بابكر سلك
القيدومة والكتمة
* قرب شدييييييد.
* والقيدومات بدت.
* أول أمس كان عندنا قيدومة فى الحصاحيصا.
* جنس قيدومة..وجنس كتمة.
* فى ناس قنعوا.
* قايلين الفنان ما بجى.
* وبس.
* مايسترو الأوركسترا وزع.
* جنس توزيع هو.
* والفنان جا.
* بدل فنان فنانين أتنين.
* فرقة جاز اوليفه.
* والأستاذ الفنان محمد موسى.
* ما محمد موسى بتاع الشروق مرت من هنا.
* محمد موسى بتاع عشان ما تموت أمرق من هنا.
* أى زول كان قاعد فى القيدومة وعرستنا دى ما عاجباهو.
* ومقرب حواجبينو لى بعضن.
* محمد موسى قال ليهو عشان ما تموت امرق من هنا.
* والمايسترو جدع ليك صولة لى الفنان محمد موسى.
* ومحمد موسى الفنان ما شهد الصولة..تكلها ليك تكلة.
* جدعة صغيرة.
* زى بتاعت نانسى عجرم لما قالت..أطبطب..أزعل.
* ما طبطب عليها.
* بس ناس كتار زعلهم بيها.
* قيدومات وكتمات.
* فضل لينا قيدومتين.
* واحدة عاملنها لينا ناس مدنى فى بيتنا..الحنة الكبيرة.
* والتانية عاملنها لينا ناس الفاشر.
* وبرضو فى بيتنا..الدخلة.
* قيدومات بى كتماتن.
* لكن اهل العروس يا ربى جهزوا العروس؟؟؟؟.
* العروس دى لازم تتنفض وتتحنن وتتجيه.
* العروس طبعاً ظروفها قعدتها فى حى شعبى.
* جفاف وتصحر.
* وما ممكن العريس يضربها فى الوجاهة يوم العرس.
* ما ممكن يكون اوجه منها.
* لازم اهل العروس يجهزوها.
* كم ساونا على كم حمام مغربى على كم مساج وخلطة خلطتين.
* تطلع جهبوزة.
* العشم فى اهل العروس كبير.
* قبل كدة اهل العروس ما أحترمونا.
* جابوا الكلام لى روحهم.
* لكن المرة دى اكيد حايحترمونا..ولا شنو يا روشا!!!
* أيها الناس.
* نعلنها داوية.
* كورة الحصاحيصا كانت كورة الدورى كلو.
* وبما انها كورة الدورى كلو.
* يبقى محمد موسى هو هداف الدورى.
* جاب قون بى ميتين وتلاتين قون.
* واتسبب فى الأول.
* ناس كاريكا ديل جارين ساااااااى.
* كاريكا لو ماجاب اقوانو ديل كلهم.
* ما بحصل شى.
* الحال ياهو نفس الحال.
* ولو جاب قدرن تلاتة مرات.
* برضو الحال ياهو نفس الحال.
* لكن قوون محمد موسى لولا قدر الله ما جابو.
* هل كان الحال ببقى ياهو نفس الحال؟
* يبقى قون محمد موسى بالدورى ويبقى محمد موسى هداف الدورى.
* قون دولار.
* بى تمنية الف قون من نوع أقوان ناس كاريكا.
* أيها الناس.
* سيدا بالغ.
* باص القون التانى بالذات.
* ذكرنى باص الأنجليز.
* الأنجليز باصاتهم موش طابقين..الباصات الحمر.
* تلقاها حايمة وسط لندن.
* طابقين.
* ياخ زول يلعب باص لى فوق ولى قدام فى نفس الوكت؟؟؟
* وموش كدة وبس.
* الباص ما كان باص قون.
* كان باص قونين.
* موش رمضان ومحمد موسى أنفردوا الأتنين؟؟؟
* وموش كدة وبس.
* لو واحد فيهم شاتها يجى قون..ولو اتطاقشوا يجى قون.
* ولو شاتها واحد وجلاها واحد يجى قون.
