أهل العروس المرة دى بالغوا

[CENTER][B][SIZE=5] أهل العروس المرة دى بالغوا [/SIZE][/B][/CENTER] [SIZE=5] * أهل العروس المرة الفاتت مرقوا قبل الحفلة تنتهى.
* قلنا ما مشكلة.
* غلطان اوليفيه عشاهم بدرى.
* وقبل كدة اهل العروس ما احترمونا.
* طفوا النور بدرى.
* لكن المرة دى بالغوا.
* خجلة ما خجلوا.
* ولا كروا فى مكانتهم ولا كرامتهم.
* ما قالوا الناس تقول علينا شنو.
* بالغوا عديل.
* زاغوا.
* سقنا سيرتنا ومشينا محل الكتمة.
* لقيناهم ما جو.
* ولا نفر منهم ما جا.
* زاغوا عدييييييييل.
* بدون خجلة.
* عملنا كتمتنا.
* وسقنا عروسنا وفتنا.
* ونحنا ماشين من محل الكتمة.
* شلنا فحمة.
* كتبنا ليهم بيها.
* حضرنا ولم نجدكم.
* سقنا عروسنا.
* عازمنكم السماية قريب ده.
* ما تزوغوا.
* لازم تجوا فى السماية.
* والله حكاية.
* أهل العروس ما جو الحفلة.
* ناس قالوا يمكن متشددين ما بحضروا الحفلات.
* ملتزمين شديد وكدة.
* المهم.
* قلت ليكم حا نضرب التمرد فى الدمازين.
* نسيت انو التمرد ما بقدر يدخل الدمازين.
* وزى ما قال الفريق طارق.
* فريقين ما بيقدروا يدخلوا الدمازين.
* فريق الهلال والفريق عقار.
* خافوا من مليشياتنا.
* وبالذات معانا قوات الأتحاد الأفريقى.
* أباتشى والمدرعة الجديدة اوليفيه.
* الصاروخ العاجى باسكال ون.
* ومنصة الصواريخ الغانية من طراز غاندى.
* ده طبعاً غير الكلاش السودانى عجب تو.
* والمضاد للأشعاعات راجى من طراز راجيك فى الدمازين انت وين.
* لكن البوظ اعصاب التمرد.
* الخلاهم يرفضوا دخول الدمازين.
* الخلاهم يختاروا الهروب.
* يقولوا يااااااع.
* بالصوت العالى ياع.
* النووى السودانى من طراز سيدا تمنية سيد ابوها وامها وعمها ذاتو.
* بخافوا من النووى ده شديد.
* بحرقهم برة وجوة.
* بحرق حشاهم شدييييييييييد.
* المهم.
* دمازين برانا.
* لا عقار لا هلال معانا.
* أيها الناس.
* كاس بجى بالطيارة معروف سيدو منو.
* عشان كدة جماعتنا عرفوها وشتتوا.
* وشكراً شفوت الدمازين الأشاوس.
* شكراً لأنكم أحتفلتم قبل الحفلة.
* كتمتكم زى الكتمة.
* ومسيرتكم كانت رائعة.
* كل الدمازين فى المسيرة.
* بلد حمراء.
* وحمرا جمرة.
* والكاس جا بالطيارة.
* أيها الناس.
* الشفوت روعة.
* وأنتماء بشرف ويشرف.
* ويا حلاة عمادة عقيد وهو يتكفل بتكاليف رحلة الأولتراس.
* تسعة مليون.
* مليون ينطح مليون.
* ملايين عقيد كانت حاضرة بالدمازين.
* والهلال غايب.
* وشن جاب لى جاب يا ميزو.
* المهم.
* محمدعبدالماجد حفظه الله ورعاه.
* ظهر امس على شاشة الشروق بالأسود.
* من بعيد زى توب الزراق.
* أصلو حفظه الله ورعاه بحب الأزرق.
* توب الحداد.
* وكانت لفتة بارعة منه وهو يعبر عن حداد الأهلة.
* وبالمناسبة.
* حادين على فراق هيثم .
* واجعهم شدي.
* أها.
* أنتهى موسم الخبت بجمع جميع الكاسات.
* وأبتدأ موسم التسجيلات.
* والكورة فى ملعب الوالى.
* قالوا المريخ أتصل بأوكيرى الحبشى.
* وأحتمال كاريكا يكون اتصل بالمريخ.
* طالع فك تسجيل والراجل محترف.
* من حقو يتصل.
* وقالوا مساوى طالع فك تسجيل.
* والبرير ذاتو طالع فك تسجيل.
* وصلاح ادريس كتب ابداء الرغبة.
* كلهم فك تسجيل والفكة راقدة يا والى.
* قعدهم.
* والبقعد يا والينا أكيد ما بقوم.
* وما بقول.
* بغم ما بقولها.
* قعدهم كلهم.
* حسن الخاتمة واجب.
* خليهم يختموا حياتهم الرياضية بحسن.
* حسن حسين(بضم خاء حسن).
* شردوا.
* قالوا ما دايرين.
* أهل العروس زاغوا.
* والزوغة ما بتلغى العرس.
* العرس تمة.
* وافقتوا او رفضتوا.
* العرس تمة والعروس مبسوطة.
* مبسوووووووووطة.
* محمدعبدالماجد.
* يا محمدعبدالماجد.
