تهاني عوض: البنت دي صعلوقة وما مربية!!
بيفتكروا انو دا تردي ورجعية وسخف وانحراف ، وانحلال!! وبالذات لما يكون الموضوع متعلق بالمرأة..أي حاجة تجي منها فهي شر..!! لأنو المرأة كان بقت فاس ما بتكسر الراس.. وكمان في ناس بتعتقد إنو المرأة صوتها..صورتها..مشيتها..أفكارها..تعليمها..شغلها ذاتووو عورة .. وعيب وحرااام.. والمرأة المؤدبة وعندها وليان يمسكوها ما بتعمل كدي!! وفي اعتقادهم أن للمرأة تلاتة خرجات..الأولى من بطن أمها..و الاتنية من بيت ابوها لبيت زوجها..والتالتة من بيت زوجها للمقابر!! وينتهي العزاء بانتهاء مراسم الدفن!!
ورغم إنو النساء في السودان اتعلمن واتثقفن منذ العشرينات في القرن الماضي ومنهن الطبيبات ، والمهندسات ، والمعلمات، والمذيعات، والصحفيات، والمترجمات ، والوزيرات، والاخصائيات والممثلات..والبرلمانيات،،
و في كل مجال المرأة السودانية لها بصمة ووجود واضح زي الشمس..وفي الشارع وفي السوق وفي المصنع وفي الشرطة وفي الجيش وفي المرور وفي الزراعة..وفي بنات معتقلات,, وكمان في مقاتلات في المجموعات المسلحة..
والمرأة بتألف كتب ، وتكتب شعر، وروايات ، وقصص، ومسلسلات، وتكتب في الفيسبوك..ودا كلو كويس لكن لم تنشر صورتها الشخصية في الفيسبوك أو الواتس أب تبقى صعلوقة وقليلة أدب وما مربية وما عندها ولي أمر بيغير عليها وبيشكمها!!!!
ولما تظهر في التلفزيون هي (مؤدبة) ومثقفة، ولما تغني في حفلة ..الحفلة بتكون رابة !! ودا كلو ما عيب!! لكن لما تكتب في الفيسبوك او تغير صورة بروفايلها تبقى صعلوقة وكايسة الاولاد عشان يتغزلوا فيها ويعاكسوها..علما بإنو المعاكسة والغزل والمشاغلة في الشارع في.. وفي السوق في.. وفي الجامعة في .. وفي محل العمل .. وفي الحدائق والسينما وبيوت الاعراس وحتى بيوت العزاء.. لكن البت البتنشر صورتها في الفيسبوك دي قليلة ادب ساااي وصعلوقة وعايزة المشاغلة.. والغزل والكلام الفارغ!!!
المشكلة أن هذه العقلية لا تزال مسيطرة على ذهنية الرجل المعرفية ونظرته للمرأة..وأن موضوع (الجنس) لا زال هو المعيار الأول في الحكم على المرأة ..!
ودا كلو هين .. لكن الحاجة المؤسفة وبتضحك وبتبكي لما تلقى واحد رسل في الخاص أسوء عبارات الغزل ، وأقبح الصور الخادشة للحياء العام ..ويصر على انو ترسلي ليهو رقمك ..ويرسل ليك الرقم حقو..
ويقول ما لم يقله مالك في (الخمر).. و أول ما يجي يشوف صورة واحدة في الفيسبوك يعلق: اتقي الله..استري نفسك..عيب عليك تنشري صورتك للرجالة !! انتي ما عندك اهل يلموك؟!!إنتي صعلوقة وما مربية !! دا حرام وربنا بيعذبك!!!!!
العيب ليس فينا ولا في صورنا ولا في في طريقة أفكارنا..إنما العيب كله في النظرة السالبة والاحكام التعسفية المسبقة..العيب في نظرة التجريم والتخوين التي يظهرها الآخر عمدا أو جهلا للمرأة ..طيب ما أحسن تدفنونا أحياء يوم ولدونا..أو تجيبوا ناس داعش يضبحونا!!!
