بابكر سلك

خسااااااااااارة


*تعادلنا بالامس خساره كبيره جدا
*لامبرر للتعادل امام فريق يئن من فرط الاعياء والالم
*اظنها الثقه او الاندفاع
*وحتي غرزه الشاطر
*لا ادري لماذا لعب معظم الوقت بمهاجم وحيد ضد فريق متهالك
*لكنا نقول البروف برضك ليهو نظرتو
*المهم
*التحكيم لم يكن بهذا السوء
*فقط اغفاله لضربة الجزاء الواضحه مع كوفي
*حيرت الصفاره زاتها
*اتخيل لي الصفاره قربت تصفر براها
*ايها الناس
*الاخوه الاهله لايصدقون التعادل
*لذا نتوقع منهم فرحه طائشه
*فبعضهم علي صفحات الفيس قد اتفق
*اتفقوا علي (فرتيق ) الكورة بعد الهدف الثاني
*متأكدين انو لو ما المريخ قوي
*فريقهم منتهي
*ومقصية ضفر لو صدقت
*لكذب المنجمون وتوج ضفر مستوياته الرائعه التي قدمها
*ولكنها قالت ابيت
*برغم ان ضفر نفسه اضاع فرصتان مضمونتان
*هاالناس
*بكري القالوا ماعندو حاجه
*مفرغين ليهو تلاته مدافعين
*ولو غرزه فكر للحته دي
*كان غلب باربعه اهداف علي الاقل
*ايها الناس
*لانريد ان نتحدث عن السيطره
*فسته ركنيات مقابل واحده توضح مستوي السيطره
*المهم
*الذين استعانوا بمحمد آدم والنذير دنقلا
*كنت داير ليهم هزيمة تقيله
*ليتركوا درب النفاثات في العقد
*ويخافوا الله
*وبالتعادل ده حايفتكروا انو النفاثات في العقد هي من انقذهم من الهزيمه الكبيره
*احكي ليكم دي
*قالوا في محامي شابك الناس ولدكم براءه براءه
*ولدهم قاتل
*في الجلسه الاخيره حكمت عليه المحكمه بالاعدام
*اهل المتهم قالوا للمحامي ماقلت لينا براءه ؟
*طالع ونازل عملت شنو اسي ؟
*قال ليهم والله لو ما انا مولانا ده كان قطعوا ليكم حتت في تربيزتو دي
*دي ياها الباقيه علي الجابوا محمد آدم
*والجابوا النذير
*يكونوا قالوا ليهم ما قلتوا بنغلب
*ويكون رد ناس النذير لو ما نحنا والله كان قطعوكم حتت في ميدانكم ده
*المهم
*واضح ان سيسيه من اجندتو الخروج مطرودا معاهو لاعب من المريخ
*هذا اللاعب كان مفترض يكون بكري
*لكن بقت علي راجي
*ويفترض ان يحاسب راجي علي ذلك
*لان خبرته كانت كفيله بان تجبره علي تفويت مثل تلك المخططات
*فراجي لاعب مؤثر
*وسيسيه قاعد ومافي كلو واحد
المهم
*خسرنا نقاط امس ماكان يجب ان نخسرها
*وقصة التعادل مع الفرق الضعيفه دي مقلقه يا غرزه
*نحمد الله ان مجموعتنا مافيها فريق ضعيف
*عشان مانقوم نتعادل معاهو كمان
*ايها الناس
*انتهت الدوره الاولي
*والقطر اتصلح
*القاطره التي تجر العربات تقدمت
*خلت عربات الفرمله والبوسته وراها
*وهكذا وعد غرزه
*وقالها جمال الوالي يوم الجمعيه العموميه
*قال واثق من تصدرنا للدورة الاولي
*ونقول ليك يا ريس
*واثقين من تصدر الممتاز والمجموعه
*بل واثقين من اللقاء بالمطار السنه دي
*شامي لي ريحة مطار
*ايها الناس
*ضربة جزاء مع كوكي تفتح بلاغ واورنيك تمنيه كمان
*لاادري اين كانت عين الحكم
*يكون ياربي النذير عماهو منها
*ولا التحكيم يخطئ ولايظلم
*دايرين نشوف الحاله يا رضا
*بدل المره الف مره
*من كل الجهات
*بالبطيئ والسريع
*ونسألك بالله تخلي الضيف يشرح
*ماتشب ليهو في حلقو
*وتقول ليهو الحاله دي خليها
*قبل ما الكورة تصل كوفي
*موش كانت في مخالفه لصالح الهلال ؟؟
*حركاتك دي عارفنها
*عشان تبعد الناس من حسين
*تتكلم ليهم عن حسنين
*نتوقع مهنيه عاليه منك في جهاز قومي يا رضا
*او سموهوا تلفزيون الهلال
*كترت شديد الحاجات البتنقص قومية جهاز حساس يا رضا
*اسألوا الصفاره
*لو ماقالت ليكم بلنت
*لوموني انا
*ايها الناس
*لاعبو المريخ اضاعوا نصرا كبيرا
*يجب محاسبتهم علي ذلك
*ايها الناس
*ان تنصروا الله ينصركم
*اها
*نجي لي شمارات والي الخرتوم
*كان شفت يا والينا
*المدارس قربت تفتح علينا
*دايرين نشوف يا والينا
*الاستعداد كيف للعام الجايينا
*دايرين نشوف الكتب والكنب والصيانه عشان السقف ما يقع فينا
*دايرين نحس بانو في وزراة شغاله بينا
*دايرين نعرف كم معلم دربوهوا لينا
*دايرين دكاكين مدارسنا ايجاراتها ما تمشي المحليه
*لكن تجينا
*طالما الدكاكين مستقطعه من مساحات مدارسنا يا والينا
*يبقي ريعها مفروض يرجع لينا
سلك كهربا
ننساك كيف وقبل ما نغني يلا يا اولاد المدارس حقو نجهز المدارس
والي لقاء
سلك


