المرفعين بعرف مكان بعضى أخو

[CENTER][B][SIZE=5] المرفعين بعرف مكان بعضى أخو [/SIZE][/B][/CENTER] [SIZE=5] * لقاء البايرن بقى واقع.
* واقع للناس الكان ما واقع ليهم.
* واقع للناس الكانوا مستبعدنو.
* روشا.
* وقع ليك ولا أوقعوا ليك!!!!!!
* البايرن بطل العالم.
* البايرن العالمى.
* المريخ ذاتو عالمى.
* هو المريخ برا.
* نحنا المريخاب برضو عالميين.
* يعنى تانى البقول لى يا سلك.
* ولا بتلفت عليهو.
* لازم يقول لى سلك العالمى.
* نحنا لاعبين ضد البايرن.
* موش لاعبين ضد أم صفقاً غراض.
* المهم
* الناس الوقع ليهم.
* بقوا بتمنوا هزيمة تاريخية.
* معتمدين على ان البايرن حافظها.
* لكن ناسين حاجة.
* ناسيين انو البايرن المانى.
* وكروجر المانى.
* وأهلنا فى دارفور وهم طبعاً أفضل من أطلق الأمثال والحكم فى العالم.
* أهلنا فى دارفور بقولوا.
* المرفعين بعرف مكان بعضى أخو.
* وأن كان البايرن مرفعين.
* فكروجر برضو مرفعين.
* الأتنين ألمان.
* يبقى كروجر بعرف مكان يعضى البايرن.
* والعضة ممكن تجى من بلة جوبخار.
* لأنو بلة وهو ماشى بالكورة هو ذاتو ما عارف روحو ماشى وين.
* الألمان يعرفوها كيف؟
* ناس البايرن حا يعرفوا حاجة.
* وأن كان البايرن لم يسمع بى سيدا وسيد أبوها وأمها.
* فهذه محمدة.
* لأنهم ما حايراقبوهو.
* وكان ما راقبوهو.
* البقت بتبقى.
* شفتوا ليكم ألمانى بسكلوا؟؟؟؟
* الألمان ممكن يمسكلوا.
* لكن يسكلوا!!!
* صعبة دى.
* وكتب الما وقع ليهم.
* كتبوا ان المريخ دفع للبايرن أطناشر مليار عشان يلعب ضدهم.
* وقالوا فى العقد منصوص انو المباراة تنتهى واحد صفر.
* ودة طبعاً محاولة تقليل شأن الزعيم لأنهم واقع ليهم شديد أنو الزعيم بعملها.
* أيها الناس.
* الألمان ديل متين أتفقوا مع زول.
* فى الحرب العالمية كانوا شايتين براهم.
* خليها الحرب العالمية.
* هتلر ده سمعتو بيهو يوم أتفق مع زول؟؟؟
* خليهو هتلر.
* المارسيدس ده يوم جاكم صناعة صينية ولا تجميع كورى؟
* أتفقوا شنو ياخ.
* فكونا.
* واقع ليكم لى بهناك.
* ما تعملوا داقسين.
* أيها الناس.
* الشفت المريخى الكبير.
* مولانا مرتضى التاى.
* قابلتوا امس فى المحكمة.
* قال لى ناس البايرن لو راقبوا سيدا بفكوا الطلقة الأولى.
* ويقصد بيكيلى الأثيوبى.
* الزول ده بالمناسبة داهية.
* المهم.
* واحد قال لى الهلال حايقابل الآرسنال بالقاهرة.
* قلت ليهو أرسنال وين؟؟شندى!!
* غايتو ما عارف.
* عشان ناس فطومة ما يقعدوا يوم الخميس قدام التلفزيون زى الزول الأمى البحضر فى فيلم أجنبى ما مترجم.
* حقوا يحصلوا كورس مكثف فى معهد جوتة.
* عشان يفهموا الحاصل شنو.
* والله يا فطومة بدون لغة تقعدى ساااااااااى.
* ماتفهمى الا الدعايات وشعار القناة.
* المهم.
* الشفت بشارة يعقوب كشة.
* مالك وكالة فجاج للسفر والسياحة.
* قلت ليهو انا ماشى قطر لى كورة البايرن.
* قال لى ما تزعل.
* كورة البارسا فى دبى على.
* فيزا وتذكرة وأقامة.
* قلت ليهو خلاص كورة باريس سانت جيرمان على يا بشارة.
* لو فى القاهرة او فى القلعة.
* أيها الناس.
* كورة أم صفقاً عراض متين ووين؟؟
* لكن.
* المرفعين بعرف محل بعضى أخو.
* والخميس تسيفى يا فتومة.
* ولو ربنا أدانا الفى مرادنا.
* هييييييييييييييييييييييي.
* هيييييييي وهييييييييييي وتانى هييييييييييييييييي.
* تسمعوا جنس صفقة.
* جنس صفقة.
* ونردح فيكم جنس ردحى.
* هو داب ردحى.
* ما لنا ما بنفرح.
* ما بنعرف الفرح ولا ما بنعرف الفرح.
* هو ذاتو المريخ ده قالوا سيدة فرح أول حاجة سمتو الفريح.
* هو جنس فرح.
* فرحنا البزعل الناس ده بعجبنا شديد.
* فرحنا عود العشر.
* هيييييييييييييييييييي يكا.
* هفسسسسسسسة.
* وقع ليكم ولا لسه؟!
* أها.
* نجى لى شمارات والى الخرتوم.
* أكان شفت يا والينا.
* بعد كتبت فى الشمارات عن الأستقلال والأستغلال.
* يوم نشرت الأيصال.
* الأيصال بتاع رسوم الترفيه.
* واحد قرأ الكلام ده.
* يكوس فينى يومين.
* لقانى.
* قال انت سلك؟؟
* قلت ليهو بالحيل.
* قال لى انت خشمك الخفيف ده بتكلم الوالى يوماتى؟
* قلت ليهو واجبنا.
* قال لى وأتكلمت عن الأستغلال فى يوم الأستقلال؟
* قلت ليهو أتكلمت.
* قال لى أنت متأكد الأنقليو مرقوا؟
* أتبومت.
* أتبومت يا والينا.

[B]سلك كهربا[/B]

* ننساك كيف وبنتبوم فى أسهل سؤال.
والى لقاء**********سلك
[/SIZE]

في السلك – بابكر سلك