الحملة القومية لمقاطعة شركات الاتصالات السودانية.. بيان

بالنسبة للحملة فالناس وافقت عليها باﻷغلبية،، وكلها باقي ليها تلات أيام،، وانتشرت ،، وما العايز يقاطع إحنا ما بنجبرو،، ومافي داعي للهجة العدائية الفي التعليقات دي،، لذلك إذا انت ضد الحملة ماتدخل الصفحة أصلا ومافي داعي للتعليقات اللي ما في محلها،،

وبالنسبة للناس اللي عندها ملاحظات على الحملة ف يا ريت يرسلو كل ملاحظاتهم في رسايل الصفحة أو يستنوا الأيام دي تعدي وبعد الحملة تخلص يكتبوا العايزينو في تعليقات،، بس هسة ساعدونا بإنكم ما تثبطوا لينا الناس،،

والناس االي بيقولوا صعب التنفيذ،، من متين الزول لو عايز يصل لهدف معين بيصل ليهو بالساهل؟؟،، عايز تحسن النت والاتصالات وبي يدك،، ضحي شوية.. لو عايز حاجة ساهلة ف ما حتقدر تعمل أي تغيير.

ومهما كانت ارائكم ف دي أول مرة تطبق الفكرة دي،، نستنى ونشوف نتايجها،،

بالنسبة للناس الشايفة إنو النت دة رفاهية:

إذا انت شايف إنو النت الحالي دة بصورتو دي بيمكنك إنك تتكلم بالواتس والدردشة وامورك ماشة فغيرك كتاااار عندهم استخدامات أكبر للنت.. وماعبارة عن مواقع تواصل اجتماعي وضياع زمن وبس.

كم طالب سوداني تخصصاتهم ليها علاقة بالحاسوب والنت؟؟، وكل ماكان حال النت أفضل كل ماكان وصولو ﻷي معلومة أسهل،، ويستثمر زمنو،، ويعمل أبحاثو أو يحضر كورساتو أونلاين أو أي شي تاني،،

وناس التخصصات التانية محتاجينو برضو ﻷبحاثهم أو تكملة تعليهم أو غيرو.

وحتى الناس اللي بيستخدموهو للتواصل تلقى كل وقت المكالمة أو المحادثة ضايع بسبب سوء الشبكة.

بالإضافة لتعرفة المكالمات والرسوم اللي بتفرضها علينا الشركة،، وفي قروش بتتشال غير مبررة ومافي داعي إنها الشركة تربح ربح فوق الخيالي على حسابنا والعائد لا يساوي المدفوع.

والبيقولوا الشركة حتعوض ديل،، شركات الاتصالات بتختلف عن باقي حاجات البيع والشراء،، يعني لما تخسر حتى لو ربحت اليوم البعدو ما حيعتبر تعويض،، بالاضافة لانها حتكون حملات متكررة لغاية ما تزبط لينا الشبكة.

أهدافنا مكتوبة في الكوفر..
ودمتم

الحملة القومية لمقاطعة شركات الاتصالات السودانية