تهاني عوض: حقو يا ناس (المحليات) تعملوا (بامبرز) للشوارع دي!!!

[SIZE=5]بالله في أول مطرة (جد جد) تفاجأ (المعتمدون) .. ودقوا (السَّكَلِي).. و(الرورو) .. والشوارع يا كافي البلاء جت (سالت) (زي دموع الناس المعيدة في بلاد برة).. و الغريبة إنو الخيران (فاضية) والجداول الجنب شارع (الظلط) (ناشفة) زي (حلق الصائم) المتعشي بملاح (كجيك)..بي (كسرى حمراء)..

وجنس( خمج) و(مجخ) و(طين) ..و(زلاقيقا) و وحل في (أي محل) ..وكترة (ناس) وقعوا (جنمبولغ) في (موية المطرة) .. والباعوووض (مبسوط) يغني (سااااي) و(القعونج) يدندن (فرحاااان) بالمطرة (المفاجئة) ..

غايتو أنا (شايفة) أحسن حاجة ممكن تتعمل عشان (الطين والخمج) دا إنو (ناس المحليات) يشتروا (بامبرز) حجم (كبير) (big size) ويلبسوهو (للشوارع) و(مواقف المواصلات) لمنع (البلل) و(التسرب) شرطاً يكون بيبي جوي (أصلي) مستورد.. وبالطريقة دي الشوارع (تحبس موية المطرة) والمواقف تكون جافة و(نضيفة) من المياهــ (الراكدة)..

ونكون (وفرنا) قروش (الكباري والجداول والمصارف) ونكون مبسوطين .. وكل (ساعتين) ناس (المحليات) يقوموا يغيروا (البامبرز) حق (الشوارع) ولا من (شاف) ولا من (دري) من بدري بدري! وصدق المثل البيقول:(السترة والفضيحة متباريات)!!

تهاني عوض[/SIZE]