تهاني عوض
سرقة افكار وترديد موضوعات وكلام سبق وان قيل الف مرة …وكمان جابت ليها الفاظ عجيبة وعدم حياء
فى البيت … فى الشارع….. وفى المسرح
اعجبنى وكمان لايك
السلام عليكم
طبعا نحن المفروض نتحاكم للمنظور الشرعي وعلي كل كل زول حر وليه قناعاته
بالنسبه للغناء والمعازف للرجال فيهو قولان فما بالك بالنسبه للنساء اما ظهور النساء في التلفزيون بيعتمد علي الماده البتقدمها ولبسها وطريقه تواصلها فالسيده عايشه امرنا الرسول ان ناخذ منها في امور الدين خذوا دينكم من هذه الحميراء فلو طلعت واحده في التلفزيون تتكلم بما قال الله والرسول فما ممكن نقول غلط او تتكلم في امور السياسه وامور جاده لكن لو ونسه في غناء و شعر غزل مثلا فكيف تكون صح اما الفيس بوك فرايي الواحد والواجده يتواصل مع اهله واصدقائه من نفس الجنس اما وضع صور لكل من هب ودب ليعاين ويعلق فالمقصود شنو يعني وكيف ممكن
رسلى لى رقمك …
ماتجيبوا لينا ناس داعش يضبحونا …. قصدك يطهرونا ***
هذا الكلام يدل علي جهلك التام بالدين الاسلامي وعلي مااعتقد انك مسيحية اومتربية مع مسيحين او علمانين او اقباط فان كانت لك معرفة بالدين الاسلامس لماقلت هذا الكلام القبيح والذي يقدح في حق معلم الانسانية ونبي الرحمة محمد بن عبدالله صلي الله عليه وسلم ويقدح في الكتاب المنزل رحمة ونور وهداية ويقدح بصورة واضحة في قوله تعالي وقرن في بيوتكن ولاتبرجن تبرج الجاهلية الاول فياامة الله استتوبي لربك واستغفريه من ذنبك عسي ان يغفر لك فجملة ماقلتيه هو رأي الدين وليس رأينا نحن الرجال اسأل الله ان يهديك
أول حاجة كل سنة وانتي طيبة ..
انا أوافقك في كل ما ذكرتيه لأنه من غير المنطق أن تحكم على شخص فقط بسبب صورته … لكن (وهذه تحتها خطين) هذه النظرة الخاطئة للمرأة تأتي من فئة قليلة من الرجال أو الشباب وليس كلهم .. فأغلب أو معظم الشباب الان والحمد لله ذوي أفق واسع ونظرة ايجابية في التعامل مع الجنس اللطيف وتغيرت أفكارهم أو بالأحرى أفكار من سبقوهم في السن .. أرجو واتمنى أن تواصلي ما بدأتيه من من كتابات رائعة خاصة مقالك السابق عن دارفور وشكراً …
[SIZE=5]الاخت تهانى عوض
انت جديده فى الكتابة على الصحف الالكترونيه لكن برزتى
برزتى بروز كويس وحتى المواضيع البتكتبيها فعلا مواضيع بتستحق
الناس يكتبوا فيها
قبل كده يمكن انا مر على نفس الموضوع لكن بطريقه تانيه
لكن كونه يجئ منك برضو بزلتى مجهود كبير
وشايف الطرف المضاد حتى فى التعاليق عندك ناس مشاترين ودى حاجه طبيعيه
بس قصة النت بصوره عامه حتى مواقع التواصل الاجتماعى
حاجات جديده على مجتمعنا
بتزكر كان فى شيخ عايز يطلع فتوى او اذا البنت فى البيت عايزه تدخل النت لازم يقعد معاها محرم لانو يمكن يدخوا عليها شباب فى الدردشه
هههههه ديل اخطر من داعش وافسد من بوكو حرام [/SIZE]