قوقل أيرث يا رمالى

2013/12/19

قوقل أيرث يا رمالى * بايرن ميونخ حكاية نلعب ضدو دى.
* الهلالاب كانو شايفنها زى ام بعلو.
* زى الغول.
* كانو شايفين حكاية نلعب ضدو دى زى قصص الخيال.
* زى حكاية فاطمة السمحة.
* زى حكاية سندريلا الوقعت فيها فردة شبطها.
* قام لقاها الأمير.
* وطلب يفتشوا عن ست الشبط الشرط ده.
* ولقوها.
* عرسها الأمير.
* وغاشوا فى ثبات ونبات.
* ده شنو ده؟؟؟
* القصة نومت ناس روشا.
* موش قلت ليكم شايفين حكاية نلعب ضد بايرن ميونخ دى زى الحجوة.
* المهم عاشوا فى ثبات ونبات.
* النبات ده بيعجبكم يا روشا.
* النبات من الشجر.
* مفردة شجرة.
* شعاره اوعك تقطع صفقة شجرة.
* أصحوا يا روشا.
* نحكى ليكم حجوة ذات الرداء الأحمر.
* لكن القصة دى بتطفشكم.
* المريخ رداء أحمر.
* والبايرن رداء أحمر.
* الفيلم ده حا تخشوهوا كيييف؟
* أول فيلم فى الدنيا المتفرجين القاعدين ساااااااى يكونوا ضد حمرة
البطل وضد حمرة الخائن.
* دى المهدى ما عملها.
* ناس لا مع البطل ولا مع الخائن!!
* الخوف ديجانقو يقد الشاشة ويجيكم.
* رمضان عجب لو جاب قون فى البايرن.
* ودى واردة ومؤكدة.
* تانى قبال ما يجيب قون فيكم.
* يغسل الشبكة بالجاز ويحكحكها بالحيمور ويكب ليها مبيد.
* مبيد الحقو مشى من الجندب بعيد.
* المهم يغسلها بالجاز ويكب ليها مبيد.
* لزوم التطهير.
* زول يجيب قون فى البايرن ويجيب قون فى الهلال.
* مفروض يغسل الشبكة أول.
* أسى عليكم الله.
* راجى يجرى بى ناس البايرن ويلعب باص لى أوليفيه.
* يجى زول زى خليفة يلعب ضد راجى؟؟؟
* معقولة بس.
* ده هين.
* ريبيريه عامل جراى.
* مع بلة ده حايشوف جنس جرى.
* جرى من امو.
* ونحنا كمان فى السودان فى الشتاء بنجرى أشد.
* الشتاء كلو بنقضيهو جرى.
* تجرى تتوضا الساعة واحدة.
* وتجرى راجع من الوضؤ واحدة وربع دقيقة.
* وتجرى تتغطى.
* وبعد داك تاخد رقدة.
* حتى تجرى على الصلاة الساعة تلاتة وعشرين دقيقة.
* قبل تسلم بأذن العصر.
* وصلاتين بى وضو واحد.
* المصلاية بتكون تحت المخدة.
* فى الشتاء ده انحنا جرايين شديد.
* المهم.
* أصبح البايرن واقع.
* ويوم تسعة يناير.
* العالم كلو حا يتفرج على المباراة بين بطل أوروبا وأسد أفريقيا.
* الفريقان أصحاب بطولات جوية قارية.
* زى بعض.
* الألمان وناس أوروبا حا يشجعوا البايرن.
* ويهتفوا.
* بايا..بايا..بايا.
* المريخاب والأفارقة والعرب حايشجعوا المريخ.
* ويهتفوا.
* أوووووو مريخ…أوووووو مريخ..أووووووووووو.
* ناس روشا لا لامين مع الألمان ولا قابضين فى الأفارقة ولا تابعين
للعرب!!!
* يتفرجوا وبس.
* يا ربى فى وداعية ألمانية شافت للبايرن وقالت ليقو فى أفريقيا.
* فى السودان.
* فى الخرطوم.
* فى أمدرمان.
* فى العرضة.
* فى لوح الشرف الأفريقى فى فريق أسمو المريخ أمشوا ألعبوا
ضدو؟؟؟؟
* سمعة ومكانة المريخ هى التى أتت بالبايرن ليلاعبه.
* وفى قوقل أيرث.
* ناس البايرن مشوا لى عمك قوقل.
* عمك قوقل طبعاً رمالى.
* لو مسح ليك رملة قوقل أيرث دى بجيبها ليك مؤكدة.
* الرملة البشتغل بيها ذاتها لاميها من كواكب كتيرة خلاص.
