تهاني عوض: جَرَاَداي فِي سِروال و لا بِعضّي إلا قُعَادو و لا حِلو !!
ملوك أولاد ملوك..سلطنة واداي ، مملكة المسبعات ، مملكة دارفور ، السلطان علي دينار، أرض الشرتاي ، والعزة ، وجوههم سمراء لكن قلوبهم زي اللبن .. ناس علم وفهم وحكمة وقرآن وبصارة (كلام كتاب و كلام شياب و لا بقع في تراب) ..(العندو بخور بنشم) ..(إيد واحد ولا بصفق)..(كان تهموك بفطيص شيل ليك مناصيص)..
(جراداي في سروال و لا بعضي الا قعادو و لا حلو)..(الرجال دناقر ما كبر عناقر)..(الزول حالو في مالو)..(أم دنقدونق ولا جري)..(أبشوك ولا بنحضن)..(أم التيمان بترضُع البكاي)..(شوكاي بسلو بدربو)..(الكلام البارد بطلع الدابي من جحرو)..(الحبل بنقطع من محل رقيق )..(دبنقه دردقي بشيش)..(دابي في خشمو جراداي مابعضي)..
(سكي حجراي ما تسكي أجاويد)..(أم صلمبويتي ولا كدكاي زول ).. أسياد تراث جميل، وحضارة عرقة، وتاريخ وأمجاد وبطولات ،لكن تبدل الحال ، وانقلبت عليهم الدنيا .. و الحرب حولت الملوك أولاد الملوك إلى متشردين ولاجئين ومعسكرات إغاثة ، ونهب مسلح ، ودماء تسيل ليلاً ونهاراً
بدل ما تسيل من وديانها الألبان والخيرات لتصل ليس لبقية ولايات السودان بل حتى للعالم الخارجي ويكفي دارفور فخراً ومجداً (المَحمَل) لكسوة (الكعبة) المشرفة في الحجاز ..يا ريت يعود الحال زي ما كان أول ، ويسكت الرصاص ، ويخرص المدفع ،
وبدل البندقية تجي الطورية والملوت ، وبدل ريحة (البارود).. يا ريت نشم ريحة (مُلاح الكول) بنكهة الحب والمحَنّة … ودارفور بلدنا.. نعمل نعلي شأنا..ونغني في حبها بالعربي والرطانة..
تهاني عوض
شكرا من اجمل ما كتبتى هذا الموضوع فعلا نحن نحتاج لاقلام تكتب وتدون حضارتنا زبرز كرم واصالة الشعب السودانى وثراء السودان يكمن فى التنوع العرقى والثقافى والدينى…ولكن للاسف هنالك فرق كوميدية ساهمت بشكل كبير فى نشر العنصرية البغيضة…تشتم القبائل وتسخر من عاداتهم وتقاليدهم………………..ظنا منهم انة فن مضحك او معبر…
اها يعنى شنو يعنى ؟ السودان اهلو كل واحد فيهم بى محنتو .. وبى امثالو ؟؟ ولا دايره تتمى عمودك هضربه ..