* عندكم فضية فى الدمازين نجيبها ليكم معانا ولا نبيعها فى الدلالة وتختوا عدتكم فى كرتونة.
* وكانت اجمل أغانى كتمة الدمازين.
* الصبيان الجروا سابوا عروضهم وهملوا يا يمة ساعة الجرى بنتحملوا.
* والأغنية التانية كانت رهيبة.
* كانت شديدة.
* عجبونى اخوان البنات ملصوا البدل والقمصان ترسوا البحر خيرسان من شاويشى لى برقان****عجبونى الليلة جوا ترسوا البحر صددوا.
* أخواتى البناااااااات الجرى ده ما حقى حقى المشنقة والمدفع اب ثكلى.
* حقى المشنقة والمدفع اب ثكلى وحالف باليمين اعز بنات اهلى.
* حقوا لى قولى ولداً غيرك انت انا ما بهز فوقى نسيبة البجرى.
* مصيبة البجرى.
* ونسيبة البجرى.
* البجرى يا البجرى.
* البجرى من بدرى.
* وصولة معاها رقيص شديد.
* حت زى الحت.
* واهل العروس كابين الزوغة.
* وفى ناس غنوا أجرى يا نيل الحياة.
* أجرى.
* أجرى شديد.
* وكانت رائعة وردى.
* نيلك هيلك جرى قدامك.
* أخدت حظها فى الكتمة.
* وبعد الحفلة كانت هنالك اغانى دكاكينية.
* عمك حسبو بعاين لى شتت قصبو بعاين.
* حسبو يا حسبو يعاين لى شتت قصبو يعاين لى.
* شتات يا فردة.
* شتات يا حسبو.
* مشتتين من الدمازين.
* حلات ناس روشا وهم مشتتين.
* جنس شتات.
* وكانت من اغانى كتمة الدمازين.
* يعنى لو قابلك فى المينا البرى زول ينده.
* دمازين دمازين.
* قول ليهو مشتتين متين.
* وكانت من الاغانى الدكاكينية.
* بجى بجى بجى.
* قال لى بجى.
* واغانى البنات.
* قال لى بجى مالو ماجا.
* راسو دلجة..سنة فلجة..روحوا عاجبا..قال لى بجى مالو ماجا.
* يا سمارى يا خدارى يمشى بيتكم ما بدارى قال لى بجى مالو ماجا.
* وأنطلقت زغرودة.
* يقى يقى يقى يقى يقى.
* وفاصل من الشعر.
* قال محمد ود الابيض.
* دايرين يحرموا الشفوت من فرحة.
* عارفين فى الهلال مرضى الضغط والقرحة.
* كان الليلة تلقى الناس هنااااااااااااك منطرحة.
* كايسين فى السلك ما الليلة اكبر فرحة.
* ويقول ود الأبيض.
* نحنا الما بنفر من المعارك ونجرى***بنمشى نقابل للدواس من بدرى
طيارة الزعيم قامت نهاراً بدرى ***وينك يا الهلال راجيك بفارق صبرى
* وقال الشاعر زهانا.
* الناس فى الدمازين فى الطرب رويانة**المريخ لعب لا زاغ ولا غشانا.
الميدان ملان ما فيهو حتة ولا خانة ** شلنا الكاس وشرفنا الزعيم بأمانة
* وعدنا للغناء الراقى.
* بصحبة الحواتة.
* أنتظرتو لما ماجا** رحت زرتو.
* باقى الأغنية تميناهو.
* شتت شتت شتت.
* ورقصنا رقصة النبق.
* النبق النبق النبق.
* ورقصة النبق طبعاً شتات.
* النبق بتشتت.
* روشا يا نبق.
* الكتمة كانت رائعة.
* سنواصل فى نقلها مباشر غداً وبعدو.
* لكن آخر أعنية كانت رهيييييبة.
* الناس دى كلها غنت ورقصت فيها.
* أغنية استمرت موسم كامل.
* غنينا بأنشراح.
* سيدا سيدا سيدا.
* الكورة بتريدو هى وهو ذاتو هو بريدها سيدا.
* يا مهندس الملعب سيدا.
* وزى الأسد وأرعب سيدا.
* لا بشكى لا بتعب والكلمة الأكيدة فى سيدا.
* هو سيد الميدان سيدا وباصات لعب فنان سيدا.
* وصامد ثابت وماهو جبان سيدا احلى تسديدة سيدا.
* بالكعب يوزع قون وهو شعارو أجمل لون.
* الكابتن الأول سيدا ومهما الزمن طول الكورة هو عميدة.
* سيدا وسيد سيدها.
* أها.
* نجى لى شمارات والى الخرتوم.
* أكان شفت يا والينا.
* أتملت مجارينا.
* باعوض وضبان يجارينا.
* عايش بين ظهرانينا.
* لما اتعقدنا يا والينا.
* شدت ما كترو علينا.
* قلنا يمكن نحن العايشين معاهم.
* ماهم العايشين معانا يا والينا.
* نمرق نسيبها ليهم ولا عندكم صرفة لينا.

[B]سلك كهربا[/B]

*ننساك كيف والهلال شتت والمواطن شتت.
واللللللللللللللللللى لقاء
سللللللللللللللللللللللك
[/SIZE]

في السلك – بابكر سلك