا السوداني وفي الحقيقة أنالكلمة الطيبة والدقة في اختيار الألفاظ يمكن أن تجعل الرجل مش يطلع الجبل بالبدرية بل يكسر الجبل فاليك مثالا :
مثلا واحدة تقول لزوجها الله يعطيك الف عافية يا أبومحمد ويخليك لي ولا يحرمني منك ومن مساعدتك شيل معاي السرير ده وواحد.
وواحدة تقول لزوجها قوم نائم لي أسع نامت عليك حيطة وتجر منه الملايه .
عليك الله الأول ده ما ليه حق يطلع الجبل نصت نهار .
سلام اختي الفاضله
شكرا علي مقالاتك الرائعه .عتدما كنت مقيمه بالسودان كنت اشتري جريده حكايات من اجل قراءه عمودك كسبب اساسي. انا الان اقيم ببلدا طيرها عجم واجد في كلامك الحلو ريحه جبنه الضحويه في راكوبه حبوبه .ما قصدي انك حبوبه:cool:
لكن عندي ليك عتاب وعلي راي حبوبه اللوم عشم.ليه ما بتنزلي مقالاتك هنا بصوره يوميه .علي ما اذكر في حكايات كانت يوميه
خالص تحياتي لك ولاسرتك الكريمه
😉 😉 😉 😉 😉
الاستاذة الفاضلة / منى
لك التحية والاحترام والشكر على مواضيعك الشيقة
بخصوص طلوع الجبل ده امر هين حتى في عز الظهر. والدتنا جعليه عندها راي تاني اذا طلبت امر مهم وما تنفذ بتقول هم وين الرجال؟ ماتو زمان في (كرري)
الغاليه منى
موضوع رائع زي روعه الكاتبه
أما موضوع علاقه الزوج بالزوجه مسألة فهم
لو فهمت القدامك تقدر تسخره وبيقولوا عشان تعرف الإنسان لازم تعرف كيف بفكر
وعشان تفهمه لازم تتيح له الفرصه ليتكلم تسمع فلو تعلم الإنسان كيف يسمع يقدر يتعرف على محدثه فكل إنسان موجود تحت لسانه .
ولكي كل الود والتحايا يامني