الحوثيون 9/1000 الشايلين خريطة الكنز ولافين

> أيها النااااااااس
> روح الاستسلام والانهزام ما بتشبهنا
> الترجي نعم فريق كبير وعريق وقوي
> ولكن نحن لا نقل عنه مكانة
> يكفي اننا الاتنين مسجلين في لوح الشرف الافريقي
> الترجي يشوف كونفدراليتو وين
> لكن نحنا نمضي في طريقنا وقشة ما تعتر لينا
> شامي لي ريحة مطار
> بقي دي ريحة بعرفوها الكبار بس
> نحنا والاهلي القاهري والترجي ومازيمبي فايف ستارز وبقية زملاءنا في لوح الشرف
> الناس المزكومة بالصفر ما بتعرفها
> الصفر بمنع الزول من شم ريحة المطار
> لكن ريحة المطار زي الفيكس
> البشمها بتفتح ليهو نخرينو
> بتشيل قفلة الصفر من نخرينو
> وبعد داك بشم عاااادي
> لذا ولذلك
> لانخاف الترجي ولكن نحترمه
> واحترامنا له في احترامنا لقدراتنا وفي ثقتنا في فريقنا
> لا نستهتر به
> ولكن لن نجعل منه ود ام بعلو
> ود ام بعلو لي ناسو
> لكن لينا نحنا ما (منجن)
> والاستهتار به برضو ما من صالحنا
> نديهو قدرو
> عشان يدينا عجاج كرعينو
> ايها الناس
> العودة لمنصات التتويج الافريقية هي الهدف
> لاحظ
> العودة
> لأننا اساساً كنا فيها
> كعبين الناس الشايلين خريطة الكنز ولافين
> محمد عبدالماجد
> انتو ماشين عكس يا اخوي
> ده ما طريق منصات التتويج
> الدرب تاني برجعكم للصفر
> تبدوا من الصفر
> ايها الناس
> لانريد اعتلاء منصات التتويج ونيل ذهبها فقط
> بل نريد صناعة فريق بطولات
> يتواجد دوماً على المنصات
> وعشان نصنع هذا الفريق
> يجب علينا ان نهتم بالاشبال والرديف شوية
> البحصل ده ما بعجب زول
> مزيداً من الاهتمام
> مزيداً من الثقة فيهم
> دايرين يجينا موسم ما نجيب منقتنا من جنينتنا
> دايرين نخلي جنينتنا تغني لينا
> لون المنقة يا الشايل المنقة .. ما عارف كيف نحنا بنشقى
> بشقوا شديد طبعاً لا نشيل المنقة
> لكن حقو نزرع منقتنا برانا
> ارضنا خصبة
> ومويتنا رااااقدة
> وبنقدر نجيب اجود انواع شتول المنقة
> لذا ولذلك
> الاشبال ثم الاشبال
> المهم
> مشروع الدعم الجماهيري قرب يتفعل
> والشفوت حايدهشونا
> من حبهم للنادي يستطيعون أن يدعموا النادي بالغالي
> فقط لديّ ملاحظة
> غابت اسماء مؤثرة جماهيرياً من اللجنة الاعلامية
> فاسماعيل حسن وحسن حمد الاسد
> تأثيرهما على الجماهير كبير
> وحب الشفوت لهم يفوق الوصف
> ولعل بعض الاسماء قد سقطت سهواً
> ارجو ان نجدهما في مقدمة الركب ضمن اللجنة الاعلامية للمشروع
> المهم
> غرزة كل يوم يثبت انه مدرب في قامة المريخ
> مدرب منصات تتويج وفريق منصات تتويج
> حديد لاقي حديد
> وبالصبر على هذا البروف
> سنعود حتماً لمنصات التتويج
> المهم
> علمتني أمي
> وسألتني
> يا جناي السماحة نعمة من الله على الزول السمح ولا نعمة من الله على البشوف السماحة ؟؟؟
> قلت ليها سؤالك خطير يا أمي
> قالت لي
> أياً كانت الاجابة بعد مرات الشنة سترة يا ولدي بتستر من العين وحاجات كتييييييرة
> قلت ليها فعلاً يا أمي
> قد ينعم البعض بالبلوى وإن عظمت … وقد يبتلي الله بعض القوم بالنعم
> السماحة مرات فيها جنس بلاوي ..اسكت بس!!
> سماحة السنكيت بتجيب الضبح للتور
> أيها الناس
> «إن تنصروا الله ينصركم»
> آها
> نجي لي شمارات والي الخرتوم
> كان شفت يا والينا
> الانتخابات قربت تجينا
> ولي أسى يا والينا
> لافي مرشح اشتغل بينا
> ولا في مقاطع استفرد بينا
> ولا في برنامج راق لينا
> خايفين البنديهو الصوت بالسوط يدينا
سلك كهربا
ننساك كيف وكل الرموز ما فيها رمز القفة أو المخلاية
والي لقاء
سلك