د. ناهد قرناص: النائب في البرلمان قال (الحجاج السودانيين ..ما بعرفوا البوفية المفتوح ..يمشوا يخموا الاكل ساكت)

استمعوا الى النائب في البرلمان الذي قال (الحجاج السودانيين ..ما بعرفوا البوفية المفتوح ..يمشوا يخموا الاكل ساكت ) ..عذرا سيدي النائب ..خطأنا نحن ..فقد كنا نعتقد ان شرط الحج بعد الاسلام هو الاستطاعة المادية والجسدية ..(يعلم الله معرفة البوفيه المفتوح دي ما كتبوها لينا في الورق والا كان دخلنا معهد تدريب ..اتعلمنا فيهو ..نشيل الاكل ياتو ونخلي ياتو ..وكمان يعلمونا الاكل بالشوكة والسكين ..باقي نحن ناس بدو ..و ناس اقاليم سااااي ..اتعلمنا ناكل في القدح الكبير ..كلنا سوا ..علا اكل الفسالة دا وكل زول ياخد له صحين ياكل فيهو براهو دا ما بنعرفله..غايتو كل شئ الا زعلك يا حضرة النايب ).

اعتذار واجب اخر …عذرا سيدتي النائبة التي قالت (يعني الحجاج ما عارفين موية زمزم دي براها بتشبع؟ ماكان يشربوا موية زمزم وخلاص) …خطانا نحن أيضا سيدتي النائبة .. فلم يخطر ببالنا يوما ان شرب مياه زمزم يطفئ نار الجوع..معلومة جديدة والله ..تاكدي اننا سنكون حريصين على ابلاغ السلطات السعودية بهذا الامر حتى تغلق كل المطاعم ومحلات الاكل المحيطة بالحرم ..فهناك اكتشاف سوداني مذهل بان شرب مياه زمزم يجعلك تحس بالشبع ويجب عليك الا تشتكي من (قرصة الجوع) بعدها .

اما النائب الأخير فقد اسعدني تصريحه والله ذلك لانه ولأول مرة منذ دخوله المجلس الموقر لم ينسب اسباب المشكلة الى النساء…(فقد كانت النساء سبب كل البلاوي التي مرت على البلاد حسب تعبيره) ..النائب الموقر لا فض فوه نصح الحجاج بالصبر لان الحج عبارة عن مشقة وتعب وليس رحلة ترفيهية ..لا ..

لا يخطر على بال احدكم بان الحاج كان قد دفع سلفا مبلغا من المال لقاء تلقي خدمات ..فالرد جاهز عند سعدية النكدية ..وهو تلك الطرفة التي تقول بان هناك مطعما كتب في اليافطة يوجد فول بالجبنة ..اتى احدهم وطلب فول بالجبنة ..فاتاه الفول (سادة) ..فذهب غاضبا لصاحب المطعم (وين الجبنة هنا ؟ انا طالب فول بالجبنة) ..فرد صاحب المطعم بكل هدوء ( هسع لما يكتبوا بيض بالطوة ..بجيبوا ليك الطوة؟ )..

قياسا على هذا ..الدفع مقدما للخدمات في السودان لا يعني بالضرورة تلقي الخدمات ..فنحن ندفع مقدما للكهرباء ..وتقطعها الادارة المركزية متى أرادت ..وتدفع مقدما للنت ولا تتلقى خدمة الا اذا طلعت على جبل كررى لاصطياد الشبكة ..وتقطع مقدما تذكرة في الخطوط السودانية ويتم الغاء الرحلة او تأخيرها بدون اخطارك..وتدفع مقدما لخدمات الحج…(فتقبض الريح) .

أسفة للتخريمة… اعود مرة اخرى لسيادته ..قال النائب ساخرا (الحاج السوداني يكون مستحمي ومتريح وبعد داك يلعن الحكومة )..الحقيقة والشهادة لله ..لم أفهم العلاقة بين التذمر من اداء الحكومة والحمام والريحة!!! ..حد يفهمني يا جماعة ..يعني الما مستحمي وما متريح يحق له التذمر؟؟ واللقى موية يستحم بيها وباقي قريشات يشتري بيهن ريحة يبوس ايده وش وضهر ويسكت!!؟ غايتو دي غلبتني عديل لكن للضمان كدا ابعدوا من الحمام والريحة يا حجاج .

الاعتذار واجب للنواب المحترمين الذين أضعنا وقتهم بمناقشة هذه الامور التوافه مثل رداءة الخدمات او انقطاع المياه عن مواطنين كنا نعتقد انهم مسؤولين عنهم امام رب العالمين ..ولكن يبدو اننا أزعجناهم وهم عندهم قضايا هامة كزيادة المخصصات لهم او تغيير العربات لموديل احدث او طلبات الاجازة فقد تعبوا كثيرا هذا الموسم .كامل الاسف يا سيادتك ويا سيادتها ….تحياتي نوابنا الكرام واحتراماتي واخيرا اختم بأبيات روضة الحاج (خطاي انا اني على لا شئ قد وقعت لك )…وووصباحكم الف خير وعافية

د. ناهد قرناص