حوارات ولقاءات
بلاتيني الهلال سايق (ركشة)في أمدرمان
ترك الهلال وخاض تجربة احترافية ناجحة في سلطنة عمان وعاد منها وطاب به المقام في الجرافة.
بحثتعنهفيكلمكان وأخيرًا وجدته متجولاً في شوارع أم درمان يجوبها يومياً من أقصى الشمال إلى أقصى الجنوب ومن الشرق إلى الغرب بـ(ركشته) ذاتاللونالأخضرويبدوعليها تعبالدوران المستمربأزقةوحواري أم درمان.
كان برفقتي الزميل الطاهر الطيب طلبنا منه الجلوس في أي مكان وكان منهكاً من هجير شمس رمضان والإرهاق الشديد قد تمكن منه بعد أن جار عليه الزمان،
دعانا إلى ظل شجرة وريفة بحي الواحة تربطه بها إلفة يعود إليها بعد كل مشوار مضن يرتاح فيها قليلاً ثم يتركها بحثاً عن الرزق.
قبل أن نجلس اتجه إلى (أزيارالموية) المنتشرة تحت الشجرة لترطيب وجهه الذي يكسوه جور الزمان من فرض تعب الصيام، رجل بسيط طيب القلب لم يمانع مطلقاً في أن نتآنس.
*
قلت له الزمن قد تمكن منك؟.
قال:نحن خلاص كبرنا ولكل زمان جيله.
*.
وينك الزمن دا كلو من الهلال شطبك اختفيت؟.
نعمل شنو جاريين ورا لقمة العيش وأنا بصراحة ابتعدت خالص من الهلال ماشغال بيهو وماقاعد أسأل منو ولا عارف حتى أخبارو والجرايد بقراها بالصدفة لأنو الحياة والظروف بقت صعبة.
*.
بعد الهلال مشيت وين؟
بعد انشطبت من الهلال سافرت عمان ولعبت موسمين محترفاً مع نادي البستان وعلى فكرة بعدي احترف في نفس الفريق سانتو ووليد طايشين.
*.
منو من اللاعبين السودانيين الكانوا محترفين في عمان في الوقت داك؟
كان في عمر العلمين في النصر بالإضافة إلى جمال كدوس وعصام عموش وعاطف منصور وعوض حسب الرسول ودحدوح وأبشر بلعبوا في أندية مختلفة.
*
بعد رجعت من عمان عملت شنو؟.
عملت لي تاكسي كورلا نضيف خلاص (تقطع فيهو السلطة تاكلا)، ومانفع معاي بعتو واشتريت الركشه دي ولقيتا أفضل من التاكسي بكتير والأمور ماشا والحمدلله.
*.
شغال مشاوير الثورات بس ولا قاعد تسرق الخط.؟
أي مشوار في أم درمان دي قاعد امشيهو بس الكباري ممنوع تقطعا.
*.
الكشات قاعد تتخارج منها كيف؟
الكشات دي طبعاً موجودة من المحلية خاصة حملات الترخيص، مرات النجومية الزمان ديك قاعدة تنفع تلقي ليك زول يعرفك يتعاطف معاك ويخارجك ومرات زول يعرفك أو يشتغل بيك مافي وفي الحالة دي تاكل نارك براك حسب العقوبة ومرات كتيرة بتكون غرامة وسبق أنو حجزوني ودفعوني غرامة وأطلقوا سراحي ومالقيت زول يعرفني لأنو الناس الهسع ديل ماعندهم علاقة بالكورة عكسنا نحن زمان لامن كنا صغار بنعرف كل اللاعبين القدام اللعبوا للهلال والمريخ.
*..
ماقاعد تعرِّفهم بنفسك؟.
الحاجة دي ماقاعد أعملا لأنو مرات ممكن تصادف ليك زول يحرجك يقول ليك لابعرف كورة ولا هلال والزول أهم حاجة عندو عزة نفسو وكرامتو.
*.
حكاية تكون سايق ركشة ماقاعده تسبب ليك مضايقات؟.
لا لا العكس ، هي شغل شريف وفي بعض النجوم التانين سايقين ركشات وفي بعض الناس بوصلهم مشاوير وحدين فيهم بعرفوني من أول لحظة ووحدين تانين بشبهوني وبسألوني وبتبدأ بعد داك ونسة عامة عن الحياة وظروفا وفي ناس بستنكروا حكاية نجم سابق في الهلال وسايق ركشة وأنا دا كلو ماهاميني طالما أنا بعمل عمل شريف بعيش منو بالحلال مع أولادي.
