منوعات
علي همشري : كفاك جرّحت خاطرنا
وكت تنزل
معاها نحيب وتنهيده
كفاك جرّحت خاطرنا
عليك اسم الله ما تعيدا
***
لحظات الجفا السرقت
… بيوت نشوتنا في عيدا
تفوت تختانا لا غادي
واكيد باكر نقص ايدا
تعم البهجه دنيانا
وتعود البسمه لى سيدا
سناها يضوي في الضلما
ويطرّز بالنغم جيدا
ويقود رسن الفرح غنوه
على سكة هوى سعيده
***
لازم نقبل المقسوم
وكل الربّنا بريده
ودموع احزانّا ماب تجدي
ولا الضايعالنا حا تعيدا
ودا المكتوب ..
نواجه كل مشاكلنا
وظروفنا القاسيه وعنيده
وتتفاقم مع الايام
ونحن نكابر ونزيده
واكيد الدنيا ماب ترحم
ولا دمعتنا حا تفيدا
***
صياد الفرح جافانا
قفّل سكة الريده
وكت مسّكنا طير في الكف
عجبنا الطايرة تغريده
وطار الفي اليدين مضمون
وصبحت سكتو بعيده
بعد كان الشرك مليان
بقينا نهج
نطارد النافره في بيدا
ونرجع برضو بالحسره
وتفوت يغلبنا ما نصيده
علي همشري – صفحة ريحة البن
[/JUSTIFY]
