رأي ومقالات
الفاتح جبرا : إنتو ما مسلمين؟
– يا علقمة .. يا علقمة
– نعم مولاي
– أبحث لي عن عشرة أشخاص من أفراد الرعية المعدمين ؟
– كل الرعية معدمة يا مولاي
– قم بإختيار أكثرهم فقراً وبؤساً
– إنهم كثر يا مولاي
– بقول ليك ايه .. بلاش لماضة وأمشي جيب أسماء أي عشرة مواطنين
يخرج علقمة بينما يمسك الوالي بهاتفه الجوال :
– مسؤول الزكاة؟
– نعم يا مولاي .. أريدك الآن في خيمتي لإجتماع عاجل
– حاضر يا مولاي
يدخل الحاجب وهو ممسك برقعة من الجلد يسلمها للوالي :
– هذه يا مولاي إسماء عشرة أفراد من الرعية المعدمين تماماً
– وماذا تعني بتماماً هذه
– يعني يا مولاي ما عندهم أبوالنوم
يخرج الحاجب ثم يعود :
– يا مولاي مسؤول الزكاة يستأذنك في الدخول
– إإذن له
يدخل مسؤول الزكاة وهو يرتدي حلة من الحرير الأبيض ويمسك بيده على عصاة من الأبنوس
فيطلب منه الوالي أن يجلس
– أريدك أن تذهب معي في (مشاوير) لتفقد بعض أفراد الرعية المعدمين ؟
– ومالو يا مولاي .. جدأ
– مالو مين وبتاع أيه .. حضر ليك عشرة ظروف وخت في كل ظرف ألف درهم !!
– من أين أقوم بتحضير هذه الأموال يا مولاي فالديوان على الحديدة !
– (في إستغراش) : على الحديدة؟ أين تذهب هذه الأموال التي تتم جبايتها
– يا مولاي لقد تبرعنا لقناة الضحي بخمسين ألف (دولار) .. وإشترينا لينا كم ناقة (برادو) وهناك العديد من (الإختلاسات) والباقي (البفضل) بشيلوهو العاملين عليها !
– تصرف .. تصرف يجب أن أقوم بتنفيذ هذا البرنامج (الراعي والرعية)
– حاااضر يا مولاي سوف أقوم بالتصرف وأحضر لك المبلغ المطلوب .. هل تأمر بشئ يا مولاي؟
– نعم لا تنسي أن تخبر جميع الصحف ووكالات الأنباء والقنوات الفضائية لمرافقتنا وتسجيل هذه الحدث ..
مجموعة من النياق البيضاء (المظللة ) تدخل إلى أحد الأحياء الطرفية وتتوقف أمام أحد الخيام البالية
بينما عددا من كاميرات التصوير توثق للحدث :
– (الحاجب يطرق باب الخيمة) : يا أهل الدار !
– (صوت ضعيف من الداخل) : من الطارق
– هذا برنامج (الراعي والرعية) .. مولاي والي المسلمين على الباب
– تفضلوا تفضلو .. يا مرحبا يا مرحبا !!
والي المسلمين (والرهط) المرافق له يدخلون إلى (الخيمة) البالية التي لا يوجد بها غير بساط بال و(قدر) قديم يغلي على النار
– (الوالي يهمس لحاجبه) : أقول ليك (معدم) تجيب ليا زول (شادي ليهو حاجة في النار)؟
– صاحب الدار يرحب (بالوفد) وينده على زوجته وأطفاله فيدخلون في ثياب رثة مهترئة وأجساد نحيلة ضامرة ..
– (الوالي يسأله) : كم لديك من النساء ؟
– برضو ده سؤال يا مولاي ؟
– معذرة أقصد من الأطفال
– هؤلاء الذين أمامك
– وهل يذهبون إلى (المدارس) ؟
– مدارس مين يا مولاي وهل لنا طاقة بتكلفتها !
– إذن فهم يعملون !
– كانوا يعملون ..
– ماذا تقصد ؟
– لقد تبرع فاعل خير لكل منهم (بدرداقة) ليعملون عليها في سوق (عكاظ) لكن قامت السلطات بنصادرتهم ثم إيجارها لهم !
– (الوالي يخاطب المصورين) : الحته دي بعدين أعملوا ليها مونتاج !