* ولو جلوها الأتنين تجى براها قون..باص فيهو كل الفنون.
* لله درك يا سيدا.
* أيها الناس.
* الباصات انواع.
* فى باص البلعبو والملعوب ليهو والجماهير كلهم بكونوا عارفينو ماشى وين.
* وده زى باصات ناس عمر بخيت.
* وفى باص البلعبو والملعوب ليهو هم بس البكونوا عارفنو ماشى وين.
* ودة زى باصات فيصل موسى.
* وفى باص البلعبو والملعوب ليهو والجماهير ما فيهم زول بكون عارفو ماشى وين.
* ودى زى باصات ناس خليفة.
* وفى باص لا البلعبو ولا الملعوب ليهو ولا الجماهير ولا الكورة ذاتها بتكون عارفة روحها ماشة وين ودى زى باصات ناس بويا.
* وفى باص غير ربنا والبلعبو مافى زول بكون عارف ماشى وين.
* ودة زى باص سيدا بتاع القون التانى فى الحصاحيصا.
* وبدت القيدومات والحنن.
* وناس فرحانين وناس حالهم يحنن.
* يا الحالكم يحنن.
* تعالوا حننونا.
* عندنا قيدومة.
* أيها الناس.
* محمدموسى يستحق الأعتذار.
* والأعتذار يكون عن طريق التشجيع والمساندة.
* والبلدوزر دور.
* ولما البلدوزر يدور تبقى فى اوالة لكل السكن العشوائى.
* لكن سيدا بالغ.
* أيها الناس.
* نال هيثم الأنذار الثالث له هذا الموسم.
* سبعطاشر سنة فى الهلال ما أنذروهو مرتين.
* وفى موسم واحد مع المريخ تلاتة أنذارات.
* برضو الحكم يخطئ ولا يظلم؟؟؟
* يخطئ بالطأ؟؟؟
* ولا يخطئ بالعنية؟؟
* ولنا عودة بالأحصائيات.
* الموضوع ده ما بنخليهو.
* لكن باص الأنجليز ابوطابقين ده يا سيدا بالغت فيهو.
* وأدها سيدا أدها يا.
* المهم.
* وصلتنى رسالة من الشفت صاحب الرقم 0912621052 يقول فيها.
* مترجم الهلال ده بترجم لى منو؟؟؟
* قلت ليهو مدرب الهلال ده ايمو منو؟؟؟
* المدرب ما عارفنو المترجم اكيد ما سمعوا بيهو.
* وعبد الوكيل عثمان قال صدق محمد موسى لما قال لو لعبت مع هيثم ببقى هداف الموسم,وفعلاً بقى هداف الموسم بى هدف يساوى مية هدف.
* أها.
* نجى لى شمارات والى الخرتوم.
* أكان شفت يا والينا.
* الشفع حيرونا.
* الواحد بقى يلبع كيس عيش عادى.
* وأحلامو برة البلد غادى.
* مستنى بتين يكبر ويشتت ويختار بعادى.
* غايتو يا والينا لو كبرنا واتوفينا.
* أكيد ما بنلقاهم يفرشوا علينا.
* للوكت داك ذاتو بتكون فى عربات نفايات تشيل الناس البموتوا.
* الهوف العربية تغيب يوم يومين يا والينا.
* والكلاب تاكلنا ولما تشبع تعمل عملتها فينا. سلك كهربا
*ننساك كيف وما عارفين نندفن فى قبر ولا فى بطن كلب.
واللللللللللللللللللى لقاء
سللللللللللللللللللللللك
في السلك – بابكر سلك
ركوب الخيل لا يناسب الجميع؟ أيهما أصعب تربية الأولاد أم البنات؟ جسر الأسنان
هل تعقيم اليدين مفيد؟ الكركم والالتهابات أفضل زيوت ترطيب البشرة
ابداع ابداع ….تحية لك يارائع…ونرجو ان لاتغيب كثيرا…بالتوفيق ومزيدا من مقالاتك الرائعة…تحياتي