*.
اللاعب السوداني بعد يخلي الكورة الناس بتنساهو؟.
ضغوط الحياة بقت صعبة وللأسف الأندية مابتهتم باللاعب السابق عكس المصريين عندهم تواصل أجيال اللاعب القدم علاقتو مابتنقطع مع النادي بكون متواجد في النادي ويشارك في كل المناسبات مع أسرتو والنادي مهيأ فيهو الحدائق والألعاب للأطفال ونحن عندنا اللاعب يعتزل بنسوك وزول بشتغل بيك مافي.
*
مالك ما اتجهت للتدريب؟.
التدريب فكرت فيهو في الفترة الأخيرة ودخلت أول كورس في سنار مع كندورة.
*
قاعد تلاقي زملاك القدامى؟
أحياناً لامن تكون في دورات ومهرجانات قاعد أشارك ومرات بتمرن مع ناس عادل أمين ومصطفى النقر نجري دمنا.
*..
بتتذكر شنو من أيام زمان مع الكورة؟
بداياتي الأولى في رابطة الناشئين بالثورة شرق وهي رابطة شبه ملك للأحرار وكان معاي فيها عيسى صباح الخير والمرحوم الحاج وبكري الشيخ وديل لعبوا للتاج وأنا مشيت فريق النصر بحي البوستة (درجة تالتة)لعبت فيه موسمين ومنه انتقلت للتاج ولعبت فيه تلاتة مواسم وانتقلت للهلال ولعبت له من ٨٩ حتى ٩٣ وشطبت.
*..
سجلت للهلال معاك منو؟.
كان معاي في الغرفة وسجلنا سوا عيسى الهاشماب ـ عصام غانا ـ حمد الجريف وتنقا.
*
أجمل مبارياتك مع الهلال.
خارجية مع ديناموز هراري وداخلياً مع الموردة في نهائي كأس السودان وفزنا فيها ٢/صفر وأنا تم طردي بالكرت الأحمر في نهاية الشوط الثاني ورغم ذلك لعبت أجمل شوط في حياتي مع الهلال وكانت تشكيلة الموردة تضم :عوض دوكة والجقر وبريش وكان في الهلال منقستو وعصام غانا وصبحي وجاد كريم وكندورة وأحمدالله وجدت معهم فرصة.
*.
أقرب اللاعبين ليك من المريخ؟.
جمال أبوعنجة لأنو كنا شغالين في المباحث سوا بالإضافة إلى شنان خضر وكمال عبد الغني وعاطف القوز والاتنين ديل كانوا فاكهة معسكرات المنتخب الوطني.
*.
رأيك شنو في كورة هسع؟.
زمان مافي قروش وكنا بنلعب بالولاء وحب الشعار وكنا نضحي لتحقيق الفوز وهسع في قروش ومافي مقابل ، المريخ زمان جاب تلاتة كاسات والهلال وصل نهائي أفريقيا مرتين.
*.
سر لقب بلاتيني؟.
زمان لامن كنت في روابط الناشئين في واحد مرضان باللعيبة العالميين وبجي يتفرج في رابطتنا وأطلق عليَّ لقب بلاتيني.
*
شكلك مستعجل؟.
والله بس ناوي أمشي البيت وأنا طبعاً ساكن الجرافة.
وقبل أن يغادر حدثته عن اللاعبين اللاقيتم في رمضان وتآنست معهم عبر هذه الزاوية، استغرب وقال لي:أنت الناس ديل قاعد تلقاهم وين؟ قلت له: زي ما عرفت محلك وجيت لاقيتك.
قبل أن نغادر قال لي:ياخ أنا داير صوري القديمة العندكم تجيبا لي.
ثم أدار محرك ركشته مغادرًا إلى منزله وفي البال مشوار في نفس الاتجاه.
اعداد:عصام طمل-صحيفة قوون
الناس دي كلها داقشه ركشات ولاشنو ؟ عليك خليهم في حالهم ناس الزمن الجميل ديل ماتحرجهم وتقلب علينا المواجع.. شئ مؤسف والله ..
[SIZE=5]بالمناسبة الانسان هو الذي يصنع ظروفه والزول الطموح بحسن وضعو..هسي محسن سيد ده زمن كان لاعب في الموردة كان لاعب مغمور لا يقارن ببلاتيني هسي مدرب معروف يتقاضي الملايين من المريخ وقبله مريخ الفاشر لأنوا أهل نفسو[/SIZE]