– (مسؤول الزكاة) وهو يقدم (الظرف) لصاحب الدار وسط اضواء الكاميرات :
– هذه مساعدة من مولاي (الوالي) تعينكم على مواجهة الحياة نرجو أن تتقبلوها منه
– من ناحية بنتقبلا بنتقبلا لكن بكرة ما تكشفوا حالنا وتجيبونا في تلفزيون (يثرب) وكل صحف (الجزيرة) .. إنتو ما مسلمين ؟
– (الجميع) : بلي
– طيب وكت مسلمين ما سمعتو إنو الصدقة دي بيدوها بالدس حتي إنو من يعطيها لا تعلم يساره ما أعطت يمينه ؟ (مواصلا) والله لأحب لنا ان نعيش على (كمونية السمك) التي تغلي في ذلك (القدر) على أن نصبح (فرجة) لكل الناس !!
كسرة : المجد والخلود للشهداء الأبرار
كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو وووو)+و+و+و؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(وووو)+و+و+و؟[/JUSTIFY]
الفاتح جبرا
ت.ت
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
[FONT=Times New Roman][SIZE=5][B]الفاتح جبرا واواتك دي ما بي تنفع بالطريقة دي أفضل أن تكتب برقم يعني 50و أو 100و عشان بعدين أكان الله احيانا والموت خلانا الورقة تشيل[/B][/SIZE][/FONT]
ف التنك !!!
لكني اخاف عليك يا خال من كبير اولاد النيفاشا
لانو هو صاحب الشو التلفزيوني “الراعي الما رعي الرعيه”
+ البرنامج عملها واضحه و ظاهره + برضو شئ احسن من لاشئ+ اذا اراد الراعي مراعاه الرعيه خليهم اثبتو لينا برنامج الاسواق المخفضه ده فقط!! و اكون ف كل حي و ممكن اجي التلفزيون اصور و اهم شئ اصور لانو هنا التصوير مباح و مبارك و مفيد لكن خوفي اكون برنامج الاسواق المخفضه ده عدد 3 حلقات و بعديهو اقولو فاصل و نواصل بعد سنه
اتفه اعلام في الدنيا يوجد في السودان
تملق سخف ونفاق وقلة اخلاق
جاريين وراء الجماعة ويصورون كل شئ ولا يقولون اي شئ
انت من زمن ملف هيثرو الان بقي ملف السودان
جبرا جبر الله كسراتك مريت على موضوع 50 ألف قناة الضحى مرور الكرام و لم تعمل ليهو كسة خاصة ياريت نعرف أين و صلت الخمسين و لو كانت وديعة مفروض تكون صارت كم و كم أسرة كان ممكن تستفيد من هذا المبلغ إذا تم توزيعه كمدخلات إنتاج في إطار برنامج الأسر المنتجة يا ناس حرام عليكم الأوقاف و الزكاة حاجات حقت ربنا برضو سرقتوها؟؟؟؟؟؟
يا أستاذ جبرة ” يعنى إنت ماعارف واللا شنو ؟ : هذه الأموال تذهب إلى جيوب المتنفذين من الإنقاذيين وقبل ذلك تذهب أولاً غلى خزينة المؤتمر الموطني الكائنة بمنزل الدكتور عوض أحمد الجاز وهي خزنة عبارة عن غرفة كبيرة 4*4 متر مربع تقريبا ومن هناك يتم توزيعها على الفقراء والمساكين والمحتاجين من المتنفذين في المؤتمر الوطني.
انها المدينة المنورة وليست يثرب يا استاذ الفاتح
يا استاذ خط هيثرو بس ..؟؟؟؟
طيب الخطوط البحريه السودانيه ..؟؟؟؟ راحت وين ؟؟؟؟؟؟
ومنو اللغفه اللغفه الكاربه دي؟؟؟؟
اكيد واحد من الكبار …. الكبير أوي….
قوية… قوية.. قوية.. وهدف روعة في تمنيات شبكة(الراعى والرعية) .. وبقترح يسموه برنامج (الضباح والضحيه) بمناسبة العيد وكده ..
يديك العافية الفاتح جبرا ..
الريس بيشكرك ويقول ليك انت مواطن فالح وقال ليك هو مهتم ومتابع الموضوع مع الجماعةواصحاب الجماعة بس الحكاية عايزة صبر وانشاء الله يصير خير
أستاذى الفاضل الفاتح جبرا اطال الله فى عمرك و جعلك من الناصحين و
صاحب الكلمه التى تنطلق كالسهام لتستقر فى احشاء اللئام ؟
خوفنا من الاتى يا عزيزى و أن طال بنا المسير فى ظل هذا النظام الشيطانى لا قدر الله .
لن نجـــد كمونية النمل مش كمونية السمك ؟