* المهم عمك قوقل شاف ليهم الخيرة فى فولدر الخيرات لأبن الزيات
بانتيوم ناين.
* وشاف ليهم الرمل فى قوقل أيرث.
* قال ليهم العرضة شمال ذاتها فى قوقل أيرث ما ظاهرة.
* ظاهرة العرضة جنوب بس.
* والما ظاهر فى قوقل أيرث بكون ما جوى.
* أيرث ده بيشتغل بالجو بالأقمار.
* المهم.
* تعال ومعك آخرون.
* أذا قلنا ممنوع أصطحاب الأطفال ناس روشا ما بجوا.
* لكن الوالى شايفو بقنع فى ناس البايرن على حكاية الأطفال دى.
* خلوهم يجوا عشان يتفرجوا ويتعلموا.
* يمكن يوم يكبروا ويظهروا فى قوقل جويات.
* ناس البايرن تحت تحت وافقوا.
* لكن أشترطوا كتابة عبارة فى التذكرة.
* الطفل داخل الأستاد على مسئولية دولته.
* المهم.
* قصر المجلس فى حكاية العجب.
* على الأقل الأتصال والأخبار بتأجيل التكريم كان حلحل كل المشاكل.
* العجب أستعجل وتعامكل برد فعل لأهمال المجلس بعد الوعد.
* وأستعجال العجب سببوا أن ثقة العجب فى الشفوت قليلة.
* ولو صبر كان الشفوت أجبروا المجلس على المهرجان.
* بل كان الشفوت أقاموا مهرجاناً للعجب لا يحلم به.
* ولكن العجب أختار الكم وكنا نتمنى له ان يتم الكيف.
* ولكنى أسال.
* أين الذين أقنعوا العجب بالأعتزال من هذا الأهمال.
* وهل كان دورهم مجرد أقناع العجب بالأعتزال!
* أين قريش؟
* الرجل أختفى من بعد الأنتخابات.
* حتى العجب كايسوا!!
* وأين صديق عمر العجب الدكتور حاتم أدريس.
* بالمناسبة دكتور حاتم يتمتع بمكانة كبيرة عند فيصل.
* بدرجة مستشار.
* كنت أتخيل أن أسمع عنه أبان هذه الأشكالية.
* والتحية لهما.
* أها.
* ناس روشا فرحانين بى وارقو.
* تتذكروا مانشيت روشا بتاع ماسورة؟؟؟
* لما قال ناس الحلة بتكلموا عن مشكلة موية.
* وتصادف دخول وارقو للعمارة مع عبارة أحدهم من الماسورة.
* وارقوا طبعاً من دى ما بعرفها.
* لكن ماسورة بعرفها.
* وقام ضارب اولاد الحلة.
* واليزمين دى فى مشكلة موية فى الحلة ديك يا روشا.
* قولوا لى وارقو كان سمعت كلمة ماسورة صهين.
* فى صيانة.
* أها.
* نجى لى شمارات والى الخرتوم.
* أكان شفت يا والينا.
* أى حاجة فى البلد دى بتقوم بعملها على أكمل وجه.
* الا الأنسان.
* الحر يجينا زى يفورنا.
* ما داير أقول يفور دمنا لأنو ما عندنا والكضب حرام والقبر قدام يا والينا.
* الشتاء برد من امو.
* الخريف سيل يجى من البطانة للعاصمة.
* يخم ويصر.
* زول ساى من ناس جبايات الطرق ديل ما وقفوا ولا سألوا.
* أظنهم أوامرهم بصات وهايسات وملاكيات مظللات بس.
* لكن سيل يدخل العاصمة يمرق بى هناك للعاصمة.
* ده ما شغلهم.
* السيل ذاتو ما بدفع.
* يوقفوه لى شنو.
* المهم اى حاجة بتحسن عملها فى البلد دى الا الأنسان.
* المهم الأنسان لو عرف أنو من أخذ الأجر حاسبه الله بالعمل.
* كان يقينا أحسن دولة.
* لأنو فى ناس كدة لو عملوا لينا قدر ربع أجورهم بس كان عملنا مفاعل
نووى يا والينا.
* وكان حمرنا لى أسرائيل بالنظر جوة عينا يا والينا.

سلك كهربا

*ننساك كيف ونسينا البحر فى البرد ده وواحشنا القيف.
واللللللللللللللللللى لقاء
سللللللللللللللللللللللك

في السلك – بابكر سلك