منوعات
زاهر بخيت الفكي : في شنو .. خلاك تستقيل ؟
كيف تستقيل ؟
فى شنوا.. خلاك تستقيل؟
خائف يقيلوك..
ده المستحيل..
جائز.. يرقووك..
لي أعلى منصب يرفعوك..
أو ينقلوك..
لي أي بنك من البنوك..
بس ما بفصلوك..
لسة بدري على الرحيل..
والزينا.. ما يشغلوك..
اقتصادنا مالوا؟
ما قلتوا نوموا قفا..
وكلوا حاجة تمااااام..
وين القطن؟
وين الدهب؟
وين الصمغ؟
وين بترولك الخام؟
انفصل الجنوب.. بعد السلام..
ما ينفصل ما بهمنا..
عاملين حسابنا.. واضعين الحلول..
أزمتك يا عالم..
قلتوا ما اتاثرنا بيها.. وكيف تؤثر فينا؟
نحن أفذاذ.. في الاقتصاد..
نتحدى أصحاب العقول..
فيكم صحيح ما أثرت..
بس أثرت في مُحمد أحمد..
نص شعبكم أصبح فقير..
ما قلناهو نحن..
بشهادة من ناس الزكاة..
مدعوم بي كلامك يا وزير..
ونسبة الفقر بيناتنا..
خلوها مستورة..
هي أكبر بي كتييير..
ووضعنا العايشنو نحنا..
لا يُحتمل لا بنقدر.. بالجد خطيييير..
يا خي )بدري(.. على الإجازة..
ما لسة نص الشعب قاعد..
منتظر نفس المصير..
نصنا التاني ما حااميهو..
لي ربه سائل ومستجير..
يغنيهو من خِزنوا الملانة..
لا فيها حارس لا غفير..
لا عارفك إنت منوا..
لا شغال شنو..
كان تبقى )نائب( أو مدير..
لا رصيد يمكن يضيع..
لا عندو شيك.. خائف عليهو يطير..
صحيفة الجريدة
بلا أقنعة – زاهر بخيت الفكي