‫4 تعليقات

  1. يا سلام ياخ طيب ما تجي انت بصلعتك دي وتكون بدل غازيتو. طالما انت بتعرف احسن منو. كمان قال شنو.” غارزيتو لو فكر للحتة دي” هاهاهااااااااااااااااااااااااااااااااااا…. انت فكرت ليها وغارزيتو ما فكر ليها…. طيب بابا جمال مفروض يدي غارزيتو تاشيرة خروج نهائي ويجيبك انت يالعولاق تكون بدلا له…. انت بتقول الهلال ضعيف …كويس جدا نحن معاك انو ضعيف… طيب ليه ما غلبت الضعيف ده 10 صفر؟؟…… ياخ انت قريت وين … ملعون ابو المدارس العلمتك ده لو اصلا تعلمت…..

  2. خسارة الزيك دا يكون صحفي. اسلوب ركيك وكمان عامل فيها دمه خفيف.

  3. سلك يا زميل يا الجو الرطب يا الفرع يا اكرم يا كوركودايل .. لو بتذكر . انت كصحفي وناقد رياضي لازم تترفع عن الاسفاف والمهاترات لكن الظاهر مواكبتك لمزمل ومحمد عبد الماجد خلاك تعوم في عومهم ارجع تاني الزول المهني الموضوعي وخلي كتاباتك فيها تحليل موضوعي ونقد هادف بعيدا عن الاسفاف والمهاترات عشان الرياضة في بلدنا تتطور وتمشي لقدام لانو الرياضة مثلث من 3 اضلاع اداري ولاعب وصحفي وكل واحد لازم يؤدي دوره بمهنية واحتراف

  4. ضحالة واسفاف وغثاء صورة من صور التردى فى الرياضة
    صحفى يخاطب الناس لا يدرك ان كرة القدم انتماء عاطفى ومنافسة متقلبة النتائج