الكتروني والخور مقفول!!

> اليوم نلتقي الاسود
> لكن بإذن الله لن يستأسدوا علينا
> فالزعيم هو سيمبا
> وسيمبا بالإفريقي هو الاسد
> الاسد الوحيد الكبير
> الاسد الذي تحترمه الأُسد
> فما بالك من بقية الغابه
> الزعيم هو الاسد الكبير
> فما حدث بعطبره لن يحدث تاني ان شاء الله
> ماشين بي طياره خاصه
> وراجعين بالسلامه ان شاء الله بي طيارتنا الخاصه
> عز وعجن
> لما نسافر بالطياره زي الماشين مشوار بي امجاد
> بنقول ليهو استنانا شويه نرجع معاك
> المهم
> اللاعبون أكيد استفادوا من تجربة الفاشر وعطبرة
> وبما انهم المرشح الوحيد للاميرة الحمراء الافريقيه
> يبقي مفروض يبقوا قدر الترشيح ده
> وراجياهم مقابلة ضد اتحاد الجزائر في النهائي
> ان شاء الله سيكون نزال تشهده كل افريقيا
> المهم
> سيد الأتيام يمكنه ان يبتعد عن الخطوره
> فقط اذا اراد ذلك
> وانا اريد وانت تريد واهلي مدني يريد والتحكيم يخطئ وللصواب يريد والله يفعل ما يريد
> المهم
> اتوقع اخبار رائعة يعلنها مغرب اليوم
> مغرب اليوم السوداني لو طلع تطواني
> يبقي تحققت كل الاماني
> المهم
> اتنين بتاعين بحر بتونسوا
> قرفانين من النسوان شديد
> النوع المرتو هارشاهو داك
> بمناسبة هارشاهو دي
> قالوا في واحد قال المابخاف من مرتو ما راجل
> المهم
> بتاع البحر الاول قال للتاني قرفان شديد من المره
> التاني قال ليهو انت قايل النسوان ديل كلهن واحد؟
> النسوان ديل زي السراميك
> فيهن فرز اول
> وديل زي ناس نانسي
> نانسي عجرم
> النوع ده بتلقاهو معبأ في صناديق فاخره وخاتنو في المخزن
> ما بتشوفو بالساهل الا تدفع تمنو
> وفيهن فرز تاني
> وديل زي ما تقول كده فرقهن ما كبير من الفرز الاول
> وبرضو بكون الفرز التاني في المخزن معزز مكرم
> وفيهن فرز تالت
> وديل بكونن معوجات كده وما دغري
> لكن بمشي الحال
> تدقوا في برنده تدقوا في راكوبه تدقوا بالسوط ما فارقه
> وفيهن الكسار
> والكسار كتير شديد
> وده بتلقاهو في شوالات خاتنو في الشارع جمب المغلق
> مخزن ما بخسروهو فيهو
> برغم انو الكسار ده ممكن تلقي فيهو سراميكه كبييييره عيبها بس ترمه في الطرف
> الاول قال ليهو وكسارنا ده ما بقايضوهو لينا بي فرز اول يا عمك؟
> التاني قال ليهو ممكن بس تحسن الاعمال وفي الجنه ما في مستحيل
> المهم
> كالعادة الامطار فاجأت الولاية والمحليات بالامس
> المطره مع الولايه والمحليه زي الشوته من بره الخط مع مكسيم
> بتفاجأ بيها طوالي
> وامس شاهدت منظر جميل
> اثناء المطر
> وجوار مبني محافظة امدرمان او قل محليه «تشابهت علينا الاسامي والفشل واحد»
> شاهدت اهتمام المحليه المتمثل في عمالها الشغالين بفتحوا في الجداول والمطره صابه
> كأنهم يا دوبك عرفوا انو هنا في جداول
> برغم انها مجاري محفوره ومبنيه ومعروشه من زمن الانجليز
> ولكن استخراج الاكياس منها ما تم الا بعد المطره جات
> والغريبه الكيس الدهني بقي يتشال في اي حته
> كيس جيلاني العادي ده داير ليهو هيلمانه قدر كده؟
> وهنا لا نلوم المحليه وحدها
> بل نلوم سلوك المواطن الذي يدفعه لرمي الاكياس في الشارع علنا وبدون خجله
> متين نبقي ناس يا ناس
> ونعرف انو الحفاظ على نظافة المدينه بتم بخطوه اولى من المواطن
> تفعيل سلوك معين
> يساعدنا على أن ننضف شويه
> زمان في غنم بساعدونا في القضاء على الاكياس «برغم انها بتضرهن» والاوراق المجدعه في الشوارع
> اسي غنم ما عندنا
> حقو عشان ما عندنا غنم
> نبقى غنم ونقوم بالقضاء على الاوراق والاكياس من الشارع العام
> ومن الخور الغرق
> وفي نفايات
> بالكوريك ابت تمرق
> بالطوريه ابت تمرق
> بالواسوق ابت تمرق
> من السوق ابت تمرق
> بالكرك ابت تمرق
> ومرقت المويه للشوارع والمدارس وحيشان البيوت
> ايها الناس
> ان تنصروا الله ينصركم
> اها
> نجي لي شمارات والي الخرتوم
> كان شفت يا والينا
> في اول مطره ولايتك رسبت
> المطره بالطين للفشل رسمت
> فشل المحليات القبضت مننا وبعد ما قبضت لينا ابتسمت
> وشالت مننا كل رسومها
> ومدت لينا قدوما
> وفضلنا نهتف يا والينا
> يلعن يوما ومنعول ابو يوما
> محليه خورها مقفول وينعق بوما
سلك كهربا
ننساك كيف والكلب لما المطره صبت مات بالضحك وقال لينا الكتروني والخور مقفول!!
وإلى لقاء
سلك