د. غريب الدارين: كوارع بالضفادع

بكرة يا دكتور تشوف
رغم الضيق والألم
رغم الظروف
حنجيب خروف
مهما بلغ سعره
وبقى بالألوف
ويوم العيد الكبير
نضبحه ونشبع لحم
من الفخود ومن الكتوف
دايرين نصل المحك
لحم ضاني ونضيف
ما فيهو شك
صافي وحلو
زي العسل
وبس شية بس !
ده لايوم صلصة
لا يوم البصل
والشطة قبل اللحم
لازم تصل
ونختمها ليك
شربوت حلال
وسط الأهل
مهما حصل ….ومهما حصل

الله يعزك
ما هو لحم ضفادع
لالا حاشاهو
ولاهو لحم كلاب
وأكيد ماهو لحم حمير
خروفن يملا العين
لامن تقيف
صافي ونضيف
مستوفي الشروط
لا معوق لا عزير
سعره واصل السما
وفر فر فر قرب يطير
صحيح
العيش ضنك
والواقع مرير
نعم …فينا الضعيف
فينا الفقير
بس ما فينا من زولن غبي
ولا واحدن عوير
ومهما حصل
بس ما بتصل
لا ضفادع لا كلاب
ولا لحم الحمير
ولو تسمح ياوزير
يا صاحب المقترحات
والراي المثير
عندي ليك سؤال خطير
إيه رايك في الحمام المابطير
ساكن الجحور
كان سيسي أو جقرن كبير ؟
ممكن برضو يكون بديل ؟
يا حظنا لو قلت ييس
وعاد ماهو وافر
والبلد مليانة بالشي الكتير
وبروتينه حالي
زي جقم العصير
وتتحلَ مشكلة الغذاء
ويهون أمره العسير

دكتورنا الهمام
ماغلبو الكلام
قال …يا سلام
غذاكم في صنفن جديد
وتمام تمام
فتمين مركب
وبروتين أكيد
يخلي أجسامكم عجب
وزي الحديد
لحم الضفادع ؟!
بس نلقاها كيف ؟
كيف تلقوها كيف ؟!
تلقوها في كل الفصول
في شتا أو في الخريف
حتى لو الدنيا صيف !!
في كل المواسم
وما بتقيف !!
علينا جاي
ما أحلى الضفادع !!
والبلد بي طوله سامع
نجري ونبرطع بالشوارع
نطاردها ليك من شارع لشارع
نلقطفيها ها واحدة واتنين
وكمان بالدستة من المزارع
عوووك بي جاي كتير
تعال يا خينا سارع
امشي واسلقها
تبقى ليك شوربة كوارع !!

ما أروعك …
جيتنا بالراي والبدع
راي الرماد راي السجم
قايلنا بوم ؟
أو كوم من بجم ؟
ضفادع ؟! ضفادع ؟!
آآآآخ يا قلبي …وع
عايشة في الخيران والترع !
حارمانا من نومن حلو
قوقاية يخترق السمع
ما قصرت تب !
اقتراح زي الدهب !
كملت فينا أصناف الوجع
قولن تقيل سم البدن
ويا ربي كافينا الصرع
أها يا البصيرة
أم حمد
ما أنتِ حلالة العقد !!
فات عليك واللهِ جد
ما قلتِ كيف
أصناف الطبيخ !
كان بالملح
أو كان مسيخ !
يمكن تكون زي الفسيخ !
أقول ليك
عندي ليكم اقتراح
قبل ما نبدا ونشد الملاح
تبقى فكرة وتلاقي النجاح
طبق اليوم :
طبيخ مدنكل مخترع !
دمعة مسبكة
ممكن بالقراصة
ناكلها في الفطور!
أو نطبخها للغدا بالقرع !
أو شوربة كاربة
تبقى لينا علاج فيهو النفع !
ولا يمكن شية تكون أخير
أهو صنفن مبتدع !
غايتو
بي كيف الحريم
يتفنن …يتنافسن
ونحن ناكل
لامن نصل حد الشبع

يا إخوتي
رفقا بنا …
رفقا بالبلد
الكان واقف عديل
قبال يقع
والناس أصيبت بالهلع
والسبب …
ناسن كبار
كاتلهم الجشع
صابرين
ما قلنا شي
بس شايفنهم
فايتين حد الطمع
هاجرنا تاركين البلد
والسافر زمان …
فات بعيد وأبدا ما رجع
بلدن حبيب …بلدن عزيز
لولا الظروف
ماكان في زول خلاها ونجع
خليناها لي ناس البطر
هم براهم
عايشين في نعيم
وهاك يا دلع
نسوا الله
والحبل الوثيق
وهى وانقطع
سادرين في غيهم
والموت السريع لا حركهم
ولا ليهم ردع
يا غافلين
خافوا من دعوة المظلوم الضعيف
في الليل البهيم
لا ضاق رقاد لا هجع
والدعا رافعو لي ربن عظيم
شاف واستمع
وإجابتو مافيها شك
باكر تقع

د / غريب الدارين