لدواعٍ وطنية نمشي الاسكندرية

> نحنا كشفوت حقو نمشي الاسكندريه
> نناصر ابو الهل
> لاعتبارات عديده
> لينتصر ويتصدر ويقابلنا
> مادايرين في الكروس قشه تعتر لينا
> عشان كده مقابلة ابو الهل بتسهل علينا
> ولما البلد تضمن المريخ في النهائي
> يبقي ربحت
> لذلك نمشي الاسكندريه
> نمنع التواطؤ
> الفراعنه ديل ما مضمونين
> والجماعه ديك «خترين »
> التطوان
> ممكن يحاولوا يشتروا من الفراعنه
> وده الكلام المادايرنو نحنا
> نحارب التواطؤ
> فالبطوله نريدها شريفه
> ولا نريد أن نسمع بتواطؤ فيها
> عشان ما يجينا زنطور بعد تمر السنين والشهور
> ويقول ما شاف كاس افريقيا الجابو المريخ
> او يقول كان فيهو بيع تطواني فرعوني
> وحاجات بالشكل ده
> ايها الناس
> بعض الناس وهمانين
> لسه ما اتأهلوا لي دور الاربعه
> وبتبجحوا
> ونحنا بنفكر اسي نغلب برشلونه كيف
> بنخطط لي قفلة ميسي
> يقفلوا ضفر
> ولا نفك ليهو راجي يسكو
> ولا نخصص ليهو ايمن المصري
> وناس برشلونه بفكروا يوقفوا بكري كيف
> عارفين بيكيه تقيل
> وعارفين دفاعهم ما بقدر علي الكهربه دي
> وناقشين كويس
> انو بكري لو جري
> اقليم ساكسونيا كلو لو لعب سكسك ما بلحقو
> فكرنا مشي بعيد
> بعيد شديد
> ايها الناس
> كورة اتحاد الجزائر الاولي لازم نجتهد فيها
> على الجماهير دور كبير
> واللوحه التي رسمتها الاولتراسات كلها
> وروابط التشجيع
> وجميع الشفوت
> يجب ان يرسموا اجمل منها
> كما ادهشوا الوفاقاب
> يدهشوا الاتحاداب
> اما كورة الاتحاد التانيه فدي دايرين فيها لوحة تدهش افريقيا كلها
> لأنها الكورة الاولي في النهائي
> اما كورة الاتحاد التالته
> فهي مباراة النهائي بالجزائر
> لن ندعك تسير وحيداً شعارها
> كل الشفوت جوه الجزائر
> لو نمشي بالركشات نكون هناك
> عشان نحضر الزعيم وهو يرفع الكأس الافريقيه عالياً
> أيها الناس
> كورة السوبر برضك نمشي مع الزعيم
> ومشية اليابان فيها منافع اخر
> جنس خمخيم خرد
> استعمال اليابان يا عمك
> سكند هاند من امو
> وناس روشا ما يزعلوا
> بنديكم مكنات بالاقساط
> ادفعوا المقدم والباقي بنعتبروا دين هالك
> ايها الناس
> ريحة المطار فاحت شديد
> وعلينا ألا نفرط فيها
> ما جاتنا صدفه
> ولا جاتنا بطرق ملتويه
> جاتنا بي عرقنا واجتهادنا
> بي جري بكري المدينه وجسارة جابسون ورشاقة جمال سالم
> جاتنا بي جهود رجال ودعم جمال
> جاتنا بدون ادنى شك في اننا نستحقها
> لا لعبنا كورة الحكم نهاها في الدقيقه اربعين والزمن الضايع رقادا كان تلت ساعه
> ولا انظلم منافسنا ظلم الحسن والحسين باخطاء تحكيميه «غير مقصوده».
> ولا القرعه لملمت لينا الكرور «صدفه»
> ولا كتلنا زول جوه خط طمنطاشر والحكم صهين
> هو زول واحد!!!!
> جاتنا بي حقنا
> يبقي من واجبنا ومن حقنا
> ان نحافظ عليها قبل ان نفخر بها
> فالكاس كاسنا
> ونحنا اهلو ونستاهلو
> لو اجتمع الجن كلو في قلب الاتحاد الافريقي
> لو تفرغ الشيطان ليعاكسنا
> لو اجتمع كل منجمي العالم ضدنا
> فمريخنا مصان بالقرآن
> ومصان بنية جمال الجميله
> ومصان بقلوب الشفوت الاصيله
> ومصان بمهارات وامكانات كبيره
> ايها الناس
> رئاسة الجمهوريه اعلنت دعمها للزعيم
> كتر خيرهم
> دعمونا بعد صعدنا بي اسبوع
> وغيرنا تم دعمه قبل ان يلعب
> بل
> قبل ان يتأكد صعوده
> ولعل رئاسة الجمهوريه بفطنتها قد قصدت ان تقول
> انا احفز المريخ علي انجازه
> لذا اقدم له بعد ان يصل
> وانا احرض الهلال علي ان ينجز
> يبقي زي المريخ
> لذا ادعمه قبل ان يلعب واوعده بالحوافز
> على كل الشكر لرئاسة الجمهوريه
> ونتمنى ان تعلن حافز البطولة الافريقيه من اليوم
> وتجهزوا
> الكاس جاييكم في القصر يا ناس رئاسة الجمهوريه
> قولوا آمين
> جايبوا جمال متقدم للصفوف
> هديه لرئاسة الجمهوريه
> وما جديده علينا
> فقد اهديناكم من قبل مانديلا
> وجبناهوا ليكم جوه القصر
> واليوم من حق القصر الجديد ان يتوشح بالاميره الحمراء
> من الليله اسمها الاميره الحمراء
> دايرين نجيبها لي بلاد العجائب
> عشان تبقى الاميره الحمراء في بلاد العجائب
> ما تفهموني غلط
> العجائب دي قاصد بيها
> فيصل عجب ورمضان عجب
> ايها الناس
> التواطنه لو اتفرعنوا مع التواطؤ
> اقصد التواطؤ لو اتطون مع الفراعنه
> اقصد الفراعنه لو اتطونوا مع التواطؤ
> اقصد التواطؤ لو اتفرعن مع التواطنه
> يبقى خبر الشوم خبر الروم
> وحايتناقلوا الحروم يا فطومه يا اختي
> غايتو لو اتناقلتوا ما تبخلوا علينا
> ورونا الشمار
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> الجقر كملن الفينا
> قصاد كلو مواطن خمسين جقر يا والينا
> والجقر كلو اتنين وخمسين يوم بلد يا والينا
> لا بحتاج موجات زي البتتعمل لينا
> ولا داير طفل انابيب زي اللدينا
> ولا ببلع فوليك اسيت يا والينا
> بدون تأمين بلد مجاني كيتا علينا
> بدون حضانه طفلو تاني يوم يجري بينا
> بدون تحصين بدون تطعيم بدون تنجيم يا والينا
> لكن علمياً وحسب ماقالوا لينا
> الجقر بجيب الطاعون يا والينا
> موش كفانا الطاعون الساكن فينا
> اقرضوهوا قبل ما يقرض الشعب الفضل لينا
> الجقر القرض الكبري بقرضنا يا والينا
سلك كهربا
ننساك كيف والكلب لو شاف الجقر بجري .. هو جقر نصاح يا والينا!!
والى لقاء
سلك